ଭଞ୍ଜନଗର,୨୨।୭(ଡି.ଏନ.ଏ)- ସ୍ବାବ୍ ସଂଗ୍ରହର ୧୦ ଦିନ ପରେ ରିପୋର୍ଟ ପଜିଟିଭ ଆସିଲା। ସେତେବେଳକୁ ସମ୍ପୃକ୍ତ ବ୍ୟକ୍ତିଙ୍କ ମୃତ୍ୟୁ ଘଟି ସାରିଥିଲା। ପରିବାର ଲୋକେ ଓ ସମ୍ପର୍କୀୟ ସଂସ୍କାର କରିଦେଇଥିଲେ। ଏହାର କିଛି ଘଣ୍ଟା ପରେ ପ୍ରଶାସନ ପକ୍ଷରୁ କରୋନା ପଜିଟିଭ ନେଇ ପରିବାର ଲୋକଙ୍କୁ ସୂଚନା ଦିଆଗଲା। ଖବର ଶୁଣି ଶବବାହକ ଓ ପରିବାର ଲୋକଙ୍କ ମଧ୍ୟରେ ଆତଙ୍କ ଖେଳି ଯାଇଛି। ଏଭଳି ଘଟଣା ଘଟିଛି ଗଞ୍ଜାମ ଜିଲା ଭଞ୍ଜନଗର ଏନ୍ଏସି ଅଞ୍ଚଳରେ। ମୃତ ବ୍ୟକ୍ତି ଜଣେ ସରକାରୀ କର୍ମଚାରୀ ଓ ସେ ଚଳିତ ମାସ ୩୧ ତାରିଖରେ ଅବସର ନେଇଥାନ୍ତେ।
ପ୍ରକାଶ ଯେ, ଗତ ୧୨ ତାରିଖରେ ସମ୍ପୃକ୍ତ ସରକାରୀ କର୍ମଚାରୀଙ୍କୁ ଜ୍ୱର ହୋଇଥିବାରୁ ଭଞ୍ଜନଗରରେ ହୋଇଥିବା ସେଣ୍ଟରରେ ସ୍ବାବ୍ ଦେଇଥିଲେ। ତାଙ୍କର ଅନ୍ୟ ରୋଗ ଥିବାରୁ ସେ ଶନିବାର ରାତିରେ ଅସୁସ୍ଥ ହୋଇ ପଡିଥିଲେ। ତାଙ୍କୁ ବ୍ରହ୍ମପୁର ବଡ ମେଡିକାଲରେ ଭର୍ତ୍ତି କରାଯାଇଥିଲା। ୧୦ଦିନ ପରେ ୨୧ ତାରିଖ ରାତିରେ ରିପୋର୍ଟ ପଜିଟିଭ ଆସିଥିଲା। ସେହି ରାତିରେ ତାଙ୍କର ବ୍ରହ୍ମପୁରର ବଡ ମେଡିକାଲରେ ମୃତ୍ୟୁ ଘଟିଥିଲା। ମୃତଦେହ ୨୨ ତାରିଖ (ବୁଧବାର) ସକାଳେ ଗଁାରେ ପହଞ୍ଚତ୍ବା ପରେ ଜାମପଲ୍ଲୀ ଶ୍ମଶାନରେ ସଂସ୍କାର କରାଯାଇଥିଲା। ଏହାର କିଛିସମୟ ପରେ ପ୍ରଶାସନ ପକ୍ଷରୁ ରିପୋର୍ଟ ପଜିଟିଭ ନେଇ ପରିବାର ଲୋକଙ୍କୁ ସୂଚନା ଦିଆଯାଇଥିଲା। ତାଙ୍କର ମୃତ୍ୟୁ ଘଟିଥିବା ପରିବାର ଲୋକେ କହିଥିଲେ। ସେ ଚାକିରି କରିଥିବା ଅଫିସର କର୍ମଚାରୀ ମୃତଦେହ ସଂସ୍କାରବେଳେ ଉପସ୍ଥିତ ଥିବାରୁ ସେମାନଙ୍କୁ କ୍ୱାରାଣ୍ଟାଇନ୍ରେ ରହିବାକୁ ବିଭାଗୀୟ ଅଧିକାରୀ ନିର୍ଦ୍ଦେଶ ଦେଇଛନ୍ତି। ରିପୋର୍ଟ ଆସିବା ସଙ୍ଗେ ସଙ୍ଗେ ପ୍ରଶାସନ ଜଣାଇଥିଲେ ଏତେ ସମସ୍ୟା ହୋଇ ନଥାନ୍ତା ବୋଲି ପରିବାର ଲୋକେ କହିଛନ୍ତି।
