ହାଇଦ୍ରାବାଦ,୧୧ା୮: ଚେନ୍ନାଇରେ ଏୟାର ଇଣ୍ଡିଆ ବିମାନ ପ୍ରାୟ ଦୁଇ ଘଣ୍ଟା ପବନରେ ଝୁଲି ରହିବା ପରେ ଜରୁରୀ ଅବତରଣ କରିଛି। ଥିରୁଭାନନ୍ତପୁରମ୍ରୁ ଦିଲ୍ଲୀ ଯାଉଥିବା ବିମାନଟି ଜରୁରୀ ଅବତରଣ କରିଛି। ତେବେ ଯାନ୍ତ୍ରିକ ତ୍ରୁଟି ଓ ଖରାପ ପାଗ ଯୋଗୁ ଏହି ବିମାନ ଚେନ୍ନାଇରେ ଅବତରଣ କରିଛି। ଏହି ବିମାନରେ ଏକାଧିକ ଏମ୍ପିଙ୍କ ସମେତ ୧୦୦ରୁ ଊଦ୍ଧର୍ବ ଯାତ୍ରୀ ଥିଲେ।
ବରିଷ୍ଠ କଂଗ୍ରେସ ନେତା ତଥା ଏମ୍ପି କେ.ସି. ବେଣୁଗୋପାଳ ସୋମବାର ୧୧ ଅଗଷ୍ଟରେ ସୋସିଆଲ ମିଡିଆ ‘ଏକ୍ସ’ରେ ପୋଷ୍ଟ କରିଛନ୍ତି। ସେ କହିଛନ୍ତି ଯେ, ତ୍ରିଭେନ୍ଦ୍ରମରୁ ଦିଲ୍ଲୀ ଯାଉଥିବା ଏୟାର ଇଣ୍ଡିଆର ବିମାନ ନମ୍ବର ଏଆଇ- ୨୪୫୫, ଯେଉଁଥିରେ ମୁଁ, ଅନେକ ଏମ୍ପି ଏବଂ ଶହଶହ ଯାତ୍ରୀ ଯାତ୍ରା କରୁଥିଲେ, ଆଜି ଭୟଙ୍କର ଦୁର୍ଘଟଣାର ନିକଟତର ହୋଇଥିଲା। ଉଡ଼ାଣ ଭରିବାର କିଛି ସମୟ ପରେ ଅଭୂତପୂର୍ବ ଅସ୍ଥିରତାର ସମ୍ମୁଖୀନ ହୋଇଥିଲୁ।
ସେ ଆହୁରି ମଧ୍ୟ କହିଛନ୍ତି, ପ୍ରାୟ ୧ ଘଣ୍ଟା ପରେ କ୍ୟାପ୍ଟେନ ବିମାନ ସିଗନାଲରେ ତ୍ରୁଟି ଘୋଷଣା କଲେ ଏବଂ ବିମାନକୁ ଚେନ୍ନାଇ ଆଡ଼କୁ ବୁଲାଇଲେ। ପ୍ରାୟ ଦୁଇ ଘଣ୍ଟା ପର୍ଯ୍ୟନ୍ତ ଆମେ ଅବତରଣ ଅନୁମତି ପାଇଁ ଅପେକ୍ଷା କରି ବିମାନବନ୍ଦର ପରିକ୍ରମା କରିଥିଲୁ। କୁହାଗଲା ଯେ, ସମାନ ରନଓ୍ବେରେ ଆଉ ଏକ ବିମାନ ଅଛି। ସେହି ମୁହୂର୍ତ୍ତରେ କ୍ୟାପ୍ଟେନ ତୁରନ୍ତ ଅଟକିବାର ନିଷ୍ପତ୍ତି ବିମାନରେ ଥିବା ସମସ୍ତ ଲୋକଙ୍କ ଜୀବନ ରକ୍ଷା କରିଥିଲା। ଦ୍ୱିତୀୟ ପ୍ରୟାସରେ ବିମାନଟି ସୁରକ୍ଷିତ ଭାବରେ ଅବତରଣ କରିଥିଲା।
ସେ କହିଥିଲେ, ଆମେ ଦକ୍ଷତା ଏବଂ ଭାଗ୍ୟ ସହିତ ବଞ୍ଚିଛୁ, କିନ୍ତୁ ଯାତ୍ରୀଙ୍କ ସୁରକ୍ଷା ଭାଗ୍ୟ ଉପରେ ନିର୍ଭର କରିପାରିବ ନାହିଁ। ମୁଁ ଡିଜିସିଏ ଏବଂ ବେସାମରିକ ବିମାନ ଚଳାଚଳ ମନ୍ତ୍ରଣାଳୟକୁ ଏହି ଘଟଣାର ତୁରନ୍ତ ତଦନ୍ତ କରିବାକୁ ଦାୟିତ୍ୱ ସ୍ଥିର କରିବାକୁ ଏବଂ ଏପରି ତ୍ରୁଟି ଯେପରି ଆଉ କେବେ ନ ଘଟେ ତାହା ନିଶ୍ଚିତ କରିବାକୁ ନିବେଦନ କରୁଛି।
ରିପୋର୍ଟ ଅନୁସାରେ, ଏହି ଏୟାର ଇଣ୍ଡିଆ ବିମାନରେ କେରଳ ଏମ୍ପି ତଥା କଂଗ୍ରେସ ମହାସଚିବ କେସି ବେଣୁଗୋପାଳଙ୍କ ସହିତ ୟୁଡିଏଫ୍ ସଂଯୋଜକ ଅଦୂର ପ୍ରକାଶ, ବରିଷ୍ଠ କଂଗ୍ରେସ ନେତା କେ. ସୁରେଶ, କେ. ରାଧାକ୍ରିଷ୍ଣନ ଏବଂ ତାମିଲନାଡୁ ଏମ୍ପି ରବର୍ଟ ବ୍ରୁସ୍ ଥିଲେ।
