କଟକ ଅଫିସ,୨୫ା୨: କଟକ ମହାନଗର ନିଗମ (ସିଏମ୍ସି) ପକ୍ଷରୁ ଚୂଡାନ୍ତ ଭୋଟର ତାଲିକା ବୁଧବାର ପ୍ରକାଶ ପାଇଛି। ପ୍ରାଥମିକ ଭୋଟର ତାଲିକାଠାରୁ ଚୂଡ଼ାନ୍ତ ତାଲିକାରେ ଭୋଟର ସଂଖ୍ୟା ୫୧୭୪ ବୃଦ୍ଧି ପାଇଛି। ସହରରେ ମୋଟ ୪ଲକ୍ଷ ୫୦ ହଜାର ୭୫୯ ଭୋଟର ରହିଛନ୍ତି ବୋଲି ଚୂଡ଼ାନ୍ତ ତାଲିକାରେ ଦର୍ଶାଯାଇଛି। ସେଥିମଧ୍ୟର ୨ଲକ୍ଷ ୩୧ହଜାର ୩୦ ପୁରୁଷ, ୨ ଲକ୍ଷ ୧୯ ହଜାର ୫୯୮ ମହିଳା ଏବଂ ୧୩୧ ଜଣ କିନ୍ନର। ୪୮ନଂ. ୱାର୍ଡରେ ସର୍ବାଧିକ ୮୬୯୧ ଭୋଟର ରହିଥିବା ବେଳେ ୫୯ ନଂ ୱାର୍ଡରେ ସର୍ବନିମ୍ନ ୪୬୯୦ ଜଣ ଭୋଟର ରହିଛନ୍ତି। ଗତ ୯ତାରିଖରେ ପ୍ରକାଶିତ ପ୍ରାଥମିକ ଭୋଟର ତାଲିକାରେ ଭୋଟର ସଂଖ୍ୟା ୪ଲକ୍ଷ ୪୫ହଜାର ୫୮୫ ରହିଥିଲା। ଏହାପରେ ଭୋଟର ତାଲିକାରେ ତ୍ରୁଟି ଥିବା ନେଇ ଅନେକ ଅଭିଯୋଗ ହୋଇଥିଲା। ଉକ୍ତ ଅଭିଯୋଗ ଭିତ୍ତିରେ ସିଏମସି ପକ୍ଷରୁ ସଂଶୋଧନ କରାଯାଇ ଚୂଡ଼ାନ୍ତ ତାଲିକା ପ୍ରକାଶ ପାଇଛି। ତେବେ ଚୂଡ଼ାନ୍ତ ତାଲିକା ନେଇ ଆଉ କୌଣସି ସଂଶୋଧନ କରାଯାଇ ପାରିବ ନାହିଁ ବୋଲି ସିଏମ୍ସି ନିର୍ବାଚନ ଅଧିକାରୀ ଅମିୟ ପଣ୍ଡା କହିଛନ୍ତି। ଏଥିସହ ଗୁରୁବାର ପୌରନିର୍ବାଚନ ପାଇଁ ଇଭିଏମ୍ ଆସିଯାଇଛି। ତାହାକୁ ବୋଷ କଲେଜରେ ରଖାଯାଇଛି ଏବଂ ଯାଞ୍ଚ ଚାଲିଛି ବୋଲି ସେ କହିଛନ୍ତି। ସୂଚନାଥାଉକି ପୌର ନିର୍ବାଚନ ପାଇଁ ୱାର୍ଡ ସୀମା ନିର୍ଦ୍ଧାରଣ ଏବଂ ଆସନ ସଂରକ୍ଷଣର ଚୂଡ଼ାନ୍ତ ତାଲିକା ପ୍ରକାଶ ପାଇସାରିଛି। ମୋଟ ୫୯ଟି ୱାର୍ଡରୁ ୩୩ଟି ୱାର୍ଡ ସଂରକ୍ଷିତ ଥିବାବେଳେ ୨୬ଟିକୁ ଅସଂରକ୍ଷିତ ରଖାଯାଇଛି।
