ଭୁବନେଶ୍ୱର,୨୯ା୩(ବ୍ୟୁରୋ):ଓଡ଼ିଶାରେ ଚାଷୀଙ୍କ ବାର୍ଷିକ ଆୟ ୫,୨୭୪ରୁ ୫,୧୧୨ ଟଙ୍କାକୁ ଖସି ଯାଇଛି। ତେବେ ମାସକୁ କେତେ ପଡ଼ିଲା। ଏହା ହାସ୍ୟାସ୍ପଦ ଓ ଦୁର୍ଭାଗ୍ୟଜନକ। ରାଜ୍ୟ ସରକାର କୃଷି ଉତ୍ପାଦନ ପାଇଁ କେନ୍ଦ୍ରଠାରୁ ପୁରସ୍କାର ପାଉଛନ୍ତି ବୋଲି କହୁଛନ୍ତି। ସ୍କୁଲରେ ଶିକ୍ଷକମାନେ ସମ୍ମାନିତ ହେଉଛନ୍ତି। ମାତ୍ର ଫଳ ଶୂନ। ଧାନର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ୨,୯୩୦ ଟଙ୍କା କରିବାକୁ ବିଧାନସଭାରେ ସର୍ବସମ୍ମତିକ୍ରମେ ସଙ୍କଳ୍ପ ପାରିତ ହୋଇଥିଲା। ବାସସ୍ପତିଙ୍କ ଅଧ୍ୟକ୍ଷତାରେ କମିଟି ଗଠନ ହେଲା। ପ୍ରଧାନମନ୍ତ୍ରୀ ସାକ୍ଷାତ୍ କରିବାକୁ ସମୟ ଦେଲେ ନାହିଁ କିମ୍ବା ବାଚସ୍ପତିଙ୍କ ଚିଠିର ଉତ୍ତର ଦେଲେ ନାହିଁ। ଚାଷୀ ବିରୋଧୀ କେନ୍ଦ୍ର ସରକାରଙ୍କୁ ନବୀନବାବୁ ସମର୍ଥନ ଦେଇ ଚାଲିଛନ୍ତି। ରାଜ୍ୟରେ ଗୋଟିଏ କୁଇଣ୍ଟାଲ ଧାନ ଉତ୍ପାଦନ ପାଇଁ ଚାଷୀଙ୍କୁ ୨,୩୪୪ ଟଙ୍କା ଖର୍ଚ୍ଚ କରିବାକୁ ପଡୁଛି। କେନ୍ଦ୍ର ସରକାର ମାତ୍ର ୧୯୪୦ ଟଙ୍କା ଏମ୍ଏସ୍ପି ଦେଉଛନ୍ତି। ରାଜ୍ୟ ସରକାର ୨୦୧୪ରେ କେବିକେରେ ଦ୍ୱିତୀୟ କୃଷି ବିଶ୍ୱବିଦ୍ୟାଳୟ କରିବାକୁ ଘୋଷଣା କରିଥିଲେ। ଏପର୍ଯ୍ୟନ୍ତ ହେଲାଣି କି। ସେ ବିଷୟରେ ରାଜ୍ୟପାଳଙ୍କ ମୁହଁରେ କିଛି କୁହାଇଲେ ନାହିଁ। ଚାଷୀଙ୍କୁ ମାଗଣା ବିଜୁଳି ଦେବା କଥା କହିଥିଲେ। ତାହା ଦେଲେ କି ବୋଲି ନରସିଂହ ପ୍ରଶ୍ନ କରିଛନ୍ତି। ସରକାର କେବଳ ରାଜ୍ୟପାଳଙ୍କ ମୁହଁରେ ବିକାଶର ଗୋଲାପୀ ଚିତ୍ର ଆଙ୍କି ରାଜ୍ୟବାସୀଙ୍କୁ ଭ୍ରମିତ କରୁଛନ୍ତି। ରାଜ୍ୟରେ ଜଙ୍ଗଲୀ ଶାସନ ଚାଲିଛି। ପଞ୍ଚାୟତ ନିର୍ବାଚନରେ ତାହା ଦେଖିବାକୁ ମିଳିଲା। ଗୁଣ୍ଡା ଧରି ଶାସକ ଦଳ ଭୋଟ ହାତେଇଛନ୍ତି। ରାଜ୍ୟରେ ନାରୀ ନିର୍ଯାତନା ବଢ଼ିଚାଲିଛି। ତଥାପି ସବୁ ଠିକ୍ ଅଛି ବୋଲି ରାଜ୍ୟ ସରକାର କହୁଛନ୍ତି। ଏହା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ନରସିଂହ କହିଛନ୍ତି।
