ଦିଗପହଣ୍ଡି,୬।୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଡେଙ୍ଗାଓସ୍ତା ଗ୍ରାମର ଖଜୁରୀପଦା ସାହି ନିକଟରେ ସୋମବାର ରାତି ପ୍ରାୟ ୮ଟାରେ ଗୁଳି ଫୁଟିଛି। ଡେଙ୍ଗାଓସ୍ତା-ଭୀଷ୍ମଗିରି ଗ୍ରାମ ମୁଖ୍ୟରାସ୍ତା କଡରେ ସୁନା ଅଳଙ୍କାର ଦୋକାନ କରିଥିବା ଶ୍ରୀ ଦୁର୍ଗା ଜୁଏଲର୍ସ ମାଲିକ ପବିତ୍ର ବିଶୋୟୀ ଦୋକାନ ବନ୍ଦ କରି ଖଜୁରୀପଦା ସାହିସ୍ଥିତ ବାସଭବନକୁ ଯାଉଥିବାବେଳେ ୨ଟି ବାଇକରେ ୪ ଦୁର୍ବୃତ୍ତ ତାଙ୍କୁ ପିଛା କରି ରାସ୍ତାର ଅଟକାଇଥିଲେ। ସେ ହାତରେ ଧରିଥିବା ସୁନା ଅଳଙ୍କାର ଭର୍ତ୍ତି ବ୍ୟାଗକୁ ୨ ଜଣ ଦୁର୍ବୃତ୍ତ ଛଡ଼ାଇବାକୁ ଉଦ୍ୟମ କରିଥିଲେ। ସେ ବ୍ୟାଗ ନ ଛାଡ଼ିବାରୁ ଜଣେ ଦୁର୍ବୃତ୍ତ ମାଉଜର ଦେଖାଇ ଫାଙ୍କା ଗୁଳି ଚାଳନା କରିଥିଲେ। ତଥାପି ସାହସର ସହ ପବିତ୍ର ବ୍ୟାଗ ନ ଛାଡିବାରୁ ଅନ୍ୟ ୨ ଦୁର୍ବୃତ୍ତ ତାଙ୍କୁ ନିସ୍ତୁକ ମାଡ଼ ମାରିଥିଲେ। ଘଟଣାସ୍ଥଳକୁ କିଛି ବ୍ୟକ୍ତି ଦୌଡ଼ି ଆସିବାରୁ ଦୁର୍ବୃତ୍ତମାନେ ବାଇକଯୋଗେ ସିଙ୍ଗପୁର-ପଳାସପୁର ରାସ୍ତାରେ ଚମ୍ପଟ ମାରିଥିଲେ। ଖବରପାଇ ପାଟପୁର ଓ ଦିଗପହଣ୍ଡି ପୋଲିସ ବିଭିନ୍ନ ଇଲାକାରେ ନକାବନ୍ଦି କରି ରାସ୍ତାରେ ଚଳାଚଳ କରୁଥିବା ଗାଡ଼ି,ବାଇକକୁ ଯାଞ୍ଚ କରିଥିଲେ ମଧ୍ୟ ଦୁର୍ବୃତ୍ତଙ୍କ ସନ୍ଧାନ ମିଳିପାରିନାହିଁ। ପୋଲିସ ଟିମ ଘଟଣାସ୍ଥଳରେ ପହଞ୍ଚି ସବିଶେଷ ତଦନ୍ତ କରି ଫେରିଥିବା ଜଣାପଡ଼ିଛି।ରିପୋର୍ଟ ଲେଖାହେବା ସୁଦ୍ଧା ଥାନାରେ କୌଣସି ଏତଲା ହୋଇ ନ ଥିବା ଜଣାପଡିଛି।
Dharitri – Odisha’s No.1 Odia Daily
