ବାରିପଦା ଅଫିସ,୮ା୫: ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ସମୟରେ ବିଦ୍ୟୁତ୍ ବିଭ୍ରାଟ ନେଇ ଆରୋପ ପ୍ରତ୍ୟାରୋପ ଚାଲିଥିବା ବେଳେ ସୁରକ୍ଷା ବ୍ୟବସ୍ଥାରେ ସାଂଘାତିକ ତ୍ରୁଟି ପରିଲକ୍ଷିତ ହୋଇଛି। ଗସ୍ତ ସମୟରେ ନିୟୋଜିତ ଥିବା ଜଣେ ଫାର୍ମାସିଷ୍ଟ ରାଷ୍ଟ୍ରପତିଙ୍କ ଗମନାଗମନରେ ନିୟୋଜିତ ହେଲିକପ୍ଟର ପାଖକୁ ଯାଇ ଫଟୋ ଉଠାଇଥିବା ଦେଖିବାକୁ ମିଳିଛି। ଫଟୋକୁ ଫେସ୍ବୁକ୍ ଆକାଉଣ୍ଟରେ ପୋଷ୍ଟ
କରିବା ପରେ ବିବାଦୀୟ ସ୍ଥିତି ଉପୁଜିବା ଦେଖି ସେ ଫଟୋଗୁଡ଼ିକ ଡିଲିଟ କରିଦେଇଛନ୍ତି। ପ୍ରକାଶ ଯେ, ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ୩ଦିନିଆ ମୟୂରଭଞ୍ଜ ଜିଲା ଗସ୍ତର ଦ୍ୱିତୀୟ ଦିନ ଅର୍ଥାତ୍ ଶୁକ୍ରବାର ରାଷ୍ଟ୍ରପତି ଶିମିଳିପାଳ ବୁଲିବାକୁ ଯାଇଥିଲେ। ରାଇରଙ୍ଗପୁରରୁ ଯଶିପୁର ଛେଳିଗୁଦୁଳି ଅସ୍ଥାୟୀ ହେଲିପ୍ୟାଡ୍ରେ ପହଞ୍ଚତ୍ ସେଠାରୁ ସଡ଼କ ପଥରେ ଯାଇଥିଲେ। ୪ ଘଣ୍ଟା ଧରି ହେଲିକପ୍ଟର ହେଲିପ୍ୟାଡ୍ରେ ଅଟକି ଥିଲା। ଏହି ସମୟରେ ଫାର୍ମାସିଷ୍ଟ ଯଶୋବନ୍ତ ବେହେରା ସୁରକ୍ଷା ବଳୟ ପାର୍ କରି ରାଷ୍ଟ୍ରପତିଙ୍କୁ ନେଇ ଆସିଥିବା ୩ଟି ହେଲିକପ୍ଟର ପାଖକୁ ଯାଇ ଗୋଟିଏରେ ସେଲ୍ଫି ନେବା ସହିତ ଅନ୍ୟ ଦୁଇ ହେଲିକପ୍ଟର ପାଖରେ ଫଟୋ ଉଠାଇଥିଲେ। ଦୁଇଟି ଫଟୋ ମଧ୍ୟରୁ ଗୋଟିକରେ ସେ ହେଲିକପ୍ଟରର ଏକ ଅଂଶରେ ବସିଥିବା ଦେଖାଯାଉଛି। ଅନ୍ୟଟିର ସମ୍ମୁଖ ଭାଗରେ ହାତରେ ଭରା ଦେଇ ଛିଡ଼ା ହୋଇଛନ୍ତି। ଦୁଇଟି ଫଟୋକୁ ଉଠାଇଥିବା ବ୍ୟକ୍ତି ଓ ଫାର୍ମାସିଷ୍ଟ ଜଣକ କିପରି ହେଲିକପ୍ଟର ପାଖକୁ ଗଲେ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସୁରକ୍ଷା ଦାୟିତ୍ୱରେ ଥିବା ଅଧିକାରୀ ଓ କର୍ମଚାରୀମାନଙ୍କ ଅବହେଳା କାରଣରୁ ଏପରି ଘଟିଛି ବୋଲି ସାଧାରଣରେ ଆଲୋଚନା ହେଉଛି। ଏହାର ଉଚ୍ଚସ୍ତରୀୟ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି।
