୧୨ ସାପ୍ତାହିକ ହାଟ ବନ୍ଦ କଲା ଆର୍‌ଏମ୍‌ସି
7:47 amJuly 8, 2020July 8, 2020 / 21

ଅନୁଗୋଳ ଅଫିସ, ୮।୭ କରୋନା ସଂକ୍ରମଣ ବୃଦ୍ଧି ପାଉଥିବାରୁ ଅନୁଗୋଳ ଜିଲାରେ ଥିବା ଅନୁଗୋଳ, ତାଳଚେର, ଆଠମଲ୍ଲିକ ଓ ପାଲଲହଡ଼ା ଆଞ୍ଚଳିକ ବଜାର ନିୟନ୍ତ୍ରିତ କମିଟି(ଆର୍‌ଏମ୍‌ସି) ଅଧୀନ ମୋଟ୍‌ ୧୨ଟି ସାପ୍ତାହିକ ହାଟକୁ ଜୁଲାଇ ଶେଷଯାଏ ବନ୍ଦ ରଖାଯାଇଛି। ଚାଷୀ ଓ ବ୍ୟବସାୟୀମାନେ ହାଟକୁ ନ ଆସି ଖୋଲା ପଡ଼ିଆ କିମ୍ବା ଖୋଲା ସ୍ଥାନରେ ସାମାଜିକ ଦୂରତ୍ୱ ରଖି ବ୍ୟବସାୟ କରିପାରିବେ। ଜନସମାଗମରେ ରୋକ୍‌ ଲଗାଯିବା ଉଦ୍ଦେଶ୍ୟରେ ପ୍ରଶାସନ ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଥିବା ଅନୁଗୋଳ ଆର୍‌ଏମ୍‌ସି ସମ୍ପାଦକ ଶମ୍ବୁନାଥ ନାୟକ ସୂଚନା ଦେଇଛନ୍ତି।
ସମ୍ପାଦକ ନାୟକ କହିଛନ୍ତି ଯେ, ଲକ୍‌ଡାଉନ୍‌ ଘୋଷଣା ପରେ ଜିଲାର ସାପ୍ତାହିକ ହାଟଗୁଡ଼ିକୁ ବନ୍ଦ କରିଦିଆଯାଇଥିଲା। କିନ୍ତୁ ନିୟମ କୋହଳ ପରେ ପୋଲିସ ଉପସ୍ଥିତିରେ ସାମାଜିକ ଦୂରତ୍ୱ ରଖାଯାଇ ପରିଚାଳନା କରାଯାଉଥିଲା। ହେଲେ ଚାଷୀ, ବ୍ୟବସାୟୀ ଓ ଖାଉଟି ହାଟରେ କଟକଣା ପାଳନ କରି ନ ଥିଲେ। ତେଣୁ ସଂକ୍ରମଣ ରୋକିବାକୁ ଜୁଲାଇ ଶେଷ ଯାଏ ଅନୁଗୋଳ, ବଅଁରପାଳ, ବନ୍ତଳା, ଜରପଡ଼ା, କୋଶଳା, ବାଗିଡ଼ିଆ, ମହୀଧରପୁର, ତୁକୁଡ଼ା, ମରାତିରା ହାଟ ସହ ଜିଲାରେ ଆରଏମ୍‌ସି ଅଧୀନରେ ଥିବା ମୋଟ୍‌ ୧୨ଟି ସାପ୍ତାହିକ ହାଟକୁ ବନ୍ଦ କରିଦିଆଯାଇଛି। ପାଲଲହଡ଼ା ଓ ଆଠମଲ୍ଲିକରେ ଆର୍‌ଏମ୍‌ସିର କୌଣସି ସାପ୍ତାହିକ ହାଟ ନାହିଁ। ତାଳଚେର ପୌରପାଳିକା ଅଧୀନରେ ଗୋଟିଏ ଓ ଥର୍ମାଲ, ଶ୍ରୀପୁରରେ ଆର୍‌ଏମ୍‌ସିର ଦୁଇଟି ସାପ୍ତାହିକ ହାଟ ରହିଛି। ଜିଲାରେ ଥିବା ୨୨୫ଟି ପଞ୍ଚାୟତର ବିଭିନ୍ନ ଗ୍ରାମାଞ୍ଚଳ ହାଟରେ ସାମାଜିକ ଦୂରତ୍ୱ ରକ୍ଷା କରି ବ୍ୟବସାୟ କରିବାକୁ କୁହାଯାଇଛି ବୋଲି ଅନୁଗୋଳ ଆର୍‌ଏମ୍‌ସି ସମ୍ପାଦକ ନାୟକ ପ୍ରକାଶ କରିଛନ୍ତି।