ଦେବଗଡ଼,ରିଆମାଳ,୨୨ା୩( ଶଶାଙ୍କ ଶେଖର ଝାଙ୍କର/ନିରଞ୍ଜନ ବେହେରା):କୁକୁଡା ଫାର୍ମ ପାଇଁ ବିଦ୍ୟୁତ୍ ସଂଯୋଗ ଓ ସବ୍ସିଡି ପ୍ରଦାନ ପାଇଁ ଜଣେ ଚାଷୀଙ୍କଠାରୁ ୫ହଜାର ଟଙ୍କା ଲାଞ୍ଚ ନେଉଥିବା ବେଳେ ଦେବଗଡ଼ ଜିଲା ରିଆମାଳ ସଦର ମହକୁମା ପ୍ରାଣୀଧନ ଚିକିତ୍ସାଳୟର ଚିକିତ୍ସାଧିକାରୀ ଡା. ସୁସ୍ମିତା ସେଠୀ ଭିଜିଲାନ୍ସ ହାତରେ ଧରା ପଡିଛନ୍ତି। ଏକ ମାମଲା( ୫/୨୪)ରୁଜୁ କରି ବିଭାଗ ଅଧିକ ତଦନ୍ତ କରୁଛି । ମିଳିଥିବା ସୂଚନା ଅନୁଯାୟୀ, ନାଉଲିପଡା ପଞ୍ଚାୟତ ତେଲିମୁଣ୍ଡାର ସଚ୍ଚିଦାନନ୍ଦ ସାହୁ ନିଜର କୁକୁଡା ଫାର୍ମ ପାଇଁ ବିଦ୍ୟୁତ୍ ସଂଯୋଗ ଓ ସବ୍ସିଡି ପାଇଁ ଡା. ସେଠୀଙ୍କୁ କିଛି ଦିନ ତଳେ ଯୋଗାଯୋଗ କରିଥିଲେ। ସମସ୍ତ କାମ କରିବା ପାଇଁ ଡା. ସେଠୀ ତାଙ୍କଠାରୁ ୫ ହଜାର ଟଙ୍କା ଦାବି କରିଥିଲେ। ହେଲେ ସେ ୫ ହଜାର ଟଙ୍କା ଦେଇ ପାରିବେ ନାହିଁ ବୋଲି କହିଥିଲେ। ଏନେଇ ସେ ରାଉରକେଲା ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ପୂର୍ବ ଯୋଜନା ମୁତାବକ ସଚ୍ଚିଦାନନ୍ଦ ଗୁରୁବାର ଡା. ସେଠୀଙ୍କୁ ଅଫିସରେ ୫ ହଜାର ଟଙ୍କା ଦେବା ବେଳେ ସେଠାରେ ଛକି ରହିଥିବା ଭିଜିଲାନ୍ସ ଟିମ୍ ତାଙ୍କୁ କାବୁ କରି ନେଇଥିଲେ। ତାଙ୍କଠାରୁ ଲାଞ୍ଚ ନେଉଥିବା ୧୦ଟି ୫ ଶହ ଟଙ୍କିଆ ନୋଟ ଜବତ କରାଯାଇଛି। ପରେ ଭିଜିଲାନ୍ସ ଟିମ୍ ଗିରଫ ଡା. ସେଠୀଙ୍କୁ ଦେବଗଡ ନେଇଯାଇଛି। ଦେବଗଡ ଭିଜିଲାନ୍ସ ଡିଏସପି ଯୋଗେଶ ପଟେଲଙ୍କ ନେତୃତ୍ୱରେ ହୋଇଥିବା ଏହି ଚଢଉରେ ଝାରସୁଗୁଡା ଭିଜିଲାନ୍ସ ଇନ୍ସପେକ୍ଟର ସସ୍ମିତା ରଙ୍ଗୋଲୀଙ୍କ ସମେତ ବହୁ ଅଧିକାରୀ ସାମିଲ ଥିଲେ ।
