ନୂଆଦିଲ୍ଲୀ,୧୦।୩: ଲୋକସଭା ନିର୍ବାଚନ ତାରିଖ ଘୋଷଣା ପୂର୍ବରୁ ଭାଜପାର କୋର୍ କମିଟି ବୈଠକ ଜାରି ରହିଛି। ପ୍ରଥମ ତାଲିକା ପ୍ରକାଶ ପାଇବା ପରେ ଭାଜପା ଦ୍ୱିତୀୟ ତାଲିକା ଖୁବଶୀଘ୍ର ଆସିବାକୁ ଯାଉଛି। ଦଳ ଖୁବଶୀଘ୍ର ଦ୍ୱିତୀୟ ତାଲିକା ପ୍ରକାଶ କରିବ। ଅନୁମାନ କରାଯାଉଛି କି, ଆଜି ଅର୍ଥରତ ରବିବାର ଭାଜପାର ନିର୍ବାଚନ କମିଟିର ବୈଠକ ବସିବ। ଯେଉଁଥିରେ ଦ୍ୱିତୀୟ ତାଲିକା ପାଇଁ ୧୫୦ ପ୍ରାର୍ଥୀଙ୍କ ନାମ ଉପରେ ଆଲୋଚନା ହେବ । ସିଇସିରୁ ଅନୁମୋଦନ ପାଇବା ପରେ ଭାଜପାର ଦ୍ୱିତୀୟ ତାଲିକା ପ୍ରକାଶ କରିବ।
ଲୋକସଭା ନିର୍ବାଚନ ପୂର୍ବରୁ ଭାଜପା ନିଜର ମହାମେଣ୍ଟ ଏନଡିଏକୁ ସୁଦୃଢ କରିବାରେ ଲାଗିପଡିଛି। ଆନ୍ଧ୍ରପ୍ରଦେଶରେ ଭାଜପା- ଟିଡିପି ଏବଂ ଜନସେନାର ଏକ ମିଳିତ ମେଣ୍ଟ ପ୍ରସ୍ତୁତ ହୋଇଛି। ସମସ୍ତ ତିନୋଟି ଦଳ ଆଗାମୀ ଲୋକସଭା ଏବଂ ବିଧାନସଭା ନିର୍ବାଚନରେ ଏକାଠି ଲଢିବେ। ତେବେ ଏହି ମେଣ୍ଟ କେତେ ସିଟ୍ରେ ପ୍ରତିଦ୍ୱନ୍ଦ୍ୱିତା କରିବେ ତାହା ନେଇ ଆଜି ସିଇସି ବୈଠକରେ ଆଲୋଚନା ହେବ ବୋଲି କଳ୍ପନାଜଳ୍ପନା କରାଯାଉଛି।
ସେହିପରି ଓଡିଶାରେ ଭାଜପା-ବିଜେଡି ମେଣ୍ଟ ହେବା ନେଇ କଳ୍ପନା ଜଳ୍ପନା ଜାରି ରହିଛି। ଏପର୍ଯ୍ୟନ୍ତ ଏହାର ସ୍ପଷ୍ଟ ଚିତ୍ର ମିଳି ନ ଥିବାବେଳେ ଦଳୀୟ କର୍ମୀଙ୍କ ବିବୃତ୍ତିରୁ ସ୍ପଷ୍ଟ ହୋଇଛି କି, ମେଣ୍ଟ ନେଇ ଆଲୋଚନା ଚାଲିଛି।
ଆସନ୍ତା ୧୨ ତାରିଖରେ, ଅର୍ଥାତ ଆଉ ୩ ଦିନ ପରେ ଏହି ଚର୍ଚ୍ଚା ଉପରେ ସ୍ପଷ୍ଟ ଚିତ୍ର ଆସିବ । ବିଜେଡି-ଭାଜପା ସମ୍ଭାବ୍ୟ ମେଣ୍ଟର ଗତିବିଧି ଉପରେ ନଜର ରଖୁଥିବା କିଛି ନେତା କହୁଛନ୍ତି ଏବେ ବି କିଛି ସ୍ତରରେ ଆଲୋଚନା ଚାଲିଛି ଏବଂ ୧୨ ତାରିଖରେ ଏହା ସାମ୍ନାକୁ ଆସିବ ।
ମେଣ୍ଟ ହେବ ନା ନାହିଁ, ତାକୁ ନେଇ ଅନେକ ପ୍ରଶ୍ନ ରହିଥିବା ବେଳେ ଏହାର ଉତ୍ତର କାହାରି ପାଖରେ ନାହିଁ । ମିଳୁଥିବା ସୂଚନା ଅନୁସାରେ, ବିଜେଡି-ଭାଜପା ମଧ୍ୟରେ ଆସନ ବୁଝାମଣା ହୋଇପାରୁନାହିଁ । ମେଣ୍ଟ ପାଇଁ ଭାଜପା ପୁରୀ-ଭୁବନେଶ୍ୱର ମାଗୁଥିବାବେଳେ ସେଥିରେ ବିଜେଡି ରାଜି ହେଉନାହିଁ ଏବଂ ବିଜେଡି ଏମିତି କିଛି ଆସନ ଦାବି କରୁଛି, ଯେଉଁଥିରେ ଭାଜପାର ନେତାମାନେ ରାଜି ହେଉନାହାନ୍ତି ।
