ଓ୍ବାଶିଂଟନ/ମୁମ୍ବାଇ,୭।୩: ୨୬/୧୧ ମୁମ୍ବାଇ ଆକ୍ରମଣର ଅଭିଯୁକ୍ତ ତହଉର ରାଣାଙ୍କୁ ଭାରତ ଆଣିବା ପାଇଁ ପଥ ପରିଷ୍କାର ହୋଇଛି। ଆମେରିକାର ସୁପ୍ରିମକୋର୍ଟ ତହଉରଙ୍କ ଭାରତ ପ୍ରତ୍ୟର୍ପଣକୁ ରୋକିବା ପାଇଁ ଦାବିକୁ ପ୍ରତ୍ୟାଖ୍ୟାନ କରିଛନ୍ତି।
ଭାରତକୁ ପ୍ରତ୍ୟର୍ପଣ ନ କରିବା ପାଇଁ ତହଉର କୋର୍ଟର ଦ୍ୱାରସ୍ଥ ହୋଇଥିଲେ। ସେ ଆମେରିକାର ସୁପ୍ରିମକୋର୍ଟରେ ଏକ ଆବେଦନ ଦାଖଲ କରି ତାଙ୍କ ପ୍ରତ୍ୟର୍ପଣ ଉପରେ ଜରୁରୀକାଳୀନ ସ୍ଥଗିତାଦେଶ ଲଗାଇବାକୁ ଅନୁରୋଧ କରିଥିଲେ। ତହଉର କହିଥିଲେ ଯେ, ଯଦି ମୋତେ ଭାରତକୁ ପ୍ରତ୍ୟର୍ପଣ କରାଯାଏ, ତେବେ ମୋତେ ନିର୍ଯାତନା ଦିଆଯିବ ଏବଂ ମୁଁ ସେଠାରେ ଅଧିକ ଦିନ ବଞ୍ଚି ପାରିବି ନାହିଁ।
ସେ ତାଙ୍କ ଆବେଦରରେ ଆହୁରି ମଧ୍ୟ କହିଥିଲେ, ପାକିସ୍ତାନୀ ବଂଶୋଦ୍ଭବ ମୁସଲମାନ ହୋଇଥିବାରୁ ତାଙ୍କୁ ଭାରତରେ ବହୁତ ହଇରାଣ କରାଯିବ। ହ୍ୟୁମାନ ରାଇଟ୍ସ ୱାଚ ୨୦୨୩ ୱାଲର୍ଡ ରିପୋର୍ଟରେ କୁହାଯାଇଛି, ଭାରତର ଭାଜପା ସରକାର ଧାର୍ମିକ ସଂଖ୍ୟାଲଘୁ, ବିଶେଷକରି ମୁସଲମାନମାନଙ୍କ ପ୍ରତି ଭେଦଭାବ ପ୍ରଦର୍ଶନ କରୁଛି। ଭାରତ ସରକାର କ୍ରମାଗତ ଭାବରେ ଏକଛତ୍ରବାଦୀ ହେବାରେ ଲାଗିଛି। ତେଣୁ, ଯଦି ମୋତେ ଭାରତକୁ ହସ୍ତାନ୍ତର କରାଯାଏ, ତେବେ ସେଠାରେ ମୋତେ ନିର୍ଯାତନା ଦିଆଯିବ।
ସୂଚନାଯୋଗ୍ୟ, ଗତ ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ଗସ୍ତରେ ଯାଇଥିବାବେଳେ ରାଣାଙ୍କୁ ଖୁବ୍ଶୀଘ୍ର ଭାରତ ପ୍ରତ୍ୟର୍ପଣ କରାଯିବ ବୋଲି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଘୋଷଣା କରିଥିଲେ। ଟ୍ରମ୍ପ୍ଙ୍କ ଅନୁମୋଦନ ପୂର୍ବରୁ ଆମେରିକା ସୁପ୍ରିମକୋର୍ଟ ଗତ ଜାନୁଆରୀ ୨୧ରେ ରାଣାଙ୍କ ଆବେଦନକୁ ଖାରଜ କରିଦେଇଥିଲେ। ଫଳରେ ତାଙ୍କର ଭାରତ ପ୍ରତ୍ୟର୍ପଣ ରାସ୍ତା ସଫା ହୋଇଯାଇଥିଲା।
୨୦୦୮ ନଭେମ୍ବର ୨୬ରେ ପାକିସ୍ତାନୀ ଆତଙ୍କବାଦୀ ସଂଗଠନ ଲଶ୍କର-ଇ-ତୋଇବା ମୁମ୍ବାଇରେ ଆକ୍ରମଣ କରିଥିଲା। ଏହି ଆକ୍ରମଣରେ ୧୭୪ ଜଣଙ୍କ ଜୀବନ ଯିବା ସହ ଅନେକେ ଆହତ ହୋଇଥିଲେ। ପାକିସ୍ତାନୀ ବଂଶୋଦ୍ଭବ କାନାଡୀୟ ନାଗରିକ ରାଣା ଏହି ଆକ୍ରମଣରେ ସମ୍ପୃକ୍ତ ଥିବା ନେଇ ଭାରତରେ ଅଭିଯୁକ୍ତ ହୋଇଥିଲେ। ଲଶ୍କର ସଂଗଠନକୁ ସହାୟତା ଯୋଗାଇବା ମାମଲାରେ ସେ ଆମେରିକାରେ ଦୋଷୀସାବ୍ୟସ୍ତ ହୋଇଥିଲେ। ଭାରତରେ ତାଙ୍କର ବିଚାର ନିମନ୍ତେ ନୂଆଦିଲ୍ଲୀ ଦୀର୍ଘବର୍ଷ ହେଲା ତାଙ୍କ ପ୍ରତ୍ୟର୍ପଣ ପାଇଁ ଆମେରିକା କର୍ତ୍ତୃପକ୍ଷଙ୍କ ନିକଟରେ ଆବେଦନ କରିଆସିଛି। ୨୬/୧୧ ଆକ୍ରମଣ ପାଇଁ ରାଣା ତାଙ୍କ ସହଯୋଗୀ ଲଶ୍କର ସଂଗଠନ ସହ ସମ୍ପୃକ୍ତ ଆମେରିକୀୟ ଡାଭିଡ୍ କଲେମାନ୍ ହେଡ୍ଲିଙ୍କୁ ସହାୟତା କରିଥିଲେ। ଆମେରିକା କର୍ତ୍ତୃପକ୍ଷ ୨୦୦୯ରେ ହେଡ୍ଲିଙ୍କୁ ଗିରଫ କରିଥିଲେ।
