ଭିଏନା/ଓ୍ବାଶିଂଟନ,୭ା୧୦:ପେଟ୍ରୋଲିୟମ୍ ରପ୍ତାନିକାରୀ ଦେଶଗୁଡ଼ିକର ସଙ୍ଗଠନ (ଓପିଇସି) ସମେତ ଏହାର ସହଯୋଗୀ ରାଷ୍ଟ୍ରଗୁଡ଼ିକୁ ନେଇ ଗଠିତ ଓପେକ୍ ପ୍ଲସ୍ର ବୈଠକ ବୁଧବାର ଅଷ୍ଟ୍ରିଆ ରାଜଧାନୀ ଭିଏନାରେ ଅନୁଷ୍ଠିତ ହୋଇଛି। ଉକ୍ତ ବୈଠକରେ ଦୈନିକ ୨ ମିଲିୟନ ବ୍ୟାରେଲ (ବିପିଡି) ତୈଳ ଉତ୍ପାଦନ ହ୍ରାସ ପାଇଁ ନିଷ୍ପତ୍ତି ନିଆଯାଇଛି। ୨୦୨୦ ପରେ ବିଶ୍ୱ ବଜାରରେ ତୈଳ ଯୋଗାଣ କ୍ଷେତ୍ରରେ ଏହା ହେଉଛି ସର୍ବାଧିକ ହ୍ରାସକରଣ। ସାଉଦି ଆରବ ସମର୍ଥିତ ବ୍ଲକ୍ ଏବଂ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ମଧ୍ୟରେ କୂଟନୈତିକ ଫାଟ ବଢ଼ିବାରେ ଲାଗିଥିବାବେଳେ ଏହି ପଦକ୍ଷେପ ଯୋଗୁ ବିଶ୍ୱ ବଜାରରେ ତୈଳ ଦର ଆହୁରି ମହଙ୍ଗା ହେବ। ସାରା ବିଶ୍ୱ ଉଚ୍ଚ ମୁଦ୍ରାସ୍ଫୀତି ଦେଇ ଗତି କରୁଥିବାବେଳେ ଇନ୍ଧନ ମୂଲ୍ୟ ବୃଦ୍ଧିର ପ୍ରଭାବ ପରିବହନ ବ୍ୟବସ୍ଥାକୁ ମହଙ୍ଗା କରିବ। କେବଳ ଏତିକି ନୁହେଁ, ୟୁରୋପରେ ଶୀତ ଋତୁ ଏଥର ଅତ୍ୟଧିକ ଯନ୍ତ୍ରଣାଦାୟକ ହେବ। ଏହାକୁ ଦୃଷ୍ଟିରେ ରଖି ଓପେକ୍ ପ୍ଲସ୍ର କର୍ତ୍ତୃତ୍ୱ ଓ ଆଧିପତ୍ୟ ଉପରେ ଅଙ୍କୁଶ ଲଗାଇବା ପାଇଁ ଆମେରିକା ପ୍ରସ୍ତୁତି ଆରମ୍ଭ କରିଛି। ନୋ ଅଏଲ୍ ପ୍ରଡ୍ୟୁସିଂ ଆଣ୍ଡ ଏକ୍ସପୋର୍ଟିଂ କାର୍ଟେଲ୍ସ (ଏନ୍ଓପିଇସି) ବା ନୋପେକ୍ ବିଲ୍କୁ ଗତ ମେ’ ୫ରେ ସିନେଟ୍ କମିଟି ମଞ୍ଜୁରୀ ଦେଇଥିଲା। ବର୍ତ୍ତମାନ ଆମେରିକୀୟ ଉପଭୋକ୍ତା ଓ ବ୍ୟବସାୟୀଙ୍କୁ ସୁରକ୍ଷା ଦେବା ପାଇଁ ଉଦ୍ଦିଷ୍ଟ ନୋପେକ୍ ବିଲ୍କୁ କାର୍ଯ୍ୟକାରୀ କରି ସମାଧାନର ବାଟ ଫିଟାଇବାକୁ ହ୍ବାଇଟ୍ ହାଉସ୍ ବିଚାର କରୁଛି।
