ଗଞ୍ଜାମ,୨୨ା୮(ବିଦ୍ୟାଧର ସାହୁ): ବାରମ୍ବାର ଲଗୁଚାପ ଏବଂ ଜଳ ବାୟୁ ପରିବର୍ତ୍ତନ ହେଉ ଥିବାରୁ ସମୁଦ୍ରରେ ଉଚ୍ଚ ଲହରି ସୃଷ୍ଟି ହେଉଛି l ଯାହାକୁ ନେଇ ଗଞ୍ଜାମ ବ୍ଲକ ଅନ୍ତର୍ଗତ ପାଳିବନ୍ଧ ପଞ୍ଚାୟତ ଋଷିକୂଲ୍ୟା ମୁହାଣ ଅଞ୍ଚଳରେ ସମୁଦ୍ର କୂଳ ଲଙ୍ଘୁଥିବା ଦେଖିବାକୁ ମିଳିଛି। ବର୍ତ୍ତମାନ ଋଷିକୁଲ୍ୟା ମୁହାଣ ପୋଡ଼ମପେଟା ଓଡ଼ିଆରପି କଲୋନୀ ସମ୍ମୁଖରେ ରହିଥିବା ବେଳେ ସେହିଠାରୁ କିଛି ଦୂରତା ମଧ୍ୟରେ ରହିଥିବା ପୁରୁଣାପୋପେଟା ଗ୍ରାମ। ସେଠାରେ ରହିଥିବା ଘରଗୁଡ଼ିକ ସମୁଦ୍ର ଜୁଆର ମାଡ଼ରେ ଅତଡ଼ା ଖସି ସମୁଦ୍ରର ଗର୍ଭରେ ଲୀନ ହେଉଥିବା ଲକ୍ଷ୍ୟ କରାଯାଇଛି। ସେହିପରି ଝାଉଁ ଓ କାଜୁ ହେନ୍ତାଳ ବଣ ମଧ୍ୟ ନଷ୍ଟ ହୋଇପଡୁଥିବା ଅଞ୍ଚଳବାସୀ ପ୍ରକାଶ କରିଛନ୍ତି।
ସୂଚନାଥାଉକି, ପୂର୍ବରୁ ଏପରି ସମସ୍ୟାକୁ ନେଇ ପୁରୁଣା ପୋଡ଼ମପେଟା ଗ୍ରାମବାସୀଙ୍କୁ ପାଳିବନ୍ଧ ପଞ୍ଚାୟତର ମୟୂରପଦା ଗ୍ରାମ ଓ ରାମଗଡ଼ ପଞ୍ଚାୟତର ଡୁମୁନଗିରୀ ପାହାଡ଼ ପାଦ ଦେଶରେ ପାଲୁରୁ ସାହେବ କେନାଲ ପାର୍ଶ୍ୱରେ ସିଦ୍ଧାନ୍ତ ନଗରରେ ଜିଲା ପ୍ରଶାସନ
ପକ୍ଷରୁ ଥଇଥାନ କରାଯାଇଛି। ପ୍ରତିବର୍ଷ ବର୍ଷାଦିନରେ ଏପରି ସମୁଦ୍ର କୂଳଲଙ୍ଘି ସ୍ଥାନୀୟ ଭୌଗୋଳିକ ପରିବେଶ ବିଗୁଡୁ ଥିବାରୁ ଅଞ୍ଚଳବାସୀ ଓ ପରିବେଶବିତ୍ ଚିନ୍ତିତ ହୋଇପଡ଼ିଛନ୍ତ। ଏ ଦିଗରେ ଜିଲା ପ୍ରଶାସନ ଉତ୍ତମ ପଦକ୍ଷେପ ନେବାକୁ ଦାବି ହେଉଛି।
