ଗଞ୍ଜାମ,୧୭ା୬(ବିଦ୍ୟାଧର ସାହୁ): ଋଷିକୂଲ୍ୟା ମୁହାଣ ଅଞ୍ଚଳରେ ତାଣ୍ଡବ ରଚୁଛି ଅଶାନ୍ତ ସମୁଦ୍ର। ଜଳ ଲହଡ଼ିରେ ଗଞ୍ଜାମ ବ୍ଲକର ସମୁଦ୍ର ଉପକୂଳବର୍ତ୍ତୀ ଅଞ୍ଚଳ କ୍ଷୟ ହେବାରେ ଲାଗିଛି। ପାଳିବନ୍ଧ ପଞ୍ଚାୟତର ସାମୁଦ୍ରିକ ମତ୍ସ୍ୟଜୀବୀ ସମ୍ପ୍ରଦାୟ ପୋଡ଼ମ ପେଟା ଗ୍ରାମର ପ୍ରାୟ ୪ ଶହରୁ ଊର୍ଦ୍ଧ୍ୱ ଗୃହ ସମୁଦ୍ର ଗର୍ଭରେ ଲୀନ ହୋଇ ସାରିଥିବା ବେଳେ ବର୍ତ୍ତମାନ ଉକ୍ତ ସମ୍ପ୍ରଦାୟରେ ଦେବୀ ପ୍ରତିମା ପ୍ରତ୍ୟକ୍ଷ ଠାକୁରାଣୀ ମା’ଙ୍କ ମନ୍ଦିର ଏବେ ସମୁଦ୍ର ଗର୍ଭରେ ଲୀନ ଅପେକ୍ଷାରେ। ମା’ଙ୍କ ମନ୍ଦିରରେ ଅଧାରୁ ଅଧିକ ସମୁଦ୍ର ଗର୍ଭରେ ଲୀନ ହୋଇ ସାରିଥିବା ବେଳେ କେବଳ ମା’ଙ୍କ ପିଣ୍ଡି ବାକି ଅଛି। ଗତ କିଛି ଦିନ ତଳେ୨୦ରୁୁ ଅଧିକ ଗୃହ ସମୁଦ୍ର ଗର୍ଭରେ ଲୀନ ହୋଇଯାଇଛି। ଜିଲା ପ୍ରଶାସନ ପକ୍ଷରୁ ଉକ୍ତ ଗ୍ରାମର ପ୍ରାୟ ୯୯ ପ୍ରତିଶତ ଲୋକଙ୍କୁ ଅନ୍ୟତ୍ର ଥଇଥାନ କରାଯାଇଛି। ଦିନକୁ ଦିନ ସମୁଦ୍ର ଏମିତି ଅଶାନ୍ତ ହୋଇ ପଡୁଛି ଯେ, ସମୁଦ୍ର ନିକଟବର୍ତ୍ତୀ ଅଞ୍ଚଳ କଣ୍ଟିଆ ଗଡ଼ କେବେ ବି ସମୁଦ୍ର ଗର୍ଭକୁ ଚାଲିଯିବ ଏକଥା କିଏ କହି ପାରିବ। ପୂର୍ଣ୍ଣିମା ଓ ଅମାବାସ୍ୟା ତିଥିରେ ଗୋଟିଏ ପରେ ଗୋଟିଏ ପକ୍କା ଘର ଭୁଶୁଡ଼ି ପଡ଼ିଛି ସମୁଦ୍ରରେ। ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଆଗୁଆ ପଦକ୍ଷେପ ଗ୍ରହଣ କରିବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି। ବଡ଼ ବଡ଼ ଘର ଅଛି କିନ୍ତୁ ଲୋକ ନାହାନ୍ତି ଏକଥା ସାମାଜିକ ଗଣମାଧ୍ୟମରେ ପ୍ରଚାରିତ ହେବା ପରେ ଦୈନଦିନ ବହୁ ପର୍ଯ୍ୟଟକ ଏଠାକୁ ଆସି ସେଲ୍ଫି ନେବା ସହ ସମୁଦ୍ରରେ ବୁଡ଼ି ମଜା ନେଉଛନ୍ତି।
