ମୁମ୍ବାଇ: ବଣ୍ଡ ଏବଂ କରେନ୍ସି ମାର୍କେଟର ଟ୍ରେଡିଂ ସମୟ ସୀମାକୁ ବଢ଼ାଇବା ଲାଗି ରିଜର୍ଭ ବ୍ୟାଙ୍କ ସୋମବାର ନିଷ୍ପତ୍ତି ଗ୍ରହଣ କରିଛି। ରିଜର୍ଭ ବ୍ୟାଙ୍କ ଏହାଦ୍ୱାରା ନିୟନ୍ତ୍ରିତ ବିଭିନ୍ନ ବଜାରର ଟ୍ରେଡିଂ ସମୟକୁ ପୁଣି ଥରେ ବ୍ୟବସ୍ଥିତ କରିବା ଲାଗି ଏଭଳି ପଦକ୍ଷେପ ହାତକୁ ନେଇଛି। ନଭେମ୍ବର ୯ରୁ ପର୍ଯ୍ୟାୟକ୍ରମେ ଏହା ହେବ। ନୂଆ ନିୟମ ମୁତାବକ ବଣ୍ଡ ଏବଂ କରେନ୍ସି ମାର୍କେଟର ଟ୍ରେଡିଂ ସମୟକୁ ୧.୫୦ ଘଣ୍ଟା ବଢ଼ାଯାଇଛି। ଫଳରେ ଏହି ବଜାର ୩.୩୦ରେ ବନ୍ଦ ହେବ। ପୂର୍ବରୁ ଏହା ୨ଟାରେ ବନ୍ଦ ହୋଇଯାଉଥିଲା। ସରକାରୀ ପ୍ରତିଭୂତିରେ ମାର୍କେଟ ରେପୋ ଆସନ୍ତା ସପ୍ତାହଠାରୁ ପୂର୍ବାହ୍ନ ୧୦ରୁ ଅପରାହ୍ନ ୨.୩୦ ଯାଏ କାମ କରିବ। ସରକାରୀ ପ୍ରତିଭୂତିରେ ତୃତୀୟ ପକ୍ଷ ରେପୋ ୧୦ରୁ ୩ଟା ଯାଏ ଚାଲିବ। ଲକ୍ଡାଉନ ଘୋଷଣା ପରେ ଏପ୍ରିଲ ୭ରୁ ଟ୍ରେଡିଂ ସମୟକୁ ଆର୍ବିଆଇ କମାଇ ଦେଇଥିଲା। ସବୁ ବର୍ଗର ମାର୍କେଟ ଖୋଲିବା ସମୟକୁ ସକାଳ ୧୦ ପରିବର୍ତ୍ତେ ସକାଳ ୯ଟା କରାଯାଇଥିଲା। ସେହିଭଳି କ୍ଲୋଜିଂ ସମୟ ୨ଟା ରହିଥିଲା। ସେହିଭଳି କମର୍ସିଆଲ ପେପର, ସାର୍ଟିଫିକେଟ ଅଫ୍ ଡିପୋଜିଟ, କର୍ପୋରେଟ ବଣ୍ଡ ରେପୋ, ସରକାରୀ ପ୍ରତିଭୂତି, ବିଦେଶୀ ମୁଦ୍ରା, ଭାରତୀୟ ଟଙ୍କା ସହ ଫରେନ୍ସ ଡେରିଭେଟିଭ, ରୁପି ଇଣ୍ଟରେଷ୍ଟ ରେଟ୍ ଡେରିଭେଟିଭ୍, କଲ୍, ନୋଟିସ ଏବଂ ଟର୍ମ ମନି ଟ୍ରେଡିଂ ସମୟକୁ ୩.୩୦ ଯାଏ ବଢ଼ାଯାଇଥିବା ଜଣାପଡିଛି।