ଓପେକ୍ ଏବଂ ରୁଷିଆ ସମେତ ସହଯୋଗୀ ରାଷ୍ଟ୍ର ସମୂହ(ଓପେକ୍ +) ମଧ୍ୟରେ ଦୈନିକ ୨ ବିପିଡି ତୈଳ ଉତ୍ପାଦନ ହ୍ରାସ ନେଇ ସହମତି ପ୍ରକାଶ ପାଇଛି। ୟୁରୋପୀୟ ସଂଘ (ଇୟୁ) ପକ୍ଷରୁ ରୁଷୀୟ ତୈଳ ଉପରେ ବାଣିଜି୍ୟକ କଟକଣା ପୂର୍ବରୁ ନିଆଯାଇଥିବା ଏହି ପଦକ୍ଷେପ ଫଳରେ ବିଶ୍ୱ ବଜାରରେ ତୈଳ ଦର ବୃଦ୍ଧି ପାଇଛି। ଗୁରୁବାର ରାତି ୭ଟା ୧୦ ମିନିଟରେ ବ୍ରେଣ୍ଟ୍ ଅଏଲ୍ ଫ୍ୟୁଚର୍ସ ୧୫ ସେଣ୍ଟ (୦.୨%) ବୃଦ୍ଧିପାଇ ବ୍ୟାରେଲ ପିଛା ୯୩.୫୨ ଡଲାରରେ ପହଞ୍ଚତ୍ଛି। ସେହିପରି ଆମେରିକାର ଓ୍ବେଷ୍ଟ୍ ଟେକ୍ସାସ୍ ଇଣ୍ଟରମିଡିଏଟ୍ (ଡବ୍ଲ୍ୟୁଟିଆଇ) କ୍ରୁଡ୍ ଫ୍ୟୁଚର୍ସ ୧୪ ସେଣ୍ଟ(୦.୨%) ବଢ଼ି ବ୍ୟାରେଲ ପିଛା ୮୭.୯୦ ଡଲାର ଛୁଇଁଛି। ବିଶ୍ୱରେ ତୈଳ ସଙ୍କଟ ଲାଗିରହିଥିବାବେଳେ ଏହି ଉତ୍ପାଦନ ହ୍ରାସ ପରେ ଯୋଗାଣ ଆହୁରି ବାଧାପ୍ରାପ୍ତ ହେବ। ଏଥିଯୋଗୁ ମୁଦ୍ରାସ୍ଫୀତି ବଢ଼ି ବଢ଼ି ଚାଲିବ ବୋଲି ବଜାର ବିଶେଷଜ୍ଞ ଆଶଙ୍କା ବ୍ୟକ୍ତ କରିଛନ୍ତି। ରିଷ୍ଟାଡ୍ ଏନର୍ଜି ସିନିୟର ଭାଇସ୍-ପ୍ରେସିଡେଣ୍ଟ ଜର୍ଜ ଲେଓନ୍ଙ୍କ ମତରେ ଓପେକ୍ ପ୍ଲସ୍ ପକ୍ଷରୁ ଘୋଷିତ ପଦକ୍ଷେପ ପ୍ରଭାବରେ ଆସନ୍ତା ଡିସେମ୍ବର ସୁଦ୍ଧା ବ୍ରେଣ୍ଟ୍ ବ୍ୟାରେଲ ପିଛା ୧୦୦ ଡଲାର ଛୁଇଁବ, ଯାହାକି ପୂର୍ବରୁ ୮୯ ଡଲାର ଥିଲା। ଦୋଶୀ କନ୍ସଲ୍ଟିଂ ମ୍ୟାନେଜିଂ ଡାଇରେକ୍ଟର ତିଲକ୍ ଦୋଶୀ କହିଛନ୍ତି, ଦାଉଦି, ୟୁଏଇ ଏବଂ କୁଏଟ୍ ଏହି ତୈଳ ହ୍ରାସର ସର୍ବାଧିକ ବୋଝ ବୋହିବେ। ରୁଷିଆ ଓ ଦାଉଦି ମଧ୍ୟରେ ବଢ଼ୁଥିବା ସମ୍ପର୍କର ଏହି ପରିଣାମ ହେଉଛି ବାଇଡେନ୍ ଆଡ୍ମିନିଷ୍ଟ୍ରେଶନ୍ ମୁହଁରେ ଓପେକ୍ ପ୍ଲସ୍ର ଏକ ଚାପୁଡ଼ା।
