”ବିଦେଶୀ ଟିକାର ସଂରକ୍ଷଣ ବ୍ୟବସ୍ଥା ଭାରତରେ ଅନୁକୂଳ ନୁହେଁ। ଏହା ବିଯୁକ୍ତ ୮୦ ଡିଗ୍ରୀ (-୭୦ରୁ-୮୦) ସେଲସିୟସ ଉତ୍ତାପରେ ସୁରକ୍ଷିତ ରହିଥାଏ। ଏହାକୁ କୋଲ୍ଡ ଚେନ୍ ବ୍ୟବସ୍ଥା କୁହାଯାଏ। ଏହି ବ୍ୟବସ୍ଥା ବିଶ୍ୱର କୌଣସି ଦେଶରେ ଉପଲବ୍ଧ ନୁହେଁ। ତେଣୁ ଟିକାର ୯୦ ପ୍ରତିଶତ ସଫଳତା ଥିଲେ ମଧ୍ୟ ସଂରକ୍ଷଣ ଅଭାବରୁ ସେଗୁଡିକ ଅକାମୀ ହୋଇଯିବ।“
କରୋନା ସଂକ୍ରମଣ ପ୍ରତିରୋଧ ପାଇଁ ସମ୍ପୂର୍ଣ୍ଣ ବିଶ୍ୱ ଉଦବିଘ୍ନ। ଅନେକ ଔଷଧ କମ୍ପାନୀ ଏଗାରରୁ ଅଧିକ ପ୍ରକାର ଟିକା ପ୍ରସ୍ତୁତ କରିବା ପାଇଁ ଉଦ୍ୟମ କରୁଛନ୍ତି। ଫାଇବର ଔଷଧ କମ୍ପାନୀ ଟିକା ତିଆରି କରିସାରଛି ଏବଂ ଏହା ୯୦ ପ୍ରତିଶତରୁ ଅଧିକ ଫଳପ୍ରଦ ବୋଲି ଦାବି କରୁଛି। ରୁଷର ଟିକା ସ୍ପୁଟନିକ୍ର ଏବେ ଭାରତରେ ଡକ୍ଟର ରେଡିଜ୍ ଲାବରେଟୋରିରେ ପରୀକ୍ଷା ଆରମ୍ଭ ହେବ। ଏଥିପାଇଁ ପ୍ରାୟ ୧୮୦ ଜଣ ସ୍ବେଚ୍ଛାସେବୀ ପଞ୍ଜୀକରଣ କରିଛନ୍ତି। ଟିକା ପ୍ରୟୋଗର ମାତ୍ରା ନିର୍ଣ୍ଣୟ ଏହି ଗବେଷଣାର ଲକ୍ଷ୍ୟ। ଗୋଟିଏ ଡୋଜ୍ ଟିକା ଦିଆଯିବା ପରେ ସଂପୃକ୍ତ ସ୍ବେଚ୍ଛାସେବୀଙ୍କ ଅବସ୍ଥା ଅନୁଧ୍ୟାନ କରାଯିବା ପରେ ଅଧିକ ଡୋଜ୍ ନେବାର ଆବଶ୍ୟକତା ସ୍ଥିର ହେବ। ସବୁ ତଥ୍ୟକୁ ବିଶ୍ଳେଷଣ କରି ଟିକାର ସଫଳତା ନିର୍ଣ୍ଣୟ ହେବ। ତିନି ସପ୍ତାହ ବ୍ୟବଧାନରେ ଦୁଇ ଥର କିମ୍ବା ତିନି ଥର ଟିକା ଦିଆଯିବ। ସାତ ମାସ ପର୍ଯ୍ୟନ୍ତ ସ୍ବେଚ୍ଛାସେବୀଙ୍କ ଶରୀରରେ ଏହାର ପ୍ରଭାବ ଅନୁଧ୍ୟାନ କରାଯିବ। ତେଣୁ ଏକ ବର୍ଷ ପୂର୍ବରୁ ସର୍ବସାଧାରଣରେ ଟିକା ଉପଲବ୍ଧ ସମ୍ଭବ ନୁହେଁ।
