କେସିଙ୍ଗା,୫ା୮(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ମିଳିତ ଶିକ୍ଷକ ସଙ୍ଘ ପକ୍ଷରୁ ୪ ଦଫା ଦାବି ନେଇ ଏକ ବିରାଟ ପଦଯାତ୍ରା ଶନିବାର ଅନୁଷ୍ଠିତ ହୋଇଥିଲା। କେସିଙ୍ଗା ଗୋଷ୍ଠୀ ଶିକ୍ଷାଧିକାରୀଙ୍କ ମାଧ୍ୟମରେ ନିଖିଳ ଉତ୍କଳ ପ୍ରାଥମିକ ଶିକ୍ଷକ ଫେଡେରେଶନର ସଂଘ ସଭାପତି ସୁରେନ୍ଦ୍ର କୁମାର ଦୋରା, ଜିଲା ଉପ ସଭାପତି ସୁବାସ ପୁରୋହିତଙ୍କ ନେତୃତ୍ୱରେ କେସିଙ୍ଗା ବ୍ଲକର ସମସ୍ତ ବର୍ଗର ସହ ସହ ଶିକ୍ଷୟିତ୍ରୀ/ଶିକ୍ଷକ ମିଳିତ ହୋଇ ଶାନ୍ତିପୂର୍ଣ୍ଣ ଭାବେ ଏକ ବିରାଟ ପଦଯାତ୍ରା ବାହାରି ଗୋଷ୍ଠୀ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଯାଇଥିଲେ। ସେଠାରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରିଣୀ ନଳିମା ପ୍ରଭା ଦେଇଙ୍କୁ ୪ଦଫା ସମ୍ବଳିତ ଏକ ଦାବିପତ୍ର ପ୍ରଦାନ କରିଥିଲେ। ଏହି ଦାବିଗୁଡ଼ିକ ମଧ୍ୟରେ ପ୍ରାଥମିକ କନିଷ୍ଠ ଶିକ୍ଷକଙ୍କ ଠିକା ନିଯୁକ୍ତି ପ୍ରଥା ଉଚ୍ଛେଦ, ଶିକ୍ଷା ସହାୟକମାନଙ୍କ ଛଅ ବର୍ଷକୁ ମୂଳ ଚାକିରିରେ ଗଣନା ସହ ୬ଟି ନ୍ୟାଶନାଲ ଇନ୍କ୍ରିମେଣ୍ଟ ପ୍ରଦାନ,ଏକ୍ସ କ୍ୟାଡର ଶିକ୍ଷକଙ୍କୁ ଉଚ୍ଛେଦ,କଳା ଓ କ୍ରୀଡ଼ା ଶିକ୍ଷକମାନଙ୍କୁ ନିୟମିତ କରିବା, ଦିତୀୟ ଦାବି ଭାବେ ଅବିକଳ କେନ୍ଦ୍ରୀୟ ହାର ସହ ଲେବଲ ୯ ଅନୁସାରେ ଦରମା ପ୍ରଦାନ,ତୃତୀୟ ଦାବି ଭାବେ ପୁରୁଣା ପେନ୍ସନ୍ ପୁନଃ ପ୍ରଚଳନ ପାଇଁ ମାନ୍ୟବର ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯାଇଥିଲା। ଏହି ଶାନ୍ତିପୂର୍ଣ୍ଣ ପଦଯାତ୍ରାରେ ମମତା ପଟ୍ଟନାୟକ, ସୁଦେଶ୍ନା ପାଇକରାୟ, କୈଳାସ ବିଶି, ସୁରେନ୍ଦ୍ର ପ୍ରଧାନ, କ୍ଷୀରାବ୍ଧି ମେହେର ପ୍ରମୁଖ ସାମିଲ ଥିଲେ। ଆସନ୍ତା ୧୫ ତାରିଖ ସୁଦ୍ଧା ରାଜ୍ୟ ସରକାର ନିଷ୍ପତ୍ତି ନ ନିଅନ୍ତି ତେବେ ଅଗଷ୍ଟ ୧୬ରୁ ବିଦ୍ୟାଳୟରେ ତାଲାପଡ଼ିବା ସହ ରାଜ୍ୟ ସଂଘକୁ ସମ୍ପୂର୍ଣ୍ଣ ସହଯୋଗ କରିବେ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଛି।
