ନୂଆଦିଲ୍ଲୀ,୨୪।୬: ପଳାତକ ହୀରା ବ୍ୟବସାୟୀ ନୀରବ ମୋଦିଙ୍କୁ ଲଣ୍ଡନ ହାଇକୋର୍ଟରୁ ଏକ ବଡ଼ ଝଟକା ଲାଗିଛି। ଏକ ଋଣ ବିବାଦରେ ବ୍ୟାଙ୍କ ଅଫ ଇଣ୍ଡିଆ ସପକ୍ଷରେ ରାୟ ଦେଇ କୋର୍ଟ ନୀରବ ମୋଦିଙ୍କୁ ୧୦୦ କୋଟି (୧୦.୭ ନିୟୁତ ଡଲାର)ରୁ ଅଧିକ ରାଶି ବ୍ୟାଙ୍କକୁ ଫେରସ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ଏହାକୁ ବ୍ୟାଙ୍କ ଅଫ ଇଣ୍ଡିଆ ପାଇଁ ଏକ ଗୁରୁତ୍ୱପୂର୍ଣ୍ଣ ବିଜୟ ଭାବରେ ଦେଖାଯାଉଛି। ଏହି ପରିମାଣ ନୀରବ ମୋଦି ତାଙ୍କର ଏକ କମ୍ପାନୀ, ଫାୟାରଷ୍ଟାର ଡାଇମଣ୍ଡ ଦ୍ୱାରା ନିଆଯାଇଥିବା ଋଣ ପାଇଁ ପ୍ରଦାନ କରିଥିବା ବ୍ୟକ୍ତିଗତ ଗ୍ୟାରେଣ୍ଟି ସହିତ ଜଡିତ।
ବ୍ୟାଙ୍କ ଅଫ ଇଣ୍ଡିଆ ଏବଂ ପଳାତକ ବ୍ୟବସାୟୀ ନୀରବ ମୋଦିଙ୍କ ମଧ୍ୟରେ ବିବାଦ ଦୁବାଇସ୍ଥିତ ଏକ କମ୍ପାନୀ, ‘ଫାୟାରଷ୍ଟାର ଡାଇମଣ୍ଡ FZE’ କୁ ବ୍ୟାଙ୍କ ଦ୍ୱାରା ପ୍ରଦାନ କରାଯାଇଥିବା ଋଣ ସହିତ ଜଡିତ। ଏହା ନୀରବ ମୋଦିଙ୍କ ମାଲିକାନା। ବ୍ୟାଙ୍କ କହିଛି ଯେ, ଯେହେତୁ ନୀରବ ଋଣ ପାଇଁ ବ୍ୟକ୍ତିଗତ ଗ୍ୟାରେଣ୍ଟି ପ୍ରଦାନ କରିଥିଲେ, ତେଣୁ ସେ ବକେୟା ରାଶି ପରିଶୋଧ କରିବାକୁ ଦାୟୀ। ନୀରବ ମୋଦି ବ୍ରିଟିଶ କୋର୍ଟରେ ଏହି ଦାବିକୁ ଚ୍ୟାଲେଞ୍ଜ କରିଥିଲେ ଏବଂ ଏହି ମାମଲାକୁ ଲଢ଼ିବା ପାଇଁ ବ୍ୟକ୍ତିଗତ ଭାବରେ ଲଣ୍ଡନ କୋର୍ଟରେ ମଧ୍ୟ ହାଜର ହୋଇଥିଲେ।
ବ୍ୟାଙ୍କ ସପକ୍ଷରେ ରାୟ ଦେଇ ଲଣ୍ଡନ ହାଇକୋର୍ଟ ନୀରବ ମୋଦିଙ୍କୁ ପ୍ରାୟ ୧୦୦ କୋଟି (ଦେବାକୁ ନିର୍ଦ୍ଦେଶ ଦେଇଥିଲେ। ମାମଲାର ଶୁଣାଣି କରି କୋର୍ଟ କହିଥିଲେ, ବ୍ୟାଙ୍କ ଅଫ ଇଣ୍ଡିଆର ଦାବି ବୈଧ ଏବଂ ଆଇନଗତ ଭାବରେ ସଠିକ ଥିଲା, ପରବର୍ତ୍ତୀ ସମୟରେ ବ୍ୟାଙ୍କ ସପକ୍ଷରେ ରାୟ ପ୍ରଦାନ କରିଥିଲେ। ଏହାର ଅର୍ଥ ହେଉଛି ବ୍ୟାଙ୍କ ଏବେ ୟୁକେରେ ଉପଲବ୍ଧ ଆଇନଗତ ଉପାୟଗୁଡ଼ିକୁ ବ୍ୟବହାର କରି ତାର ପାଣ୍ଠି ପୁନରୁଦ୍ଧାର କରିପାରିବ।
ନୀରବ ମାର୍ଚ୍ଚ ୨୦୧୯ରେ ଲଣ୍ଡନରେ ଗିରଫ ହେବା ପରଠାରୁ ୟୁକେରେ ହେପାଜତରେ ଅଛନ୍ତି। ବର୍ଷ ବର୍ଷ ଧରି ବ୍ରିଟିଶ କୋର୍ଟ ତାଙ୍କ ଦ୍ୱାରା ଦାଖଲ କରାଯାଇଥିବା ଅନେକ ଜାମିନ ଆବେଦନକୁ ଖାରଜ କରିଛନ୍ତି। ପଳାତକ ବ୍ୟବସାୟୀ ପୂର୍ବରୁ ମାର୍ଚ୍ଚ ମାସରେ ଏକ ବଡ଼ ଝଟକା ପାଇଥିଲେ। ଲଣ୍ଡନ ହାଇକୋର୍ଟ ଭାରତକୁ ତାଙ୍କ ପ୍ରତ୍ୟର୍ପଣ ବିରୋଧରେ ପ୍ରକ୍ରିୟା ପୁନଃ ଖୋଲିବା ପାଇଁ ତାଙ୍କ ପ୍ରୟାସକୁ ଖାରଜ କରିଦେଇଥିଲେ।