ବ୍ରହ୍ମପୁର ଅଫିସ,୩ା୩: ବ୍ରହ୍ମପୁର ବ୍ରହ୍ମପୁର ମହାନଗର ନିଗମ (ବିଏମସି) ପକ୍ଷରୁ ବାଲୁଙ୍କେଶ୍ୱର ମନ୍ଦିର ସମ୍ମୁଖରେ ନବନିର୍ମିତ ପାଟବୁଣା ତାଲିମ ଓ ବିକ୍ରୟ କେନ୍ଦ୍ର ଖୁବ୍ଶୀଘ୍ର କାର୍ଯ୍ୟକ୍ଷମ ହେବ। ଏ ନେଇ ବିଏମ୍ସି କମିଶନର ସିଦ୍ଧେଶ୍ୱର ବଳିରାମ ବୋନ୍ଦାର ସୂଚନା ଦେଇଛନ୍ତି। ଏଥିରେ ୧୦ଟି ସ୍ବୟଂ ସହାୟକ ଗୋଷ୍ଠୀ ନିୟୋଜିତ ରହିବେ। ବର୍ତ୍ତମାନ ବୁଣାକାର ଯନ୍ତ୍ର ସ୍ଥାପନ କରାଯାଇଛି। ଏହି କେନ୍ଦ୍ର ଖୁବ୍ଶୀଘ୍ର କାର୍ଯ୍ୟକ୍ଷମ ହେବ ବୋଲି ସେ କହିଛନ୍ତି। ସୂଚନା ଥାଉ କି, ବ୍ରହ୍ମପୁର ସହରରେ ଅନେକ ପାଟ ବୁଣାକାର ରହିଛନ୍ତି। କିନ୍ତୁ ପାଟ ବୁଣିବା ପାଇଁ ଉତ୍ତମ ଭିତ୍ତିଭୂମିର ଅଭାବ ସହ ଆବଶ୍ୟକ ଯନ୍ତ୍ରପାତି ନାହିଁ। ଫଳରେ ବୁଣାକାରମାନେ ସୀମିତ ଭିତ୍ତିଭୂମିରେ ପାଟ ବୁଣୁଛନ୍ତି। ଏହି ବୁଣାକାରଙ୍କୁ ଭିତ୍ତିଭୂମି ଯୋଗାଇବା, ତାଲିମ ପ୍ରଦାନ ଓ ବିକ୍ରୟ କେନ୍ଦ୍ର ସ୍ଥାପନ ପାଇଁ ବୁଣାକାରମାନେ ଦୀର୍ଘ ଦିନ ଧରି ଦାବି କରିଆସୁଥିଲେ। ଫଳରେ ବିଏମ୍ସି ପକ୍ଷରୁ ବାଲୁଙ୍କେଶ୍ୱର ମନ୍ଦିର ସମ୍ମୁଖରେ ୧ କୋଟି ୮୨ ଲକ୍ଷ ଟଙ୍କା ବ୍ୟୟରେ ପାଟ ବୁଣା କେନ୍ଦ୍ର ନିର୍ମିତ ହୋଇଥିଲା। ଯେଉଁଠାରେ ଆବଶ୍ୟକ ପାଟବୁଣା ଯନ୍ତ୍ର ଓ ଅନ୍ୟାନ୍ୟ ସାମଗ୍ରୀ ଯୋଗାଇବା ନିମନ୍ତେ ଯୋଜନା ହୋଇଥିଲା। ଯାହାକୁ ୨୦୨୧ ଡିସେମ୍ବର ୧୨ରେ ମୁଖ୍ୟମନ୍ତ୍ରୀ ଅନ୍ଲାଇନରେ ଉଦ୍ଘାଟନ କରିଥିଲେ। ଏହାପରେ ଜାନୁୟାରୀ ୭ରେ ବ୍ରହ୍ମପୁର ବିଧାୟକ ଓ ବିଏମ୍ସି କମିଶନରଙ୍କ ଦ୍ୱାରା ଲୋକାର୍ପଣ କରାଯାଇଥିଲା। କିନ୍ତୁ ଉଦ୍ଘାଟନର ଦେଢ ମାସ ପରେ ପାଟ ବୁଣାକାର କେନ୍ଦ୍ର କାର୍ଯ୍ୟକ୍ଷମ ହୋଇପାରି ନ ଥିଲା। ଫଳରେ ପାଟ ବୁଣାକାରଙ୍କ ମଧ୍ୟରେ ନିରାଶାଭାବ ଦେଖିବାକୁ ମିଳିଥିଲା। ଯାହାକୁ ନେଇ ଗଞ୍ଜାମ ଜିଲାପାଳ ଗସ୍ତ କରି ଏହାକୁ ଖୁବ୍ଶୀଘ୍ର କାର୍ଯ୍ୟକ୍ଷମ କରିବା ପାଇଁ ନିର୍ଦ୍ଦେଶ ଦେଇଥିଲେ। ଏହାପରେ ବର୍ତ୍ତମାନ ବିଏମ୍ସି ତପତ୍ରତା ପ୍ରକାଶ କରି ପାଟବୁଣା କେନ୍ଦ୍ର ଖୁବ୍ଶୀଘ୍ର କାର୍ଯ୍ୟକ୍ଷମ ହେବା ନେଇ ପଦକ୍ଷେପ ଗ୍ରହଣ କରିଥିବା ଜଣାପଡିଛି। ଯାହାଦ୍ୱାରା ସ୍ବୟଂ ସହାୟକ ଗୋଷ୍ଠୀ ଉପକୃତ ହେବା ନେଇ ମତପ୍ରକାଶ ପାଇଛି। ଅନ୍ୟପଟେ ବ୍ରହ୍ମପୁର ପାଟ ହାତବୁଣାକାର କଲ୍ୟାଣ ସଂଘ ପକ୍ଷରୁ ବୁଣାକାରଙ୍କ ନିମନ୍ତେ ଯୋଜନା, ସ୍ବାସ୍ଥ୍ୟ ବୀମା ପାଇଁ ସଂଘ ପକ୍ଷରୁ ଦାବି ହୋଇଛି।
