ଅମରପାଲି,୨୬।୪ (ଡି.ଏନ.ଏ.) ସୁବର୍ଣ୍ଣପୁର ଜିଲା ବୀରମହାରାଜପୁର ତହସିଲ ଅଧୀନରେ ଥିବା ସୁବଳୟା ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ(ଆରଆଇ ଅଫିସ)ରେ କର୍ମଚାରୀ ଅଭାବ ଯୋଗୁ ବିଭିନ୍ନ କାମରେ ସମସ୍ୟା ହେଉଛି। ଫଳରେ ବିଭିନ୍ନ କାମରେ ଏହି କାର୍ଯ୍ୟାଳୟକୁ ଆସୁଥିବା ସାଧାରଣ ଲୋକେ ଉପଯୁକ୍ତ ସେବା ପାଇ ପାରୁ ନ ଥିବା ଅଭିଯୋଗ ହେଉଛି। ଜିଲାର ବୀରମହାରାଜପୁର ତହସିଲ ଅଧୀନରେ ରହିଛି ଉଫୁଲା, ମୁର୍ଷୁଣ୍ଢି, ସୁବଳୟା, ଖଣ୍ଡହତା ଓ କେନଝିରିଆପାଲି ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ। ତନ୍ମଧ୍ୟରୁ ସୁବଳୟା ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଅଧୀନରେ ରହିଛି ପ୍ରାୟ ୨୯ ଖଣ୍ଡ ରାଜସ୍ବ ଗ୍ରାମ। ପିତାମହୁଲ ଓ ସୁବଳୟା ପଞ୍ଚାୟତର ସମସ୍ତ ଗ୍ରାମ, ଜଟେସିଙ୍ଘା ପଞ୍ଚାୟତର କେବଳ ଗୋଟିଏ ରାଜସ୍ବ ଗ୍ରାମକୁ ଛାଡି ବାକି ସମସ୍ତ ଗ୍ରାମ ଓ କମିର ଗ୍ରାମର ଅଧାରୁ ଅଧିକ ଗ୍ରାମର ଲୋକେ ଓ ଛାତ୍ରୀଛାତ୍ରମାନେ ସୁବଳୟା ଆରଆଇ ଅଫିସ ଉପରେ ନିର୍ଭର କରନ୍ତି। ଉକ୍ତ ଅଞ୍ଚଳର ଲୋକେ ଜମିବାଡି କାମ ସହିତ, ଆୟ ପ୍ରମାଣ ପତ୍ର, ଜାତି ପ୍ରମାଣ ପତ୍ର, ବାସସ୍ଥାନ ପ୍ରମାଣ ପତ୍ର ଓ ଅନ୍ୟାନ୍ୟ କାର୍ଯ୍ୟ ପାଇଁ ଏହି କାର୍ଯ୍ୟାଳୟ ଉପରେ ନିର୍ଭର କରନ୍ତି। ଏହାସହିତ ଏବେ ଜମି ହାଇଟେକ କାମ ପାଇଁ ମଧ୍ୟ ଏହି କାର୍ଯ୍ୟାଳୟରେ ନିର୍ଭର କରନ୍ତି।
ସୁବଳୟା ରାଜସ୍ବ ନିରୀକ୍ଷକ କାର୍ଯ୍ୟାଳୟ(ଆରଆଇ ଅଫିସ)ରେ ଜଣେ ଲେଖାଏ ଆର ଆଇ, ସହକାରୀ ରାଜସ୍ବ ନିରୀକ୍ଷକ(ଏ ଆର ଆଇ), ଅମିନ, ପିଅନ ଓ ଚେନମ୍ୟାନ ରହିବା କଥା। ଏହାସହିତ ଏବେ ହାଇଟେକ କାମ ପାଇଁ ଏକ ସ୍ବତନ୍ତ ଦଳ ରହିବା ଆବଶ୍ୟକ। ମାତ୍ର ଉକ୍ତ ଅଫିସରେ କେବଳ ଜଣେ ରାଜସ୍ବ ନିରୀକ୍ଷକ ଅଛନ୍ତି। ବାକି ସମସ୍ତ ପଦବୀ ଦୀର୍ଘଦିନ ହେଲା ଖାଲି ପଡିଥିଲେ ମଧ୍ୟ ଉକ୍ତ ପଦବୀ ପୂରଣ କରାଯାଉ ନାହିଁ। ଏନେଇ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ବିଭାଗ ଏଥିପ୍ରତି ଦୃଷ୍ଟି ଦେଉ ନାହାନ୍ତି। ଆବଶ୍ୟକଠାରୁ କମ୍ କର୍ମଚାରୀ ଥିବାରୁ ସବୁ କାମ ଠିକ୍ ସମୟରେ ହୋଇପାରୁ ନାହିଁ। ରାଜସ୍ବ ନିରୀକ୍ଷକ ଜଣକ ଏହି ସମସ୍ତ ରାଜସ୍ବ କାମ ସହିତ ଧାନଚାଷ ଓ କପାଚାଷ ହୋଇଥିବା ଜମି ଚିହ୍ନଟ, ମରୁଡି, ବନ୍ୟା, ବାତ୍ୟା ସମୟରେ କ୍ଷେତ୍ର ପରିଦର୍ଶନ କାମ ଯୋଗୁ ସବୁବେଳେ ଅଫିସରେ ରହିବା ସମ୍ଭବ ହୋଇପାରୁ ନାହିଁ। ତେଣୁ ଅନେକ ସମୟରେ ସାଧାରଣ ଲୋକେ କାର୍ଯ୍ୟାଳୟକୁ ଆସି ସେବା ପାଉ ନ ଥିବା ଅଭିଯୋଗ ହୋଇଛି। ଯଥାଶୀଘ୍ର ଉକ୍ତ କାର୍ଯ୍ୟାଳୟରେ ଖାଲି ଥିବା ପଦବୀ ପୂରଣ କରିବାକୁ ସାଧାରଣରେ ଦାବି ହେଉଛି। ଏ ସମ୍ପର୍କରେ ସୁବଳୟା ରାଜସ୍ବ ନିରୀକ୍ଷକ ଜୟଶ୍ରୀ ମେଣ୍ଡିଲି କହିଛନ୍ତି, ସୁବଳୟା ଆରଆଇ ଅଫିସରେ କର୍ମଚାରୀ ସମସ୍ୟା ତ ରହିଛି। ତେବେ କ୍ଷେତ୍ର ପରିଭ୍ରମଣ ବେଳେ କାର୍ଯ୍ୟାଳୟରେ ରହିବାସମ୍ଭବ ହେଉନାହିଁ। ତଥାପି ଲୋକଙ୍କ କାମ ଠିକ୍ ସମୟରେ କରିବାକୁ ଚେଷ୍ଟା କରାଯାଉଛି।
ରିପୋର୍ଟ: ପୀତାମ୍ବର ସାହୁ
