ବ୍ରହ୍ମପୁର,୧ା୨(ଅଶୋକ କୁମାର ସାହୁ):ଗତ ୩ ମାସ ହେଲା ସାମୁଦ୍ରିକ କଇଁଛ ଅଲିଭ ରିଡ୍ଲେଙ୍କ ସମୁଦ୍ରରେ ମିଳନ ପ୍ରକ୍ରିୟା ଚାଲିଥିଲା। ମିଳନ ପ୍ରକ୍ରିୟା ସରିଥିବା ଶୁକ୍ରବାର ସ୍ପଷ୍ଟ ହୋଇଛି। କାରଣ ମାଈ କଇଁଛମାନେ ଭାସମାନ ଅବସ୍ଥାକୁ ଆସିଯାଇଥିବା ଋଷିକୁଲ୍ୟା କଇଁଛ ସୁରକ୍ଷା ସମିତିର ସମ୍ପାଦକ ରବିନ୍ଦ୍ର ନାଥ ସାହୁ କହିଛନ୍ତି। ତାଙ୍କ କହିବା କଥା ହେଲା ଋଷିକୁଲ୍ୟା ମୁହାଣ ଅଲିଭ ରିଡ୍ଲେମାନେ ଅଣ୍ଡା ଦେବା ପାଇଁ ପ୍ରକୃଷ୍ଠ ସ୍ଥଳ। ବିସ୍ତୀର୍ଣ୍ଣ ସମୁଦ୍ର ବେଳାଭୂମିରେ ସେମାନେ ଦଳ ଦଳ ହୋଇ ଗଣ ଅଣ୍ଡାଦାନ କରିବାକୁ ଏହି ସମୟରେ ଆସନ୍ତି। ଏଥିପାଇଁ ବନ ବିଭାଗ ଓ ବିଭିନ୍ନ ସ୍ବେଚ୍ଛାସେବୀ ଅନୁଷ୍ଠାନ ପକ୍ଷରୁ ସମସ୍ତ ପ୍ରକାର ସୁରକ୍ଷିତ ବ୍ୟବସ୍ଥା କରାଯାଇଛି। ବେଳାଭୂମିରେ ସାମୁଦ୍ରିକ ବାଡ ଦିଆଯାଇଛି। କୌଣସି ପ୍ରକାର ଜନ୍ତୁ ନ ଆସିବା ପାଇଁ ବ୍ୟବସ୍ଥା କରାଯାଇଛି। ଏଥି ସହିତ ବେଳାଭୂମିକୁ ସ୍ବଚ୍ଛ ରଖାଯାଇଛି। ବେଳାଭୂମିର ପ୍ରୟାଗୀଠାରୁ ଆର୍ଯ୍ୟପଲ୍ଲୀ ପର୍ଯ୍ୟନ୍ତ ଅଞ୍ଚଳରେ ସମୁଦ୍ର ଭିତରକୁ ୧୦ କିମି ପର୍ଯ୍ୟନ୍ତ ମାଛ ମାରିବାକୁ ମତ୍ସ୍ୟଜୀବୀମାନଙ୍କୁ ବାରଣ କରାଯାଇଛି। କଇଁଛମାନେ ପ୍ରାୟ ୧୦ କିମି ଅଞ୍ଚଳରେ ମିଳନରେ ମାତିଥିଲେ। ମିଳନ ସରିବା ପରେ ବର୍ତ୍ତମାନ ମାଈ କଇଁଚମାନଙ୍କଠାରୁ ଅଣ୍ଡିରା କଇଁଛ ଅଲଗା ହୋଇଯାଇଛନ୍ତି। ମକର ସଂକ୍ରାନ୍ତି ପରେ ସୂର୍ଯ୍ୟ ଉତ୍ତରାୟଣ ହେବେ। ଫଳରେ ଦକ୍ଷିଣା ବାୟୁ ପ୍ରବାହିତ ହେବା ପରେ ଗରମ ଅନୁଭୂତ ହେବ। ତେଣୁ ମାଈ କଇଁଚମାନେ ଉତ୍ତାପ ନେବା ପାଇଁ ସମୁଦ୍ର ଉପରକୁ ଆସିଯାଇଛନ୍ତି। ସୂର୍ଯ୍ୟଙ୍କଠାରୁ ଉତ୍ତାପ ନେବା ପରେ ସେମାନେ ଅଣ୍ଡା ଦେବାରେ ସହଜ ହେବ, ଯାହାକି ପ୍ରକୃତିର ନିୟମ ବୋଲି ସେ କହିଛନ୍ତି। ଶନିବାର ସମୁଦ୍ର ବେଳାଭୂମି ସଫେଇ ହେବା ଯୋଜନା କରାଯାଇଛି ବୋଲି ସେ କହିଛନ୍ତି।
