ଭୁବନେଶ୍ୱର,୪।୧(ବ୍ୟୁରୋ): ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଘୋଷଣାକୁ ଆଉ କିଛିଦିନ ବାକି ରହିଥିବା ବେଳେ ରାଜ୍ୟ ସରକାର ପୌର ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଛନ୍ତି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଆଧାରରେ ନିର୍ବାଚନ ହେବାକୁ ଯାଉଥିବା ୧୦୭ ବିଜ୍ଞାପିତ ଅଞ୍ଚଳ ପରିଷଦ (ଏନ୍ଏସି), ମ୍ୟୁନିସିପାଲିଟି ଏବଂ ମହାନଗର ନିଗମରେ ଓ୍ବାର୍ଡ ପୁନର୍ଗଠନ ଏବଂ ସଂରକ୍ଷଣ କାର୍ଯ୍ୟ ଆରମ୍ଭ କରିବାକୁ ଜିଲାପାଳଙ୍କୁ ନିର୍ଦ୍ଦେଶ ଦିଆଯାଇଛି। ପୌର ପ୍ରଶାସନ ନିର୍ଦ୍ଦେଶକ ସଂଗ୍ରାମଜିତ୍ ନାୟକ ସମସ୍ତ ଜିଲାପାଳଙ୍କୁ ଏ ନେଇ ଚିଠି ଲେଖିଛନ୍ତି। ଜାନୁୟାରୀ ୩ରେ ଓ୍ବାର୍ଡ ପୁନର୍ଗଠନ ଏବଂ ସ୍ଥାନ ସଂରକ୍ଷଣ ନେଇ ମତାମତ ଲୋଡ଼ାଯାଇଛି। ଏ ନେଇ ଜିଲାପାଳମାନେ ଚିଠା ବିଜ୍ଞପ୍ତି ପ୍ରକାଶ କରିଛନ୍ତି। ଜାନୁୟାରୀ ୧୨ ସୁଦ୍ଧା ଆପତ୍ତି ଅଭିଯୋଗ ଗ୍ରହଣର ଶେଷ ତାରିଖ ଧାର୍ଯ୍ୟ କରାଯାଇଥିବା ବେଳେ ୧୩ ତାରିଖ ସୁଦ୍ଧା ଓ୍ବାର୍ଡ ପୁନର୍ଗଠନ ଓ ସ୍ଥାନ ସଂରକ୍ଷଣ କାର୍ଯ୍ୟ ଶେଷ କରି ଜିଲାସ୍ତରରେ ବିିଜ୍ଞପ୍ତି ପ୍ରକାଶ କରିବାକୁ କୁହାଯାଇଛି। ଏହା ବିରୋଧରେ ଆବେଦନ କରିବାକୁ ଜାନୁୟାରୀ ୧୩ରୁ ୨୭ ପର୍ଯ୍ୟନ୍ତ ସମୟ ଧାର୍ଯ୍ୟ କରାଯାଇଛି। ଆସନ୍ତା ୨୮ ତାରିଖରେ ଆବେଦନଗୁଡିକର ଶୁଣାଣି କରାଯିବ। କେବେ ସୁଦ୍ଧା ଓ୍ବାର୍ଡ ପୁନର୍ଗଠନ ଓ ସ୍ଥାନ ସଂରକ୍ଷଣ ନେଇ ବିଜ୍ଞପ୍ତି ପ୍ରକାଶ କରାଯିବ ତାହା ପରବର୍ତ୍ତୀ ସମୟରେ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ଜଣାଇ ଦିଆଯିବ। ଏ ଦିଗରେ ତୁରନ୍ତ କାର୍ଯ୍ୟ ଆରମ୍ଭ କରିବା ସହ ବିଭାଗକୁ ନିୟମିତ ଜଣାଇବାକୁ ଜିଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି। ସୁପ୍ରିମକୋର୍ଟ ୨୦୨୧ ଡିସେମ୍ବର ୬ ଏବଂ ୨୧ରେ ଦେଇଥିବା ରାୟ ଅନୁସାରେ ପଛୁଆବର୍ଗମାନଙ୍କର ସ୍ଥାନ ସଂରକ୍ଷଣ ହେବ। ଅନୁସୂଚିତ ଅଞ୍ଚଳକୁ ଛାଡ଼ି ଅନ୍ୟାନ୍ୟ ସ୍ଥାନରେ ମ୍ୟୁନିସିପାଲିଟି ଏବଂ ଏନ୍ଏସି ଅଞ୍ଚଳକୁ ବିଭକ୍ତ କରି ଓ୍ବାର୍ଡ ପୁନର୍ଗଠନ କରିବା ସହ ଅନୁସୂଚିତ ଜାତି, ଜନଜାତି ଓ ମହିଳାଙ୍କ ପାଇଁ ସ୍ଥାନ ସଂରକ୍ଷଣ କରାଯିବ। ସେହିପରି ୨୦୧୧ ଜନଗଣନା ଅନୁଯାୟୀ ମହାନଗର ନିଗମ ଅଞ୍ଚଳରେ ଓ୍ବାର୍ଡ ପୁନର୍ଗଠନ ଏବଂ ଓଡ଼ିଶା ମ୍ୟୁନିସିପାଲ ଆଇନ-୧୯୫୦ର ଧାରା ୧୨(୩)(ବି)(୧) ଓ (୨) ଅନୁସାରେ କରିବାକୁ ନିର୍ଦ୍ଦେଶ ଦିଆଯାଇଛି। ଓ୍ବାର୍ଡ ପୁନର୍ଗଠନ ଓ ସ୍ଥାନ ସଂରକ୍ଷଣକୁ ନେଇ ଥିବା ଆପତ୍ତି ଅଭିଯୋଗ ନିର୍ଦ୍ଧାରିତ ସମୟରେ କେବଳ ଜିଲାପାଳଙ୍କ କାର୍ଯ୍ୟାଳୟର ଅଭିଯୋଗ ବାକ୍ସରେ ଦାଖଲ କରିବାକୁ କୁହାଯାଇଛି। ସେହିପରି ଅନୁଗୋଳ ଜିଲାର ୩, ବଲାଙ୍ଗୀରର ୫, ବାଲେଶ୍ୱରର ୫, ବରଗଡ଼ର ୪, ଭଦ୍ରକର ୪, ବୌଦ୍ଧର ୧, କଟକର ୩, ଦେବଗଡ଼ର ୧, ଢେଙ୍କାନାଳର ୩, ଗଜପତିର ୨, ଗଞ୍ଜାମର ୧୬, ଜଗତ୍ସିଂହପୁରର ୨, ଯାଜପୁରର ୨, ଝାରସୁଗୁଡ଼ାର ୩, କଳାହାଣ୍ଡିର ୪, କେନ୍ଦ୍ରାପଡ଼ାର ୨, କେନ୍ଦୁଝରର ୧, ଖୋର୍ଦ୍ଧାର ୪, ନୟାଗଡ଼ର ୪, ନୂଆପଡ଼ାର ୩, ପୁରୀର ୪, ସମ୍ବଲପୁରର ୧, ସୁବର୍ଣ୍ଣପୁରର ୩ଟି ମ୍ୟୁନିସିପାଲିଟି ଓ ଏନ୍ଏସିରେ ହେବାକୁ ଥିବା ନିର୍ବାଚନ ସମ୍ପର୍କରେ କାର୍ଯ୍ୟ ନିର୍ବାହୀ ଅଧିକାରୀମାନଙ୍କୁ ଜଣାଇ ଦିଆଯାଇଛି। ଏଥିସହିତ ୫ ମହାନଗର ନିଗମର ମଧ୍ୟ ସୀମା ପୁନଃ ର୍ନିଦ୍ଧାରଣ ହେବ। ଜାନୁୟାରୀ ୫ ସୁଦ୍ଧା ମହାନଗର ନିଗମ ସୀମା ପୁନଃ ନିର୍ଦ୍ଧାରଣ ବିଜ୍ଞପ୍ତି ପ୍ରକାଶ ପାଇବ। ଜାନୁଆରୀ ୭ ସୁଦ୍ଧା ଚିଠା ତାଲିକା ପ୍ରକାଶ କରାଯିବ। ଅଣ ଅନୁସୂଚୀତ ଅଞ୍ଚଳରେ ପଛୁଆ ବର୍ଗଙ୍କ ପାଇଁ କୌଣସି ସ୍ଥାନ ସଂରକ୍ଷଣ ରହିବ ନାହିଁ।
