ଯୋଡ଼ା,୩୦ା୧୦(ମାନସ ମହାନ୍ତି): ବିଦ୍ୟୁତ୍ ସଂଯୋଗ ନିମନ୍ତେ ବର୍ଷ ବର୍ଷ ଧରି ସରକାରଙ୍କ ନିକଟରେ ଦାବି ଜଣାଇ ଆସୁଥିଲେ। ଏପରିକି ପ୍ରତି ନିର୍ବାଚନ ସମୟରେ ବିଦ୍ୟୁତ୍ ସମସ୍ୟା ସମାଧାନ ନେଇ ନେତାମାନେ ପ୍ରତିଶ୍ରୁତି ଦେଇଥିଲେ ମଧ୍ୟ କେହି ପଦକ୍ଷେପ ଗ୍ରହଣ କରୁ ନ ଥିଲେ। ବାରମ୍ବାର ଦାବି ପରେ ଯଦିଓ ସରକାର ବସ୍ତିକୁ ବିଦ୍ୟୁତ୍ ସଂଯୋଗ କରିନାହାନ୍ତି। ତେବେ ସୋଲାର ଲାଇଟ ସ୍ଥାପନ କରି ବସ୍ତିକୁ ଆଲୋକିତ କରି ଥିବାରୁ କେନ୍ଦୁଝର ଜିଲା ଯୋଡ଼ା ବ୍ଲକ୍ର ଭୂୟାଁ ରୋଇଡ଼ା ପଞ୍ଚାୟତର ମାଙ୍କଡ଼ହଟିଂବାସୀ ଖୁସିବ୍ୟକ୍ତ କରିଛନ୍ତି।
ଯେ, ମାଙ୍କଡ଼ହଟିଂରେ ଆଦିବାସୀ ଲୋକେ ବସବାସ କରନ୍ତି। ଗ୍ରାମକୁ ବିଦ୍ୟୁତ୍ ସଂଯୋଗ ହୋଇ ନ ଥିବାରୁ ରାତି ସମୟରେ ଜଙ୍ଗଲ ପରିବେଷ୍ଟିତ ଜନବସତିରେ ନିଜର ଜୀବନ ସୁରକ୍ଷା ପାଇଁ ଲଣ୍ଠନ ଓ ଡିବିରିବତୀ ହିଁ ସାହାରା ହୋଇଥିଲା। ବିଜୁ ଗ୍ରାମ୍ୟ ଜ୍ୟୋତି ଯୋଜନାରେ ସୋଲାର ଲାଇଟ୍ ସ୍ଥାପନ ପରେ ଜନବସତି ଆଲୋକିତ ହୋଇଛି। ଏ ନେଇ ଗ୍ରାମର ସୁପାଇ ଟପ୍ନୋ, ଗୋପାଲ ଓରାମ, ମଙ୍ଗଲ ମୁଣ୍ଡା, ମହେନ୍ଦ୍ର କେରାଇ, ସମରା ବେଣ୍ଟକାର ପ୍ରମୁଖ କହିଛନ୍ତି, ଖଣିଜ ସମ୍ପଦ ପାଇଁ ଯୋଡ଼ା ବିଶ୍ୱରେ ପରିଚିତ। ଅନେକ ହଜାର କୋଟି ଟଙ୍କାର ରାଜସ୍ବ ସରକାର ଏଠାରୁ ଆଦାୟ କରୁଛନ୍ତି। ବ୍ୟାପକ ଖଣି ଖନନ ପରେ ଜଙ୍ଗଲ, ଜମି, ଜଳ ଓ ପରିବେଶ ଭୁଶୁଡ଼ିବାରେ ଲାଗିଛି। ଏହା ସତ୍ତ୍ୱେ ଆଦିବାସୀମାନଙ୍କ ମୌଳିକ ସୁବିଧା ପ୍ରତି ଖଣି ଲିଜଧାରୀମାନେ ଦୃଷ୍ଟି ଦେଉନାହାନ୍ତି। ସରକାରଙ୍କ ପକ୍ଷରୁ ସୋଲାର ଲାଇଟ ସ୍ଥାପନ ଦ୍ୱାରା ଗଁା ଆଲୋକିତ ହୋଇଛି। ମାତ୍ର ଗ୍ରାମରେ ସ୍ଥାୟୀ ଆଲୋକ ବ୍ୟବସ୍ଥା କରିବାକୁ ଦାବି କରିଛନ୍ତି।
