ଓ୍ବିମ୍ବେଲଡନ, ୧୧ା୭ (ଏପି): କରୋନା ଭାଇରସ୍ ମହାମାରୀ ଯୋଗୁ ଓ୍ବିମ୍ବେଲଡନ ଗ୍ରାଣ୍ଡସ୍ଲାମ ଟେନିସ ଚାମ୍ପିୟନଶିପ୍ ବାତିଲ କରିଦିଆଯାଇଛି। ଏହା ସତ୍ତ୍ୱେ ୧୨.୫ ନିୟୁତ ଡଲରା ପୁରସ୍କାର ରାଶିକୁ ୬୨୦ ଖେଳାଳିଙ୍କ ମଧ୍ୟରେ ବାଣ୍ଟି ଦିଆଯିବ ବୋଲି ଅଲ୍ ଇଂଲଣ୍ଡ କ୍ଲବ ତରଫରୁ ଶୁକ୍ରବାର ପ୍ରକାଶ କରାଯାଇଛି। ବୀମା ଯୋଗାଣକାରୀଙ୍କ ସହ ପରାମର୍ଶ ପରେ ଏହି ନିଷ୍ପତ୍ତି ନିଆଯାଇଛି। ମୁଖ୍ୟ ଡ୍ର’ରେ ସ୍ଥାନ ପାଇଥିବା ପ୍ରତ୍ୟେକ ଖେଳାଳି ୨୫,୦୦୦ ପାଉଣ୍ଡ (୩୧,୦୦୦ ଡଲାର) ଲେଖାଏ ପାଇବେ। କ୍ୱାଲିଫାଇଙ୍ଗ୍ରେ ଭାଗ ନେଇଥିବା ୨୨୪ ଖେଳାଳି ପ୍ରତ୍ୟେକ ଜଣ ପିଛା ୧୨,୫୦୦ ପାଉଣ୍ଡ (୧୫,୬୦୦ ଡଲାର) ଲେଖାଏ ପାଇବେ। ଏହାଛଡ଼ା ଡବଲ୍ସରେ ଭାଗ ନେବାକୁଥିବା ୧୨୦ ଖେଳାଳିଙ୍କୁ ୬,୨୫୦ ପାଉଣ୍ଡ(୭,୮୦୦ ଡଲାର), ହ୍ବିଲଚେୟାର ଇଭେଣ୍ଟରେ ଅଂଶଗ୍ରହଣ କରିବାକୁଥିବା ୧୬ ଖେଳାଳି ଜଣପିଛା ୬,୦୦୦ ପାଉଣ୍ଡ (୭.୫୦୦ ଡଲାର) ଏବଂ କ୍ୱାଡ୍ ହ୍ବିଲଚେୟାର ଇଭେଣ୍ଟରେ ଭାଗ ନେବାକୁ ଥିବା ୪ ଖେଳାଳିଙ୍କୁ ୫,୦୦୦ ପାଉଣ୍ଡ (୬,୨୦୦ ଡଲାର) ଲେଖାଏ ପ୍ରଦାନ କରାଯିବ। ଅଲ୍ ଇଂଲଣ୍ଡ କ୍ଲବ ମୁଖ୍ୟ କାର୍ଯ୍ୟନିର୍ବାହୀ ରିଚାର୍ଡ ଲୁଇସ୍ କହିଛନ୍ତି କରୋନା ମହାମାରୀ ଯୋଗୁ ବର୍ତ୍ତମାନ ଅନିଶ୍ଚିତ ପରିସ୍ଥିତି ଦେଖାଦେଇଛି। କେତେଜଣ ଖେଳାଳି ବିଶ୍ୱ ର଼୍ୟାଙ୍କିଙ୍ଗ ଭିତ୍ତିରେ ଓ୍ବିମ୍ବେଲଡନରେ ପୁରସ୍କାର ହାସଲ ଆଶାରେଥିବେ। କେତେଜଣ ହୁଏତ ଏହି ସମୟରେ ଆର୍ଥିକ ସଂକଟ ଦେଇ ଗତି କରୁଥିବେ। ଏହସବୁ ଦୃଷ୍ଟିକୋଣରୁ ପୁରସ୍କାର ରାଶି ଖେଳାଳିଙ୍କ ମଧ୍ୟରେ ବାଣ୍ଟି ଦେବାକୁ ନିଷ୍ପତ୍ତି ନିଆଯାଇଛି।
