କୋଟପାଡ଼,୫ା୧୦(ଡି.ଏନ.ଏ.): କୋରାପୁଟ ଜିଲା କୋଟପାଡ଼ର ବ୍ରାହ୍ମଣସାହି-ସୌରାସାହି ଗଳି ନିକଟରୁ ଦୁଇଜଣ ଦୁର୍ବୃତ୍ତ ମହିଳାଙ୍କଠାରୁ ମଙ୍ଗଳବାର ଦିନ ଦ୍ୱିପ୍ରହରରେ ୫ଲକ୍ଷ ଟଙ୍କା ଲୁଟ୍ କରି ନେଇଛନ୍ତି। କରଣସାହିର ଶ୍ରୀଜଗନ୍ନାଥ ଏସ୍ଏଚ୍ଜିର ୨ ଜଣ ମହିଳା ଟଙ୍କା ଉଠାଇବାକୁ କୋଟପାଡ ଷ୍ଟେଟବ୍ୟାଙ୍କକୁ ଯାଇଥିଲେ। ବ୍ୟାଙ୍କରୁ ୫ଲକ୍ଷ ଟଙ୍କା ଉଠାଇ ସେମାନେ ଘରକୁ ଫେରୁଥିଲେ। ମାତ୍ର ଉଭୟେ ବ୍ୟାଙ୍କଠାରୁ ୧୦୦ ମିଟର ଦୂର ଯିବା ପରେ ଦୁଇ ଜଣ ଦୁର୍ବୃତ୍ତ ଏକ ମୋଟରସାଇକେଲରେ ଆସି ଟଙ୍କା ବ୍ୟାଗ୍ ଛଡାଇ ଫେରାର ହୋଇଯାଇଥିଲେ। ମହିଳା ଜଣକ ବ୍ୟାଙ୍କକୁ ଆସି କହିବାରୁ ତୁରନ୍ତ କୋଟପାଡ ଥାନାକୁ ଅବଗତ କରାଯାଇଥିଲା। ପୋଲିସ ଦୁର୍ବୃତ୍ତମାନଙ୍କ ପିଛା କରିଥିଲେ। ପୋଲିସ ସେମାନଙ୍କୁ ପିଛା କରୁଥିବା ଜାଣି ଦ୍ରୁତଗତିରେ ପଳାଇଥିଲେ। ସସାହାଣ୍ଡି ନୂଆଗାଁ ନିକଟରେ ଦୁର୍ବୃତ୍ତଙ୍କୁ ପୋଲିସ କାବୁ କରିବାକୁ ଚେଷ୍ଟା କରୁଥିବା ବେଳେ ପୋଲିସ ଗାଡ଼ି ଦୁର୍ଘଟଣା ଗ୍ରସ୍ତ ହୋଇଥିଲା। ଫଳରେ ଦୁର୍ବୃତ୍ତମାନେ ଫେରାର ହୋଇଯାଇଥିଲେ। ପୋଲିସ ଗାଡ଼ି ଦୁର୍ଘଟଣା ଯୋଗୁ ଥାନା ଅଧିକାରୀ ଶେଷଦେବ ବେହେରା ଓ ତାଙ୍କ ସହ ଥିବା କର୍ମଚାରୀ ଗୁରୁତର ଆହତ ହେଇଛନ୍ତି। ବ୍ୟାଙ୍କ ସିସିଟିଭି ଓ ସହରାଞ୍ଚଳର ପ୍ରତ୍ୟେକ ଛକରେ ଥିବା ସିସିଟିଭି ଫୁଟେଜଗୁଡିକ ଯାଞ୍ଚ କରାଯାଉଛି। ଅଭିଯୁକ୍ତମାନେ ନିଶ୍ଚିତ ଧରାପଡ଼ିବେ ବୋଲି ବେହେରା କହିଛନ୍ତି।
