ବଲାଙ୍ଗୀର ଅଫିସ,୨୬ା୯: ଯୁଗଯୁଗରୁ ସ୍ବାଧୀନତାର ପରିସୀମା ଓ ପରିଭାଷାକୁ ନେଇ ଆଲୋଚନା, ପର୍ଯ୍ୟାଲୋଚନା ଚାଲିଛି। ଯେଉଁମାନଙ୍କୁ ଖାଦ୍ୟ ପାଇଁ ଚିନ୍ତା କରିବାକୁ ପଡେନାହିଁ, ସେମାନଙ୍କ ପିଲାଙ୍କୁ ଖାଦ୍ୟ କେଉଁଠି ଆସେ ବୋଲି ପ୍ରଶ୍ନ କଲେ ରିଲାଏନ୍ସ ଫ୍ରେଶ୍ କିମ୍ବା କେଉଁ ଦୋକାନରୁ ଖାଦ୍ୟ ଆସୁଛି ବୋଲି କହନ୍ତି। ଯେଉଁମାନଙ୍କ ଘରେ ଟ୍ୟାପ୍ ଲାଗିଛି, ଏପଟେ ମୋଡିଦେଲେ ଥଣ୍ଡା ପାଣି ଓ ସେପଟେ ମୋଡି ଦେଲେ ଗରମ ପାଣି ବାହାରୁଛି ସେମାନଙ୍କ ପାଖରେ ସ୍ବାଧୀନତା ରହିଛି। ଯେଉଁମାନେ ତିନି କିଲୋମିଟର ଚାଲିକରି ଯାଉଛନ୍ତି, ନଦୀ ବାଲିରେ ଚୁଆ ଖୋଳି ପାଣି ଆଣୁଛନ୍ତି ସେମାନଙ୍କ ପାଖରେ ସ୍ବାଧୀନତା ନାହିଁ। ଖାଦ୍ୟ ଖାଇବା ଲୋକେ ଚାଷୀଙ୍କ ସଂଘର୍ଷ ବୁଝନ୍ତି ନାହିଁ। ଚାଷୀକୁ ତା’ର ଶ୍ରମ ଓ ଶସ୍ୟର ମୂଲ୍ୟ ମିଳେନାହିଁ। ଏଥିରୁ ବୁଝାପଡୁଛି ଯେ, ଧନୀ ସ୍ବାଧୀନ ଓ ଗରିବ ପରାଧୀନ। ବଲାଙ୍ଗୀର କ୍ରାନ୍ତି-ଜାଗୃତି କମିଟି ପକ୍ଷରୁ ରବିବାର ପୃଥ୍ବୀରାଜ ହାଇସ୍କୁଲ ସେଣ୍ଟେନାରି ହଲଠାରେ ଅନୁଷ୍ଠିତ ‘ସ୍ବାଧୀନତାର ପରିସୀମା ଓ ପରିଭାଷା’ ଶୀର୍ଷକ ଆଲୋଚନାଚକ୍ରରେ ଏହା କହିଛନ୍ତି ଧରିତ୍ରୀ ଓ ଓଡ଼ିଶା ପୋଷ୍ଟ ସମ୍ପାଦକ ତଥାଗତ ସତପଥୀ।
କମିଟି ସଭାପତି ଡ. ଶିବପ୍ରସାଦ ନନ୍ଦଙ୍କ ଅଧ୍ୟକ୍ଷତାରେ ଅନୁଷ୍ଠିତ ଆଲୋଚନାଚକ୍ରରେ ଆଲୋଚକ ସତପଥୀ ଆହୁରି କହିଥିଲେ, ସ୍ବାଧୀନତା ଏକ ସିଦ୍ଧାନ୍ତ। ଏହାକୁ ଯିଏ ବିକ୍ରି କରିପାରିଲା ସିଏ ବଡ଼ ନେତା ହୋଇପାରିଲା। କାରଣ ସ୍ବାଧୀନତା ସିଦ୍ଧାନ୍ତର ବି ଗ୍ରାହକ ଅଛନ୍ତି। ଧର୍ମ ହେଉଛି ସ୍ବାଧୀନତା ସଙ୍କୁଚିତ କରିବାର ଆଉ ଏକ ପ୍ରମୁଖ ମାଧ୍ୟମ। ଧର୍ମର ଲେମ୍ବୁ ଚଟାଇ ଗରିବ ଲୋକଙ୍କ ସ୍ବାଧୀନତାକୁ ଚାପି କରି ରଖାଯାଉଛି। ସବୁ ଧର୍ମରେ ସମାନ ସ୍ଥିତି ରହିଛି। ଦୁଇବର୍ଷ ତଳେ ଯେଉଁ ନୂଆ ରୋଗ ବାହାରିଲା ତାହାରି ମାଧ୍ୟମରେ ବ୍ୟକ୍ତି ସ୍ବାଧୀନତାକୁ ଦୁଇବର୍ଷ ଚାପି ଦିଆଗଲା। ଜନ୍ମ ପରେ ନାମକରଣ ହେବା ପର୍ଯ୍ୟନ୍ତ ପୁଅ ଓ ଝିଅର ସ୍ବାଧୀନତା ରହୁଛି। ଯେଉଁଦିନ ତାକୁ ଏକ ନଁା ଦେଇ ଦିଆଯାଉଛି ସେହିଦିନଠାରୁ ତା’ର ସବୁକିଛି ଯେମିତି ସମାପ୍ତ ହୋଇଯାଉଛି। ଜାତି, ଧର୍ମ ନଁାରେ ଭାଗଭାଗ କରି ଦିଆଯାଉଛି। ଏହା କିଏ କରୁଛି, ସେ ନିଜେ କିଛି କରୁନାହିଁ। ତାକୁ କରାଇ ଦିଆଯାଉଛି ବୋଲି ସତପଥୀ କହିଥିଲେ।
