ଭୁବନେଶ୍ୱର,୧୬ା୧୧(ବ୍ୟୁରୋ): ୨୦୧୯ ଏପ୍ରିଲ ପହିଲା ପୂର୍ବରୁ ପଞ୍ଜୀକୃତ ହୋଇଥିବା ଯେଉଁ ସବୁ ଗାଡିର ଶେଷ ନମ୍ବର ୧,୨,୩,୪ ହୋଇଥିବ ସେହି ଯାନବାହନଗୁଡ଼ିକର ହାଇ ସିକ୍ୟୁରିଟି ରେଜିଷ୍ଟ୍ରେଶନ୍ ପ୍ଲେଟ୍ (ଏଚ୍ଏସ୍ଆର୍ପି) ଲଗେଇବାର ସମୟସୀମା ନଭେମ୍ବର ୩୦ରେ ଶେଷ ହେବ। ନିର୍ଦ୍ଧାରିତ ସମୟସୀମା ଅନୁଯାୟୀ ଯାନବାହନ ମାଲିକ ସେମାନଙ୍କ ଗାଡ଼ିରେ ଏଚ୍ଏସ୍ଆର୍ପି ସଂଲଗ୍ନ କରିବା ପାଇଁ ପଦକ୍ଷେପ ନେବାକୁ ରାଜ୍ୟ ପରିବହନ ପ୍ରାଧିକରଣ(ଏସ୍ଟିଏ) ପକ୍ଷରୁ ସଚେତନ କରାଯାଇଛି। ଏହି ସମୟ ସୀମା ପରେ ଜରିମାନା ଆଦାୟ କରାଯିବ। ପରିବହନ ଯୁଗ୍ମ କମିଶନର ଦୀପ୍ତିରଞ୍ଜନ ପାତ୍ର କହିଛନ୍ତି, ନଭେମ୍ବର ୧୪ ତାରିଖ ସୁଦ୍ଧା ରାଜ୍ୟରେ ମୋଟ ୩୧,୨୫,୨୩୬ ଗାଡ଼ି ମାଲିକ ସ୍ଲଟ୍ ବୁକ୍ କରିଛନ୍ତି। ସେଥିରୁ ୧୫,୩୦,୫୭୬ ଯାନରେ ଏଚ୍ଏସ୍ଆର୍ପି ଲଗାଯାଇଛି। ଗାଡ଼ି ମାଲିକଙ୍କ ସୁବିଧା ପାଇଁ ବିଭାଗ ସମୟସୀମାକୁ ୩ ଥର ବୃଦ୍ଧି କରାଯାଇଛି। ଯେଉଁ ଗାଡ଼ି ମାଲିକମାନଙ୍କର ଇଣ୍ଟରନେଟର ବ୍ୟବହାର କିମ୍ବା ଟେକ୍ନୋଲୋଜି ବିଷୟରେ କୌଣସି ଜ୍ଞାନ ନାହିଁ, ସେମାନଙ୍କ ସୁବିଧା ଅନୁଯାୟୀ ନିକଟସ୍ଥ ମୋ ସେବା କେନ୍ଦ୍ର କିମ୍ବା ଏଚ୍ଏସ୍ଆର୍ପି ସୁବିଧା କେନ୍ଦ୍ରରେ ଆରଟିଓ ମାଧ୍ୟମରେ ଆବେଦନ କରିପାରିବେ।
ଓଇଏମ୍(ଯାନ ନିର୍ମାତା) ସେମାନଙ୍କର ପ୍ରାଧିକୃତ ବିକ୍ରେତାଙ୍କ ମାଧ୍ୟମରେ ୮୮ ଟି ସ୍ଥାନରେ ଏବଂ ରାଜ୍ୟର ଅନ୍ୟାନ୍ୟ ସ୍ଥାନରେ କ୍ୟାମ୍ପ ଫିଟ୍ମେଣ୍ଟ ସେଣ୍ଟର/ଅସ୍ଥାୟୀ ଫିଟ୍ମେଣ୍ଟ ସେଣ୍ଟର ଖୋଲିଛନ୍ତି। ଏହାଛଡ଼ା କେତେକ ଆରଟିଓ କାର୍ଯ୍ୟାଳୟରେ ଏହି ଫିଟ୍ମେଣ୍ଟ ସୁବିଧା ମଧ୍ୟ ପ୍ରଦାନ କରାଯାଉଛି। ୨୦୧୯ ଏପ୍ରିଲ ପହିଲା ପୂର୍ବରୁ ପଞ୍ଜୀକୃତ ହୋଇଥିବା ପୁରୁଣା ତଥା ସ୍ଥାନୀୟ ଉତ୍ପାଦିତ ଟ୍ରେଲର ଏବଂ ଯାନ ସହିତ ଏଚ୍ଏସ୍ଆର୍ପିର ଫିଟ୍ମେଣ୍ଟ, ଯାହାର ଉତ୍ପାଦକମାନେ ସେମାନଙ୍କ ବ୍ୟବସାୟ ବନ୍ଦକରି ଦେଇଛନ୍ତି ସେହି ସ୍ଥାନରୁ କିଣାଯାଇଥିବା ଗାଡି ଆରଟିଓରେ କରାଯାଇପାରିବ। ଆରଟିଓ କାର୍ଯ୍ୟାଳୟରେ କେବଳ ବାହାନ୍ ପୋର୍ଟାଲ ମାଧ୍ୟମରେ ଆବେଦନ କରାଯାଇ ପାରିବ। ଏଚ୍ଏସ୍ଆରପି ନମ୍ବର ପ୍ଲେଟ ବଦଳାଇବା ସମୟରେ କିମ୍ବା ଅନ୍ୟ କୌଣସି କାରଣବଶତଃ ଏଥିରେ କିଛି କ୍ଷତି ହେଲେ ଯାନବାହନ ମାଲିକ ଏହାର ରିପ୍ଲେସମେଣ୍ଟ ପାଇଁ ବୁକିଂ କରିପାରିବେ। ସମସ୍ତ ଅଟୋ ମୋବାଇଲ୍ ନିର୍ମାତା ଏବଂ ଓଇଏମ୍ର ପ୍ରାଧିକୃତ ବିକ୍ରେତାମାନଙ୍କୁ ଏ ବିଷୟରେ ଏକ ଷ୍ଟାଣ୍ଡାର୍ଡ ଅପରେଟିଂ (ଏସଓପି) ପ୍ରଣାଳୀ ପ୍ରଦାନ କରାଯାଇଛି।
