ଭୁବନେଶ୍ୱର,୧୪ା୧: ସୋମବାର ପଶ୍ଚିମବଙ୍ଗର ଭାଇରସ୍ ରିସର୍ଚ୍ଚ ଆଣ୍ଡ ଡାଇଗ୍ନୋଷ୍ଟିକ ଲାବୋରେଟୋରୀରେ ନିପା ଭାଇରସ୍ ଚିହ୍ନଟ ହେବା ପରେ ଏବେ ଓଡ଼ିଶାକୁ ଭୟ ଘାରିଛି।
ନିପା ଭାଇରସ ଏମିତି ଏକ ରୋଗ ଯାହା ଘୁଷୁରି ଏବଂ ବାଦୁଡ଼ି ଭଳି ପ୍ରାଣୀଠାରୁ ମଣିଷ ଶରୀରକୁ ସ୍ଥାନାନ୍ତରିତ ହୁଏ। ପରେ ଏହି ଭାଇରସ୍ ମଣିଷଠାରୁ ମଣିଷକୁ ମଧ୍ୟ ସଂକ୍ରମଣ ହୋଇଥାଏ। ଏହା ରୋଗୀଙ୍କ ମଧ୍ୟରେ ଜ୍ୱର ଏବଂ ଥଣ୍ଡା ଭଳି ଲକ୍ଷଣ ସୃଷ୍ଟି କରେ। ଏହି ସଂକ୍ରମଣ ଏନ୍ସେଫାଲାଇଟିସ ମଧ୍ୟ ସୃଷ୍ଟି କରିପାରେ, ଯାହା କୋମା ଏବଂ କିଛି କ୍ଷେତ୍ରରେ ମାୟୋକାର୍ଡାଇଟିସ ପରି ରୋଗ ଦେଖାଦିଏ।
ରିପୋର୍ଟରୁ ପ୍ରକାଶ ଯେ, ପଶ୍ଚିମବଙ୍ଗର ଦୁଇ ସ୍ବାସ୍ଥ୍ୟକର୍ମୀ ଜଣେ ପୁରୁଷ ଏବଂ ଜଣେ ମହିଳା, ଉତ୍ତର ୨୪ ପ୍ରଗଣା ଜିଲାର ବାରାସତର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି।
ଅସୁସ୍ଥ ହେବା ପୂର୍ବରୁ ସେମାନେ ଡିସେମ୍ବରରେ ପୂର୍ବ ମେଦିନୀପୁର ଏବଂ ପୂର୍ବ ବର୍ଦ୍ଧମାନରେ ନିଜ ଘରକୁ ଯାଇଥିଲେ। ସେମାନଙ୍କର ରାଜ୍ୟ ବାହାରକୁ ଯାତ୍ରା କରିବାର କୌଣସି ହିଷ୍ଟ୍ରି ନାହିଁ।
