ଜେକେପୁର,୨୯/୭(ରାଜେଶ ବିଶାଳ): ଜେକେପୁର ଠାରୁ ରାୟଗଡ଼ା ଆସୁଥିବା ଏକ ପିକଅପ ଭ୍ୟାନ (ନଂ ଓଡ଼ି୧୮ପି୦୪୬୭) ନାଇଡୁପେଟା ବ୍ରିଜ ନିକଟରେ ଭାରସାମ୍ୟ ହରାଇ ଦ୍ରୁତ ଗତିରେ ଅଙ୍ଗନବାଡ଼ି କେନ୍ଦ୍ର ପାଚେରୀ ଭିତରକୁ ମାଡ଼ିଯାଇଥିଲା। ତେବେ ଗାଡ଼ିଟି ଅଟକି ରହିଯିବାରୁ ଅଳ୍ପକେ ବର୍ତ୍ତିଗଲେ ଅଙ୍ଗନବାଡ଼ି କେନ୍ଦ୍ରରେ ଅଧ୍ୟୟନରତ ଛାତ୍ରୀଛାତ୍ର।
ଘଟଣାରୁ ପ୍ରକାଶ ଯେ, ଗାଡ଼ିଟି ରାୟଗଡ଼ା ଆସୁଥିବା ବେଳେ ସମ୍ମୁଖରୁ ଏକ ମୋଟରସାଇକେଲ ଆସୁଥିବା ଦେଖି ବ୍ରେକ ମାରିବାକୁ ଚେଷ୍ଟା କରିଥିଲା। ହେଲେ ଭୁଲ ବଶତଃ ଭାରସାମ୍ୟ ହରାଇ ଅଙ୍ଗନବାଡ଼ି କେନ୍ଦ୍ର ମଧ୍ୟକୁ ମାଡ଼ିଯାଇଥିଲା। ସେଠାରୁ ଡ୍ରାଇଭର ଗାଡ଼ି ଛାଡ଼ି ଫେରାର ହୋଇଯାଇଥିବା ଦେଖିବାକୁ ମିଳିଛି। ଦେଖଣାହାରୀଙ୍କ କହିବା ଅନୁଯାୟୀ, ବୋଧେ ବ୍ରେକ ବଦଳରେ ଡ୍ରାଇଭର ଏକ୍ସିଲେଟର ମାଡ଼ି ଦେଇଥିବା ଯୋଗୁଁ ଏହିଭଳି ଅଘଟଣ ଘଟିଛି। ତେବେ କୌଣସି ଜୀବନହାନୀ ହୋଇ ନ ଥିବା ଜଣାପଡିଛି। ଖବରପାଇ ଚାନ୍ଦିଲି ପୋଲିସ ଘଟଣାସ୍ଥଳରେ ପହଞ୍ଚିଥିଲେ।
