ଦାରିଙ୍ଗବାଡ଼ି,୨୯।୭(ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ବ୍ରାହ୍ମଣୀଗାଁ ଥାନା ବଡ଼ଶଙ୍ଖଠାରୁ ଗଡମା ରାସ୍ତା ଏବେ ବିପଦରେ ରହିଛି। ନଦୀ କୂଳ ଖାଉଥିବା ବେଳେ ଉକ୍ତ ରାସ୍ତା ଦେଇ ଯାଉଥିବା କିରାମାହା ସମେତ ନୂଆଗାଁ, କିନାରିଗାଁ, କୁଟିଲାରିଗାଁ, ସାଙ୍ଗଡମାହା, ବାଘପଦା,ଗଡ଼ମା, ମୁଣ୍ତାସାହି, ପାଡିପଙ୍କା, ଗୋଲିମେରା ଗ୍ରାମ ଆଦି ବାହ୍ୟ ଜଗତରୁ ବିଛିନ୍ନ ହେବା ଆଶଙ୍କା ବୃଦ୍ଧି ପାଇଛି।
ପ୍ରକାଶ ଯେ, ଦାରିଙ୍ଗବାଡିଠାରୁ ଗଜପତି ଜିଲାର ପାଣିଗଣ୍ଡା ପର୍ଯ୍ୟନ୍ତ ପୂର୍ତ୍ତ ବିଭାଗ ରାସ୍ତାର ବ୍ରାହ୍ମଣୀଗାଁ ଶେଷ ମୁଣ୍ଡରୁ କିରାମାହା ସମେତ ୧୦ରୁ ଉର୍ଦ୍ଧ୍ୱ ଗ୍ରାମକୁ ଯାତାୟାତ ପାଇଁ ସଂଯୋଗ ରାସ୍ତା ରହିଛି। ଉକ୍ତ ରାସ୍ତା ଗ୍ରାମ୍ୟଉନ୍ନୟନ ବିଭାଗ ଦ୍ୱାରା ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ରହିଛି। ତେବେ ପୂର୍ତ୍ତ ବିଭାଗଠାରୁ ଗ୍ରାମ୍ୟ ଉନ୍ନୟନ ବିଭାଗ ରାସ୍ତାକୁ ସଂଯୋଗ କରୁଥିବା ବଡଶଙ୍ଖଠାରେ ଅଣ ଓସାରିଆ ପୋଲ କରାଯାଇଥିବା ବେଳେ ଏବେ ନଦୀ କୂଳ ଖାଇ ପ୍ରଧାନମନ୍ତ୍ରୀ ସଡ଼କର କଡ଼ ଧୋଇହୋଇ ରାସ୍ତା ଆହୁରି ସଂକୁଚିତ ହୋଇପଡିଛି। ଫଳରେ ଆଗକୁ ବଡ଼ ବର୍ଷା ହେଲେ ରାସ୍ତା ଆହୁରି ଧୋଇ ହୋଇଯିବାର ଆଶଙ୍କା କରାଯାଇଛି। ଏବେ ଉକ୍ତ ରାସ୍ତାରେ ଭାରୀଯାନ ଚଳାଚଳ ବିପଦପୂର୍ଣ୍ଣ ରହିଥିବାବେଳେ ଆଗକୁ ସମସ୍ତ ପ୍ରକାର ଗାଡି ଚଳାଚଳରେ ବାଧା ସୃଷ୍ଟି ହେବା ଅଞ୍ଚକବାସୀ ଆଶଙ୍କା କରିଛନ୍ତି।
ଉକ୍ତ ଅଞ୍ଚକରେ ରହିଥିବା ବିଦ୍ୟାଳୟ, ଅଙ୍ଗନାୱାଡି କେନ୍ଦ୍ର ଗୁଡିକୁ ଆବଶ୍ୟକ ଖାଦ୍ୟ ସାମଗ୍ରୀ ତଥା ଚାଉଳ, ଛତୁଆ, ଅଣ୍ଡା ଆଦି ଅତ୍ୟାବଶ୍ୟକୀୟ ସାମଗ୍ରୀ ରାସ୍ତା ଧୋଇଯିବା ପୂର୍ବରୁ ପହଞ୍ଚାଇବାକୁ ଏକାଧିକ ବିଦ୍ୟାଳୟ ପକ୍ଷରୁ ସିଆରସିସି ଏବଂ ଅନ୍ୟ ଅଧିକାରୀଙ୍କୁ ସୂଚନା ଦିଆଯାଇଥିବା ଜଣାପଡ଼ିଛି। ବ୍ରାହ୍ମଣୀଗାଁ ବଜାର ଉପରେ ନିର୍ଭର କରୁଥିବା ଉକ୍ତ ଦୁର୍ଗମ ଅଞ୍ଚଳର ୧୦ରୁ ଉର୍ଦ୍ଧ୍ୱ ଗ୍ରାମବାସୀ ଚିନ୍ତାରେ ଅଛନ୍ତି। ଶୀଘ୍ର ଉକ୍ତ ରାସ୍ତା ମରାମତି କରାନଗଲେ ନଦୀର ବଢି ପାଣି ସମ୍ପୂର୍ଣ୍ଣ ରାସ୍ତା ଧୋଇଦେବାର ଆଶଙ୍କା କରାଯାଇଛି। ଏନେଇ ଗ୍ରାମ୍ୟ ଉନ୍ନୟନ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ଶ୍ୟାମସୁନ୍ଦର ସିଂଙ୍କ ସହ ଯୋଗାଯୋଗ କରାଯିବାରୁ ସେ ଏବେ ଶୁଣିଲେ ବର୍ଷା କମିଲେ ମରାମତି କରିବୁ ବୋଲି କହିଛନ୍ତି।