ଅନ୍ୟତମ ଆଲୋଚକ ବିଶିଷ୍ଟ ଶିକ୍ଷାବିତ୍ ପ୍ରଫେସର ମଧୁସୂଦନ ପତି ତାଙ୍କ ବକ୍ତବ୍ୟରେ ପାଶ୍ଚତ୍ୟ ଏବଂ ପ୍ରାଚ୍ୟ ବିଚାରରେ ସ୍ବାଧୀନତାର ପରିଭାଷା ଓ ପରିସୀମା ବିଷୟରେ ଏକ ତାତ୍ତ୍ୱିକ ଆଲୋଚନା କରିଥିଲେ। ସମ୍ବିଧାନରେ ଯେଉଁ ଭାତୃତ୍ୱ ଶବ୍ଦର ବ୍ୟାଖ୍ୟା କରାଯାଇଛି ଏହା ବଡ଼ ଗୁରୁତ୍ୱପୂର୍ଣ୍ଣ ବୋଲି କହିଥିଲେ। ଭ୍ରାତୃତ୍ୱ ଜରିଆରେ ହିଁ ଆମେ ସମ୍ବିଧାନର ନ୍ୟାୟ ଓ ସମାନତାକୁ ଠିକ୍ ଭାବେ ବୁଝିପାରିବେ ବୋଲି କହିଥିଲେ। ଦେଶପ୍ରେମ ଭଲ; ମାତ୍ର ଜାତୀୟତାବାଦ ବ୍ୟକ୍ତିକୁ ଉଚ୍ଛୃଙ୍ଖଳ କରେ ବୋଲି କହିଥିଲେ। ପ୍ରକୃତରେ ଆର୍ଥିକ ସ୍ବାଧୀନତା ବିନା ସ୍ବାଧୀନତାର କିଛି ମୂଲ୍ୟ ନାହିଁ ବୋଲି ସେ କହିଥିଲେ। ବ୍ୟକ୍ତି ପାଇଁ ସମାଜ ସୃଷ୍ଟି, ସମାଜ ପାଇଁ ବ୍ୟକ୍ତି ସୃଷ୍ଟି ହୋଇନାହିଁ ବୋଲି ସେ କହିଥିଲେ। ତେବେ ଭାରତୀୟ ପରିପ୍ରେକ୍ଷୀରେ ଗାନ୍ଧିଜୀଙ୍କ ଆଧ୍ୟାତ୍ମିକ ଉଦାରତା ଉପରେ କହି ଅନ୍ୟର ସ୍ବାଧୀନତାକୁ ସମ୍ମାନ ପ୍ରଦର୍ଶନ କରିବାରେ ଶ୍ରେଷ୍ଠତମ ମାଧ୍ୟମ ବୋଲି କହିଥିଲେ। ଆଲୋଚକଙ୍କ ବକ୍ତବ୍ୟ ପରେ ପ୍ରଶ୍ନୋତ୍ତର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ବହୁ କଲେଜ ଛାତ୍ରୀଛାତ୍ର, ବୁଦ୍ଧିଜୀବୀ ଦୁଇ ଆଲୋଚକଙ୍କୁ ପ୍ରଶ୍ନ କରିଥିଲେ। ଦୁଇ ଆଲୋଚକ ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ। ଆଲୋଚନାଚକ୍ର କମିଟି ସଂଯୋଜକ ଧର୍ମେନ୍ଦ୍ର ପ୍ରସାଦ ନନ୍ଦ କାର୍ଯ୍ୟକ୍ରମକୁ ସଂଯୋଜନା କରିଥିଲେ। ଶେଷରେ ବୀରେନ୍ଦ୍ର କୁମାର ଝାଙ୍କର ଧନ୍ୟବାଦ ଦେଇଥିଲେ।
ଏହି ଆଲୋଚନାଚକ୍ରରେ ବଲାଙ୍ଗୀର ବିଧାୟକ ନରସିଂହ ମିଶ୍ର, ଲୋଇସିଂହା ବିଧାୟକ ଡ ମୁକେଶ ମହାଲିଙ୍ଗ, ଶିକ୍ଷାବିତ୍ ପ୍ରାଣବନ୍ଧୁ ନାୟକ, ଟୀକେଶ୍ୱର ଗୁରୁ, ଗୁରୁଶ୍ରୀ ଘାସିରାମ ମିଶ୍ର, ମନୋରଞ୍ଜନ ସାହୁ, ଗୋପଭୂଷଣ ନାଥ, ନକୁଳ ଅଗ୍ରୱାଲ, ଡା ଲକ୍ଷ୍ମୀକାନ୍ତ ମହାପାତ୍ର, ନୀଳମଣି ମିଶ୍ର, ହେମନ୍ତ ପଣ୍ଡା, ବିଧୁଭୂଷଣ ତ୍ରିପାଠୀ, ବେଲାରସିଂ ଭୋଇ, ଭାଗୀରଥୀ ମିଶ୍ର, ଚାଇନା ମହାନ୍ତି, ସନ୍ତୋଷ ପାଢ଼ୀ, ପ୍ରହଲ୍ଲାଦ ଶତପଥୀ, କିଶୋର ରଥ, ଦିଲୀପ ଦାଶ, ନିମାଁଇ ପାଣିଗ୍ରାହୀ ଓ ବିଭିନ୍ନ କଲେଜର ଛାତ୍ରୀଛଥ୍ର, ବହୁ ବୁଦ୍ଧିଜୀବୀ ଯୋଗଦାନ କରିଥିଲେ।
