ମୁମ୍ବାଇ: ଗତ ୧୦ ସେସନ ହେବ ଭଲ କାରବାର ହାସଲ କରିବା ପରେ ବମ୍ବେ ଷ୍ଟକ୍ ଏକ୍ସଚେଞ୍ଜ ବୁଧବାର ୨୬୪ ପଏଣ୍ଟ ଖସିଛି। ରିଲାଏନ୍ସ ଇଣ୍ଡଷ୍ଟ୍ରିଜ, ଆଇଟିସି ଏବଂ ଇନ୍ଫୋସିସ ଭଳି କମ୍ପାନୀଗୁଡିକର ଶେୟାର କାରବାର ପ୍ରଭାବିତ ହୋଇଛି। ଦିନ ମଧ୍ୟରେ ସେନ୍ସେକ୍ସ ୪୮,୬୧୬.୬୬ ପଏଣ୍ଟ ଛୁଇଁଥିଲା। ମାତ୍ର କାରବାର ଶେଷ ହେବା ବେଳକୁ ସେନ୍ସେକ୍ସରେ ୨୬୩.୭୨ ପଏଣ୍ଟ ହ୍ରାସ ପରିଲକ୍ଷିତ ହୋଇଛି। ଫଳରେ ଏହା ୦.୫୪% ନିମ୍ନରେ ରହି ୪୮,୧୭୪.୦୬ ପଏଣ୍ଟରେ ବନ୍ଦ ହୋଇଛି। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ ନିଫ୍ଟି କାରବାର ୫୩.୨୫ ପଏଣ୍ଟ(୦.୩୮%) ନିମ୍ନରେ ରହି ୧୪,୧୪୬.୨୫ ପଏଣ୍ଟରେ ବନ୍ଦ ହୋଇଛି। ଏହା ଦିନ ମଧ୍ୟରେ ରେକର୍ଡ ସ୍ତର ୧୪,୨୪୪ .୧୫ ପଏଣ୍ଟ ଛୁଇଁଥିଲା। ଆଇଟିସିର ଶେୟାର କାରବାର ୩% ଖସିଛି। ଏହାବାଦ ରିଲାଏନ୍ସ ଇଣ୍ଡଷ୍ଟ୍ରିଜ, ବଜାଜ ଫାଇନାନ୍ସ, ଆକ୍ସିସ ବ୍ୟାଙ୍କ, ହିନ୍ଦୁସ୍ଥାନ ୟୁନିଲିଭର ଲିମିଟେଡ୍, ଏଚ୍ସିଏଲ୍ ଟେକ୍ ଭଳି କମ୍ପାନୀର ଶେୟାର କାରବାର ମଧ୍ୟ ପ୍ରଭାବିତ ସ୍ଥିତିରେ ରହିଛି। ଅପରପକ୍ଷରେ ପାଓ୍ବାରଗ୍ରୀଡ୍, ଭାରତୀ ଏୟାରଟେଲ, ଓଏନ୍ଜିସି ଏବଂ ଅଲ୍ଟ୍ରାଟେକ ସିମେଣ୍ଟର ଶେୟାର ଭଲ କାରବାର କରିଛି। ପ୍ରଫିଟ ବୁକିଂ ଫଳରେ ସୂଚକାଙ୍କରେ ଏଭଳି ହ୍ରାସ ପରିଲକ୍ଷିତ ହୋଇଛି। ହଂକଂ ଏବଂ ସାଂଘାଇ ଶେୟାର ବଜାରର ସ୍ଥିତି ଭଲ ରହିଥିବା ବେଳେ ସିଓଲ ଓ ଟୋକିଓରେ କାରବାର ପ୍ରଭାବିତ ରହିଛି।
