ବଡ଼ବିଲ,୧୧।୯(ଦେବପ୍ରିୟ ରଣା): ଦୀପତଳ ଅନ୍ଧାର ଭଳି ଖଣିଜ ସମ୍ପଦରେ ଭରପୂର ଗାଁ ଅବହେଳିତ ଅବସ୍ଥାରେ। ଏକାଧିକ ଖଣି କମ୍ପାନୀର ଧୂଳିଧୂଆଁରେ ଜର୍ଜରିତ ହେଉଥିବା ଉକ୍ତ ଗ୍ରାମର ୨ ସାହି ବାସିନ୍ଦାଙ୍କ ନିକଟରେ ସରକାରୀ ଯୋଜନା ଅପହଞ୍ଚ ହୋଇଯାଇଛି। ଗ୍ରାମକୁ ପକ୍କାରାସ୍ତାଟିଏ ନ ଥିବା ବେଳେ ଦୈନିକ ପାନୀୟ ଜଳ ପାଇଁ ସଂଘର୍ଷ ଜାରି ରଖିଛନ୍ତି। ଗ୍ରାମରେ ପାନୀୟ ଜଳ ପାଇଁ ଗଭୀର ନଳକୂପ, ସୌରଚାଳିତ ପମ୍ପ, ପାଣିଟାଙ୍କି ଅଛି, ହେଲେ କାର୍ଯ୍ୟକ୍ଷମ ହୋଇପାରୁ ନ ଥିବାରୁ ଗ୍ରାମବାସୀଙ୍କ କାର୍ଯ୍ୟରେ ଲାଗିପାରୁନି ।
କେନ୍ଦୁଝର ଜିଲା ବଡ଼ବିଲ ତହସିଲ ତଥା ଯୋଡ଼ା ବ୍ଲକ୍ ଭଦ୍ରାସାହି ପଞ୍ଚାୟତରେ ରହିଛି କାଶିଆ ‘ଖ’ ଗ୍ରାମ। ଖଣି ଘେରା ଉକ୍ତ ଗାଁରେ ବୁରୁ ହଟିଂ ଓ କୁଦୁରବେଡ଼ା ୨ଟି ସାହି ରହିଛି। ଦୁଇ ସାହିରେ ୮୦ରୁ ଊର୍ଦ୍ଧ୍ୱ ଆଦିବାସୀ ପରିବାର ରହୁଥିବାବେଳେ ଜନସଂଖ୍ୟା ପ୍ରାୟ ୪ଶହ ପାଖାପାଖି ହେବ। ଗ୍ରାମବାସୀଙ୍କ ମଧ୍ୟରୁ ଅନେକ ଚାଷ କରିବା ସହ ଦିନମଜୁରିଆ ଭାବେ ଜୀବନ ଅତିବାହିତ କରନ୍ତି। ଗ୍ରାମକୁ ଆଜି ପର୍ଯ୍ୟନ୍ତ ଭଲ ରାସ୍ତା ନାହିଁ। ଜଳ ସଙ୍କଟ ଦୂର କରିବାକୁ ଜିଲା ଖଣିଜ ପ୍ରତିଷ୍ଠାନ ପକ୍ଷରୁ ସୌରଚାଳିତ ଗଭୀର ନଳକୂପ ଖନନ କରାଯାଇଛି। ଅଧାଦିନ ଖରାପ ରହୁଥିବା ବେଳେ ଆକାଶ ସାମାନ୍ୟ ମେଘାଚ୍ଛନ୍ନ ହେଲେ ନଳକୂପ କାର୍ଯ୍ୟ କରୁନାହିଁ। ଗ୍ରାମରେ ଥିବା ନଳକୂପ ଅଚଳ ହୋଇପଡ଼ିଛି। ଜିଲା ଖଣିଜ ପ୍ରତିଷ୍ଠାନ ଦ୍ୱାରା ମେଗା ପାନୀୟ ଜଳ ଯୋଗାଣ ଯୋଜନାରେ ଏକ ଉଚ୍ଚ କ୍ଷମତାସମ୍ପନ୍ନ ପାଣିଟାଙ୍କିର ନିର୍ମାଣ କାର୍ଯ୍ୟ ଅଧାପନ୍ତରିଆ ହୋଇ ପଡ଼ିରହିଛି। ପ୍ରତି ଘରକୁ ପାଣି ପାଇପ୍ ସଂଯୋଗ ହୋଇଛି, ହେଲେ ଏବେ ସୁଦ୍ଧା କାହାରି ଘରେ ବୁନ୍ଦାଏ ପାଣି ପହଞ୍ଚତ୍ ପାରିନାହିଁ। ଫଳରେ ବାଧ୍ୟ ହୋଇ ଗ୍ରାମଠାରୁ ଦୂରରେ ଥିବା ଏକ କୂଅରୁ ପାଣି କାଢ଼ି ଯୁବତୀ ଓ ମହିଳାମାନେ ମୁଣ୍ଡରେ ପାଣିହାଣ୍ଡି ବୋହି ଆଣିଥାନ୍ତି। ସରକାରୀ ଅଧିକାରୀମାନେ କାଗଜକଲମରେ ସୁବିଧା ସୁଯୋଗ ଯୋଗାଇ ଦେଇ ନିଶ୍ଚିନ୍ତ ହୋଇ ଯାଉଥିବାବେଳେ ଏଠାକାର କେତେଜଣ ଲୋକପ୍ରତିନିଧି ଖଣିଜ ବ୍ୟବସାୟରେ ଉବୁଟୁବୁ ହୋଇ ରହୁଥିବା ଅଭିଯୋଗ ହେଉଛି। ତୁରନ୍ତ ସମସ୍ୟା ସମାଧାନ କରିବାକୁ ଦାବି ହୋଇଛି।
