ପଟ୍ଟାଙ୍ଗୀ, ୭ା୨(ଡି.ଏନ୍.ଏ.) କୋରାପୁଟ ଜିଲା ପଟ୍ଟାଙ୍ଗି ବ୍ଲକ ସଦର ମହକୁମା ଦେଇ ଦୁଇ ରାଜ୍ୟକୁ ସଂଯୋଗ କରୁଥିବା ଜାତୀୟ ରାଜପଥ କଡ଼ରେ ମାଟି ଗଦାହୋଇ ରହିଛି। ଫଳରେ ରାତିରେ ଲୋକେ ଯାତାୟାତରେ ସମସ୍ୟାରେ ପଡୁଛନ୍ତି। ବିଭିନ୍ନ ସମୟରେ ବାଇକ୍ ଚାଳକମାନେ ଦୁର୍ଘଟଣାର ଶିକାର ହେଉଛନ୍ତି। ରବିବାର ଏପରି ଏକ ଦୁର୍ଘଟଣା ଘଟିଛି। ବିପରୀତ ଦିଗରୁ ଆସୁଥିବା ୨ ବାଇକ୍ ଆରୋହୀଙ୍କ ମୁହଁରେ ଅପରପାର୍ଶ୍ୱରୁ ଆସୁଥିବା ଗାଡି ଲାଇଟ୍ ପଡିବାରୁ ଉଭୟ ବାଇକ୍ ଚାଳକ କିଛି ଦେଖି ନ ପାରି ରାସ୍ତା ପାଶ୍ୱର୍ର୍ରେ ଗଦା ହୋଇଥିବା ମାଟିଗଦା ଭିତରେ ପଶି ଯାଇଥିଲେ। ସେମାନଙ୍କ ପାଟି ଶୁଣି ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ଡାକ୍ତରଖାନା ପଠାଇଥିଲେ। ଆହତ ଦୁଇ ବ୍ୟକ୍ତି ହେଲେ ନକଲାମାରି ଗ୍ରାମର ନକୁଳ ଗୁଣ୍ଠା ଓ ପଡାଲଗୁଡାର ଗୋପୀ କାଲପାଡିଆ।
ପଟ୍ଟାଙ୍ଗୀ ବ୍ଲକ ଦେଇ ଆନ୍ଧ୍ର ଓ ଛତିଶଗଡ଼କୁ ସଂଯୋଗ କରୁଥିବା ୨୬ନଂ. ଜାତୀୟ ରାଜପଥକୁ କିଛିଦିନ ତଳେ ମରାମତି କରା ଯାଇଥିଲା। ରାସ୍ତାକଡରେ ମାଟି ଗଦା କରାଯାଇଥିଲେ ମଧ୍ୟ ବିଭାଗ ପକ୍ଷରୁ ତାହାକୁ ଏଯାଏ ସମତୁଲ କରାଯାଇନାହିଁ; ଫଳରେ ରାସ୍ତାଟି ଅଣଓସାରିଆ ହୋଇଯାଇଛି। ରାତିରେ ଦୁଇ ରାଜ୍ୟ ଅଭିମୁଖେ ଯାତାୟାତ କରୁଥିବା ଟ୍ରକଗୁଡ଼ିକ ସମସ୍ୟାର ସମ୍ମୁଖୀନ ହେଉଥିବା ବେଳେ ସାଧାରଣ ଲୋକେ ମଧ୍ୟ ସମସ୍ୟା ଭୋଗୁଛନ୍ତି। ମାଟି ଗାଙ୍ଗମା ମନ୍ଦିର, ବ୍ଲକ କାର୍ଯ୍ୟାଳୟ ସମ୍ମୁଖ, ବ୍ୟାଙ୍କ ସମ୍ମୁଖରେ ପଡି ରହିଛି। ବିଭିନ୍ନ କାର୍ଯ୍ୟରେ ବ୍ୟାଙ୍କ ଓ ବ୍ଲକ କାର୍ଯ୍ୟାଳୟକୁ ଆସୁଥିବା ଲୋକେ ସେମାନଙ୍କ ଗାଡ଼ି ରାସ୍ତା ପାର୍ଶ୍ୱରେ ରଖିବା ଯୋଗୁ ଟ୍ରକଚାଳକମାନେ ସମସ୍ୟାରେ ପଡୁଛନ୍ତି। ରାତିରେ ଛୋଟ ଗାଡ଼ିଗୁଡ଼ିକ ଯାତାୟାତ ସମୟରେ ବିପରୀତ ଦିଗରୁ ଆସୁଥିବା ଗାଡିଲାଇଟ ଚାଳକଙ୍କ ମୁହଁରେ ପଡିବାରୁ ସେମାନେ ଦୁର୍ଘଟଣାର ସମ୍ମୁଖୀନ ହେଉଥିବା ଦେଖିବାକୁ ମିଳୁଛି। ବିଭାଗୀୟ ଅଧିକାରୀ ଏ ଦିଗରେ ତୁରନ୍ତ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
