ଆଡିଲେଡ୍,୨୧।୧୨(ପି.ଟି.): ସିଡ୍ନୀରେ କୋଭିଡ୍-୧୯ ମହାମାରୀ ପ୍ରକୋପ ଦେଖିବାକୁ ମିଳିଛି। କରୋନା ସଂକ୍ରମଣ ବୃଦ୍ଧି ଘଟିଛି। ଫଳରେ ତୃତୀୟ ଓ ଚତୁର୍ଥ ଟେଷ୍ଟର ଭେନ୍ୟୁରେ ଅଦଳବଦଳ କରିବାକୁ ଅଷ୍ଟ୍ରେଲିଆ ବିଚାର କରୁଛି। ସିଡ୍ନୀ କ୍ରିକେଟ ଗ୍ରାଉଣ୍ଡ (ଏସ୍ସିଜି)ରେ ତୃତୀୟ ଓ ବ୍ରିସ୍ବେନର ଗାବା ଷ୍ଟାଡିୟମରେ ଚତୁର୍ଥ ତଥା ଅନ୍ତିମ ଟେଷ୍ଟ ଯଥାକ୍ରମେ ଜାନୁୟାରୀ ୭ ଓ ୧୫ ତାରିଖରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ତେବେ କୋଭିଡ୍-୧୯ କାରଣରୁ ଚତୁର୍ଥ ଟେଷ୍ଟ ସିଡ୍ନୀରେ ଓ ତୃତୀୟ ଟେଷ୍ଟ ବ୍ରିସ୍ବେନ୍ରେ ଆୟୋଜନ କରିବାକୁ ସିଏ ବିଚାର କରୁଛି ବୋଲି ରିପୋର୍ଟ ପ୍ରକାଶ ପାଇଛି। ତେବେ ପୂର୍ବନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ସିଡ୍ନୀରେ ତୃତୀୟ ଟେଷ୍ଟ ଆୟୋଜନକୁ ଆମେ ପ୍ରାଥମିକତା ଦେବୁ ଓ ଏ ନେଇ ଆମେ ଆଶାବାଦୀ ଅଛୁ ବୋଲି ସିଏ ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ହୋକ୍ଲି କହିଛନ୍ତି।
ସିଡ୍ନୀରେ କରୋନା ମାମଲା ବୃଦ୍ଧି ପାଉଥିବାରୁ ସିଏ ତା’ର ଅଧିକାରୀମାନଙ୍କୁ ସତର୍କ ରହିବାକୁ ନିର୍ଦ୍ଦେଶ ଦେଇଛି। ଏଠାରେ କରୋନା ମାମଲା ୭୧କୁ ବୃଦ୍ଧି ପାଇଛି। ଅବଶ୍ୟ କରୋନା ସଂକ୍ରମଣକୁ ରୋକିବା ପାଇଁ ନ୍ୟୁ ସାଉଥ୍ଓ୍ବେଲ୍ସ ସରକାର କେତେକ କଡ଼ା ପଦକ୍ଷେପ ଗ୍ରହଣ କରୁଛନ୍ତି ଓ ବିଭିନ୍ନ କଟକଣା ଜାରି କରିଛନ୍ତି। କାର୍ଯ୍ୟସୂଚୀରେ ଆମେ କୌଣସି ପରିବର୍ତ୍ତନ କରିନାହୁଁ ହୋକ୍ଲି କହିଛନ୍ତି। ଜାନୁୟାରୀ ୨୬ରେ ମେଲବୋର୍ନରେ ବକ୍ସିଂ ଡେ ଟେଷ୍ଟ ଆରମ୍ଭ ହେବ। ସିଡ୍ନୀରେ କରୋନାର ବର୍ଦ୍ଧିତ ମାମଲା ପ୍ରସାରଣକାରୀ ସଂସ୍ଥାଗୁଡିକୁ ପ୍ରଭାବିତ କରିବାର ଆଶଙ୍କା ସୃଷ୍ଟି ହୋଇଛି।
