ସିଓଲ,୨୭ା୫: ଦକ୍ଷିଣ କୋରିଆର ଡାଏଗୁ ସହର ଅଭିମୁଖେ ଯାଉଥିବା ଏକ ଆସିଆନା ଏୟାରଲାଇନ୍ସ ବିମାନରେ ଜଣେ ଯାତ୍ରୀ ଏମର୍ଜେନ୍ସି ଡୋର୍ ଖୋଲି ଗିରଫ ହୋଇଛନ୍ତି। ଓଜେଡ୍୮୧୨୪ ଏୟାରବସ୍ ଶୁକ୍ରବାର ସ୍ଥାନୀୟ ସମୟ ୧୧ଟା ୪୫ରେ ଜେଜୁ ଆଇଲାଣ୍ଡରୁ ଯାତ୍ରା ଆରମ୍ଭ କରିଥିଲା। ଡାଏଗୁ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ ପୂର୍ବରୁ ୨୫୦ ମିଟର ଉଚ୍ଚତାରେ ଥିବାବେଳେ ଜଣେ ପୁରୁଷ ଯାତ୍ରୀ ଏହାର ଏମର୍ଜେନ୍ସି ଗେଟ୍କୁ ଖୋଲି ଦେବାରୁ ଖୁବ୍ ଜୋର୍ରେ ପବନ ପଶି ବିମାନ ହଲିବାରେ ଲାଗିଥିଲା। ଫଳରେ ବିମାନରେ ଥିବା ୧୯୪ ଯାତ୍ରୀ ଆତଙ୍କିତ ହୋଇଯାଇଥିଲେ। ଡୋର ଖୋଲା ଥିବା ସତ୍ତ୍ୱେ ବିମାନଟି ସୁରକ୍ଷିତ ଭାବେ ଅବତରଣ କରିଛି। ଯାତ୍ରୀଙ୍କ ମଧ୍ୟରୁ କେତେଜଣ ପବନ ଚାପରେ ନିଃଶ୍ୱାସପ୍ରଶ୍ୱାସ ନେବାରେ କଷ୍ଟ ଅନୁଭବ କରିବାରୁ ସେମାନଙ୍କୁ ନିକଟସ୍ଥ ଏକ ହସ୍ପିଟାଲରେ ଭର୍ତ୍ତି କରାଯାଇଛି। ଏଭଳି କାଣ୍ଡ ଭିଆଇଥିବା ଯାତ୍ରୀଙ୍କ ପରିଚୟ ପ୍ରଘଟ କରାଯାଇ ନାହିଁ। ଯାତ୍ରୀଙ୍କ ମଧ୍ୟରୁ ଅନେକେ ସ୍କୁଲ ଛାତ୍ରୀଛାତ୍ର ଥିଲେ। ସପ୍ତାହାନ୍ତ କ୍ରୀଡ଼ା କାର୍ଯ୍ୟକ୍ରମରେ ଭାଗନେବା ପାଇଁ ସେମାନେ ଯାଉଥିଲେ। ଆମ ପିଲାମାନେ ଥରୁଥିଲେ, କାନ୍ଦୁଥିଲେ ଓ ଆତଙ୍କିତ ହୋଇଯାଇଥିଲେ ବୋଲି ଜଣେ ଛାତ୍ରଙ୍କ ମା’ବାପା କହିଛନ୍ତି। ଡୋର ଖୋଲିଥିବା ଯୁବକ ବିମାନରୁ ଡେଇଁବାକୁ ଉଦ୍ୟମ କରିଥିଲେ। ତାଙ୍କୁ ଗିରଫ କରାଯାଇଛି। ସେ କାହିଁକି ଡୋର୍ ଖୋଲିଲେ ସେନେଇ କିଛି ସ୍ପଷ୍ଟ କରିନାହାନ୍ତି। ତଦନ୍ତ ଜାରି ରହିଛି। ତାଙ୍କୁ ଦଣ୍ଡିତ କରାଯିବ ବୋଲି ପୋଲିସ କହିଛି।