ସାଉଦି ଆରବ ଶକ୍ତିମନ୍ତ୍ରୀ ଅବ୍ଦୁଲାଜିଜ୍ ବିନ୍ ସଲମାନ କହିଛନ୍ତି, ପୂର୍ବରୁ ଦୈନିକ ପ୍ରାୟ ୧ ନିୟୁତ ବ୍ୟାରେଲ ତୈଳ ଉତ୍ପାଦନ ହ୍ରାସ କରାଯାଇଥିଲା। ନୂଆ ଘୋଷଣା ପରେ ଯୋଗାଣରେ ପ୍ରକୃତ ହ୍ରାସ ୧ ନିୟୁତରୁ ୧.୧ ନିୟୁତ ରହିବ। ଏଥିରୁ ସାଉଦି ଆରବର ଭାଗ ପ୍ରାୟ ୦.୫ ନିୟୁତ ବ୍ୟାରେଲ। ଅନ୍ୟପକ୍ଷେ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ପ୍ରଶାସନ ଏହି ଡିଲ୍କୁ ‘ଦୂରଦୃଷ୍ଟିହୀନ’ ବୋଲି ସମାଲୋଚନା କରିଛି। ଏଥିସହ ଭବିଷ୍ୟତରେ ଆବଶ୍ୟକ ହେଲେ ଷ୍ଟ୍ରାଟେଜିକ୍ ଅଏଲ୍ ଷ୍ଟକ୍ରୁ ଆହୁରି ତୈଳ ଯୋଗାଣ ନେଇ ହ୍ବାଇଟ୍ ହାଉସ୍ ବିଚାର କରିବ। ହ୍ବାଇଟ୍ ହାଉସ୍ କହିଛି, ତୈଳ ଦର ଉପରେ ଓପେକ୍ ପ୍ଲସ୍ର ନିୟନ୍ତ୍ରଣ ହ୍ରାସ ପାଇଁ କଂଗ୍ରେସ ସହ ବିଚାରବିମର୍ଶ କରି ପଦକ୍ଷେପ ନିଆଯିବ। ରୁଷିଆ ଉପପ୍ରଧାନମନ୍ତ୍ରୀ ଆଲେକ୍ଜାଣ୍ଡାର ନୋଭାକ୍ କହିଛନ୍ତି, ୟୁକ୍ରେନ୍ ଉପରେ ମସ୍କୋ ସ୍ବତନ୍ତ୍ର ସାମରିକ ଅଭିଯାନ (ଯୁଦ୍ଧ) ଯୋଗୁ ପାଶ୍ଚାତ୍ୟ ଦ୍ୱାରା ଜାରି କରାଯାଇଥିବା କଟକଣା ହେତୁ ଅନୁଭୂତ ପ୍ରଭାବକୁ ହ୍ରାସ କରିବା ପାଇଁ ଆମେ ଉତ୍ପାଦନ କମାଇବୁ।
ଓପେକ୍ ପ୍ଲସ୍ କ’ଣ
ଅର୍ଗାନାଇଜେଶନ୍ ଅଫ୍ ଦି ପେଟ୍ରୋଲିୟମ୍ ଏକ୍ସପୋର୍ଟିଂ କଣ୍ଟ୍ରିଜ୍ (ଓପିଇସି) ବା ଓପେକ୍ ହେଉଛି ୧୩ ରାଷ୍ଟ୍ରକୁ ନେଇ ଗଠିତ ଏକ ଆନ୍ତଃ ସରକାରୀ ସଙ୍ଗଠନ। ପ୍ରଥମ ୫ ସଦସ୍ୟ ଇରାନ, ଇରାକ, କୁଏଟ୍, ସାଉଦି ଆରବ ଓ ଭେନିଜୁଏଲା ଦ୍ୱାରା ୧୯୬୦ ସେପ୍ଟେମ୍ବର ୧୪ରେ ଏହାକୁ ବାଗ୍ଦାଦରେ ପ୍ରତିଷ୍ଠା କରାଯାଇଥିଲା। ଅଷ୍ଟ୍ରିଆ ସଦସ୍ୟ ନ ଥାଇ ମଧ୍ୟ ଏହାର ରାଜଧାନୀ ଭିଏନାରେ ଓପେକ୍ର ମୁଖ୍ୟାଳୟ ରହିଛି। ପରବର୍ତ୍ତୀ ସମୟରେ ଏଥିରେ ଆଲ୍ଜେରିଆ, ଆଙ୍ଗୋଲା, ଇକ୍ୱାଟୋରିଆଲ ଗିନିଆ, ଗାବ୍ରୋନ୍, ଲିବ୍ୟା, ନାଇଜେରିଆ ଓ କଙ୍ଗୋ ସାଧାରଣତନ୍ତ୍ର, ସଂଯୁକ୍ତ ଆରବ ଏମିରାଟ୍ସ (ୟୁଏଇ)କୁ ସାମିଲ କରାଯାଇଛି। ବିଶ୍ୱର ମୋଟ ଉତ୍ପାଦିତ ତୈଳର ୪୪% ଏହାର ୧୩ ସଦସ୍ୟ ରାଷ୍ଟ୍ରରେ ହେଉଛି। ବିଶ୍ୱ ବଜାରରେ କ୍ରୁଡ୍ ଅଏଲ୍ ଉପରେ ନିୟନ୍ତ୍ରଣ ରଖିବା ଉଦ୍ଦେଶ୍ୟରେ ୨୦୧୬ରେ ଏଥିରେ ରୁଷିଆ ସମେତ ଆଉ କେତେକ ରାଷ୍ଟ୍ରକୁ ସାମିଲ କରି ଓପେକ୍ ପ୍ଲସ୍ ସଙ୍ଗଠନ କରାଯାଇଛି।
ନୋପେକ୍ ବିଲ୍ରେ ସମାଧାନ
ତୈଳ ଉତ୍ପାଦନ ଓ ରପ୍ତାନି କରୁ ନ ଥିବା ପ୍ରତିଷ୍ଠାନଗୁଡ଼ିକର ସଂଘ (ଏନ୍ଓପିଇସି) ବା ନୋପେକ୍ ବିଲ୍ ଆମେରିକା ସିନେଟ୍ କମିଟିର ମଞ୍ଜୁରୀ ଲାଭ କରିସାରିଛି। ହ୍ବାଇଟ୍ ହାଉସ୍ ଏହି ବିଧେୟକ ଜରିଆରେ ତୈଳ ସଙ୍କଟର ସମାଧାନ ବାଟ ଖୋଜୁଥିବାବେଳେ ଏହାଦ୍ୱାରା କେତେକ ଅପ୍ରତ୍ୟାଶିତ ବିପଜ୍ଜନକ ପରିଣାମ ଆସିପାରେ ବୋଲି ବିଶ୍ଳେଷକମାନେ ମତ ଦେଇଛନ୍ତି। ଆମେରିକାର ଦୁଇ ବଡ଼ ରାଜନୈତିକ ଦଳ ଶାସକ ଡେମୋକ୍ରାଟିକ୍ ଏବଂ ବିରୋଧୀ ରିପବ୍ଲିକାନ୍ ସମର୍ଥତ୍ତ ନୋପେକ୍ ବିଲ୍ ଆଇନରେ ପରିଣତ ହେଲେ ଅଏଲ୍ କାର୍ଟେଲ ଓ ସାଉଦି ଆରବ ଭଳି ଏହାର ସଦସ୍ୟଗୁଡ଼ିକ ବିରୋଧରେ ସଂଘୀୟ ଅଦାଲତରେ କାର୍ଯ୍ୟାନୁଷ୍ଠାନ ନେବା ପାଇଁ ଆଟର୍ନି ଜେନେରାଲଙ୍କ ପାଖରେ ବିକଳ୍ପ ରହିବ। ଫଳରେ ଓପେକ୍ ପ୍ଲସ୍ ନିଜର ସାର୍ବଭୌମ ସୁରକ୍ଷା ହରାଇବସିବ। ସିନେଟ ଜୁଡିସିଆରି କମିଟି ଗତ ମେ’ରେ ଏହାକୁ ଗୃହୀତ କରିଥିବାବେଳେ ସିନେଟ୍ ଏବଂ ହାଉସ୍ରେ ଏହା ପାରିତ ହେବା ବାକି ଅଛି। ଦୁଇ ଗୃହର ମଞ୍ଜୁରୀ ଲାଭ ପରେ ଆଇନରେ ପରିଣତ ହେବା ଲାଗି ରାଷ୍ଟ୍ରପତି ଜୋ ବାଇଡେନଙ୍କ ସ୍ବାକ୍ଷର ଆବଶ୍ୟକ। ଝୁଲି ରହିଥିବା ଏହି ବିଲ୍ ବର୍ତ୍ତମାନର ରୁଷିଆ ବିରୋଧୀ ଆଭିମୁଖ୍ୟ ଯୋଗୁ ଗୃହୀତ ହେବା ଆଶା କରାଯାଉଛି।