ସ୍ପୁଟିନିକ ଟିକାର ପରୀକ୍ଷଣ ସମ୍ପୂର୍ଣ୍ଣ ହେବା ପାଇଁ ଛଅ ମାସ ସମୟ ଲାଗିବ। ଜୈବ ଗବେଷଣା ସମୟ ସାପେକ୍ଷ। ତରବରିଆ ଭାବରେ କଲେ ବିଷମୟ ପରିସ୍ଥିିତି ସୃଷ୍ଟି ହୋଇପାରେ। ବିଦେଶୀ ଟିକାର ସଂରକ୍ଷଣ ବ୍ୟବସ୍ଥା ଭାରତରେ ଅନୁକୂଳ ନୁହେଁ। ଏହା ବିଯୁକ୍ତ ୮୦ ଡିଗ୍ରୀ (-୭୦ରୁ-୮୦) ସେଲସିୟସ ଉତ୍ତାପରେ ସୁରକ୍ଷିତ ରହିଥାଏ। ଏହାକୁ କୋଲ୍ଡ ଚେନ୍ ବ୍ୟବସ୍ଥା କୁହାଯାଏ। ଏହି ବ୍ୟବସ୍ଥା ବିଶ୍ୱର କୌଣସି ଦେଶରେ ଉପଲବ୍ଧ ନୁହେଁ। ତେଣୁ ଟିକାର ୯୦ ପ୍ରତିଶତ ସଫଳତା ଥିଲେ ମଧ୍ୟ ସଂରକ୍ଷଣ ଅଭାବରୁ ସେଗୁଡିକ ଅକାମୀ ହୋଇଯିବ। ଟିକାକରଣ ପାଇଁ ଭାରତରେ ଗୋଟିଏ ସହରରୁ ଅନ୍ୟ ସହରକୁ କିମ୍ବା ଗ୍ରାମାଞ୍ଚଳକୁ ପଠାଇବା ବ୍ୟବସ୍ଥା ନାହିଁ। ଭାରତ ଗୋଟିଏ ଗ୍ରୀଷ୍ମମଣ୍ଡଳୀୟ ଦେଶ। ବର୍ଷର ଅନେକ ସମୟରେ ବାୟୁମଣ୍ଡଳର ଉତ୍ତାପ ୩୦ ଡିଗ୍ରୀ ସେଲସିୟସରୁ ଅଧିକ। ସବୁବେଳେ ବିଜୁଳି ସଙ୍କଟ ଲାଗିରହେ। ପରିବହନ ବ୍ୟବସ୍ଥା ମୁଖ୍ୟ ପ୍ରତିବନ୍ଧକ। ଭାରତରେ ପ୍ରସ୍ତୁତ ଟିକା ବିଯୁକ୍ତ ୨ରୁ ବିଯୁକ୍ତ ୮ ଡିଗ୍ରୀ ସେଲସିୟସ ମଧ୍ୟରେ ସଂରକ୍ଷଣ ହୋଇପାରିବ ବୋଲି ଦାବି ହେଉଛି। ଏହା ପ୍ରମାଣ ସାପେକ୍ଷ। ବିଦେଶ ତିଆରି ଟିକା ବହୁ କମ୍ ଉତ୍ତାପରେ ସଂରକ୍ଷଣ ହେଉଥିବାରୁ ଭାରତରେ ପ୍ରସ୍ତୁତ ଟିକା ଅଧିକ ଉତ୍ତାପରେ ରଖିଲେ କିପରି ସଫଳ ହେବ ତାହା ପ୍ରଣିଧାନ ବିଷୟ। କରୋନା ଭୂତାଣୁର ସ୍ପାଇକ୍ ପ୍ରୋଟିନ୍ ଟିକା ଅଧିକ ପରିମାଣରେ ପ୍ରତିପିଣ୍ଡ ତିଆରି କରିବାରେ ସକ୍ଷମ। ପ୍ରତିବଦଳରେ ଆଡେନ୍ ଭାଇରସ ଟିକା ଶରୀରରେ ଉପଯୁକ୍ତ ଆଣ୍ଟିବଡି ସୃଷ୍ଟି କରିପାରିବ ନାହିଁ। କୋଭିଡ୍-୧୯ର ଫଳପ୍ରଦ ଟିକା ଉଦ୍ଭାବନ ସମୟ ହିଁ କହିବ।
ଡା. ଦ୍ୱିଜେଶ କୁମାର ପଣ୍ଡା
-ନିଦାନ ଓ ସୂକ୍ଷ୍ମ ଜୀବ ବିଶେଷଜ୍ଞ,
ଆଚାର୍ଯ୍ୟ ବିହାର,
ଭୁବନେଶ୍ୱର, ମୋ : ୯୪୩୮୪୭୦୭୭୭