ଭୁବନେଶ୍ୱର,୭।୧୧(ବ୍ୟୁରୋ):ସ୍ମାର୍ଟସିଟି ଭୁବନେଶ୍ୱରକୁ ଆହୁରି ସୁନ୍ଦର କରିବା ପାଇଁ ଓଭରବ୍ରିଜ କାନ୍ଥ, ବିଭିନ୍ନ କାର୍ଯ୍ୟାଳୟ ଓ ଆବାସିକ ଗୃହର ବଡ଼ ବଡ଼ କାନ୍ଥକୁ ଚିତ୍ରିତ କରାଯାଉଛି। ତେବେ ଏହି କାର୍ଯ୍ୟକ୍ରମକୁ ତ୍ୱରାନ୍ବିତ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଏମସି ଓ ବିଡିଏ ସହଯୋଗରେ ‘ମୋ ଭୁବନେଶ୍ୱର ଆର୍ଟ’ ଅଭିଯାନ ଅଧୀନରେ ରାଜଧାନୀବାସୀଙ୍କ ମତ ଲୋଡ଼ାଯାଇଛି। ସହରର ସମସ୍ତ ବଡ଼ ବଡ଼ କାନ୍ଥକୁ ଚିତ୍ରିତ କରିବା ପାଇଁ ପ୍ରୟାସ କରାଯାଉଛି। କେଉଁ ବିଷୟବସ୍ତୁକୁ ନେଇ ଚିତ୍ର ଅଙ୍କନ କରାଯାଇପାରିବ ସେ ସେନେଇ ସୋସିଆଲ ମିଡ଼ିଆରେ ଏକ ସର୍ଭେ ଆରମ୍ଭ କରାଯାଇଛି। ନଭେମ୍ବର ୧୦ ମଧ୍ୟରେ ସହରବାସୀ ଏନେଇ ନିଜ ନିଜ ମତ ରଖିପାରିବେ। ତେବେ ସହରବାସୀ ବିଶେଷକରି ସ୍ବାସ୍ଥ୍ୟ ରକ୍ଷା, ପରିବେଶ ସୁରକ୍ଷା, ସଡ଼କ ସୁରକ୍ଷା, ଓଡ଼ିଶାର ଐତିହ୍ୟ, ସଂସ୍କୃତି ଓ ପରମ୍ପରା, ସ୍ବାଧୀନତା ସଂଗ୍ରାମୀଙ୍କ ବୀରତ୍ୱର ଗାଥା ଚିତ୍ରକଳା ମାଧ୍ୟମରେ ଦର୍ଶାଇବା ପାଇଁ ମତ ରଖୁଛନ୍ତି। ପୂର୍ବରୁ କଳିଙ୍ଗ ଷ୍ଟାଡିୟମରେ ହକି ବିଶ୍ୱକପ୍ ଅନୁଷ୍ଠିତ ହେବା ପୂର୍ବରୁ ସହରର ବିଭିନ୍ନ କାନ୍ଥକୁ ବିଶିଷ୍ଟ ଖେଳାଳିଙ୍କ ପ୍ରତିଛବିରେ ଚିତ୍ରିତ କରାଯାଇଥିଲା। ଏହା ସହରର ରାଜରାରାସ୍ତାକୁ ବେଶ୍ ଆକର୍ଷଣୀୟ କରିଥିଲା। ତେବେ କିଛିଦିନ ମଧ୍ୟରେ ବେଆଇନ ବିଜ୍ଞାପନ ପୋଷ୍ଟର ତଳେ ଏହିସବୁ ଚିତ୍ର ଲୁଚିଯାଇଥିଲା। ଏଥିସହ ସହର କାନ୍ଥ ମଧ୍ୟ ବିକୃତ ହୋଇଗଲା। ତେବେ ଏହାକୁ ନେଇ ରାଜଧାନୀବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ରାଜ୍ୟର ଅନେକ ପ୍ରତିଭାଙ୍କ ଚିତ୍ରିତ ହୋଇଥିବା କାନ୍ଥ ଅଳିଆ ଆବର୍ଜନାରେ ଘୋଡ଼ାଇଯିବା ଭଳି ଘଟଣାକୁ ସାଧାରଣରେ ନିନ୍ଦା କରାଯାଇଥିଲା। ସେହିପରି ପାନଛେପ ପକାଇ ନାଗରିକ ସୁନ୍ଦର ଚିତ୍ରିତ କାନ୍ଥକୁ ବିକୃତ ନ କରିବା ପାଇଁ ବିଏମସି ପକ୍ଷରୁ ବାରମ୍ବାର ଅପିଲ କରାଯାଉଛି।