ସୂଚନାଯୋଗ୍ୟ ଯେ ରାଜ୍ୟ ସରକାର ୨୦୧୯ରେ ପୌର ନିର୍ବାଚନ କରିବା ସକାଶେ ଓ୍ବାର୍ଡ ପୁନର୍ଗଠନ ଓ ସଂରକ୍ଷଣ କାର୍ଯ୍ୟ ଶେଷ କରିଥିଲେ। ତେବେ ସ୍ଥାନ ସଂରକ୍ଷଣକୁ ନେଇ ହାଇକୋର୍ଟରେ ଚ୍ୟାଲେଞ୍ଜ କରାଯିବାରୁ ପୌର ନିର୍ବାଚନକୁ ଝଟକା ଲାଗିଥିଲା। ସଂରକ୍ଷଣ ସୀମା ୫୦ ପ୍ରତିଶତରୁ ଅଧିକ ହେବ ନାହିଁ ବୋଲି ହାଇକୋର୍ଟ ନିର୍ଦ୍ଦେଶ ଦେବା ପରେ ପୌର ନିର୍ବାଚନ ପ୍ରକ୍ରିୟା ଆରମ୍ଭ ହୋଇପାରି ନ ଥିଲା। ହାଇକୋର୍ଟଙ୍କ ରାୟକୁ ଚ୍ୟାଲେଞ୍ଜ କରି ରାଜ୍ୟ ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ମାତ୍ର ସରକାରଙ୍କ ଆବେଦନକୁ ସର୍ବୋଚ୍ଚ ଅଦାଲତ ଖାରଜ କରିବା ସହ ହାଇକୋର୍ଟଙ୍କ ରାୟକୁ କାଏମ ରଖିଥିଲେ। ଫଳରେ ରାଜ୍ୟ ସରକାର ଓଡ଼ିଶା ମ୍ୟୁନିସିପାଲ ଆଇନ-୧୯୫୦ ଏବଂ ଓଡ଼ିଶା ମହାନଗର ନିଗମ ଆଇନ-୨୦୦୩ରେ ସଂଶୋଧନ କରିବାକୁ ବାଧ୍ୟ ହୋଇଥିଲେ। କ୍ୟାବିନେଟ ଅନୁମୋଦନ ପରେ ପୌର ବିଧି(ସଂଶୋଧନ)ବିଲ୍ -୨୦୨୧କୁ ବିଧାନସଭାରେ ଅନୁମୋଦନ କରାଇଥିଲେ। ଆଇନ ସଂଶୋଧନ ପ୍ରକ୍ରିିୟା ଶେଷ ହୋଇଥିବାରୁ ପୌର ନିର୍ବାଚନ କରିବା ସକାଶେ ସରକାର ଅଣ୍ଟା ଭିଡ଼ିଛନ୍ତି। ଏ ନେଇ ରାଜ୍ୟ ନିର୍ବାଚନ କମିଶନଙ୍କ ପକ୍ଷରୁ ମଧ୍ୟ ପ୍ରସ୍ତୁତି ଆରମ୍ଭ କରିବାକୁ ଜିଲାପାଳମାନଙ୍କୁ ନିର୍ଦ୍ଦେଶ ଦିଆଯାଇସାରିଛି। ସ୍ଥାନ ସଂରକ୍ଷଣ ବ୍ୟବସ୍ଥା ଆଇନ ଜାଲରେ ଛନ୍ଦି ହୋଇପଡିଥିବାରୁ ଗତ ୩ ବର୍ଷ ଧରି ରାଜ୍ୟ ସରକାର ପୌର ନିର୍ବାଚନ କରିବାରେ ସକ୍ଷମ ହୋଇ ପାରି ନ ଥିଲେ।
