ଭୁବନେଶ୍ୱର,୧୦ା୩(ବ୍ୟୁରୋ):ମଞ୍ଚେଶ୍ୱର ଥାନା ଅନ୍ତର୍ଗତ ଜରିପାଟଣା ଗାଁରେ ଜଣେ ନବବଧୂଙ୍କୁ ତଣ୍ଟି ଚିପି ହତ୍ୟା ଅଭିଯୋଗ ହୋଇଛି। ମୃତା ମହିଳା ଜଣକ ହେଲେ ଉକ୍ତ ଗାଁର ପ୍ରଭାତ ପରିଡ଼ାଙ୍କ ସ୍ତ୍ରୀ ତଥା ଜଗତ୍ସିଂହପୁର ଜିଲା ଡିହସାହିର ଲକ୍ଷ୍ମୀପ୍ରିୟା ମହାନ୍ତି। ଯୌତୁକ ପାଇଁ ସ୍ବାମୀ ଓ ଶାଶୁ ଘର ଲୋକେ ମିଳିମିଶି ଲକ୍ଷ୍ମିପ୍ରିୟାଙ୍କୁ ହତ୍ୟା କରିଥିବା ନେଇ ପରିବାର ଲୋକେ ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ଆଇପିସି ଦଫା ୩୦୨, ୩୦୪ (ଖ), ୪୯୮ (କ)ରେ ମାମଲା (ନଂ.୧୦୮/୨୩) ରୁଜୁ କରି ଘଟଣାର ଅଧିକ ଖୋଳତାଡ ଚଳାଇଛି। ଅନ୍ୟପଟେ ଲକ୍ଷ୍ମୀପ୍ରିୟାଙ୍କ ସ୍ବାମୀ ଓ ଶାଶୁଘର ଲୋକେ ଫେରାର ଥିବାରୁ ସେମାନଙ୍କୁ ଧରିବା ଲାଗି ପୋଲିସ ଚଢାଉ ଜାରି ରଖିଛି। ଏହାସହ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ଥାନା ପକ୍ଷରୁ ସୂଚନା ଦିଆଯାଇଛି।
ଅଭିଯୋଗ ଓ ପୋଲିସ ସୂଚନାନୁସାରେ, ଲକ୍ଷ୍ମୀପ୍ରିୟା ୨୦୨୦ରେ ଜରିପାଟଣାର ପ୍ରଭାତଙ୍କୁ ବିବାହ କରିଥିଲେ। ବିବାହର କିଛିଦିନ ପରେ ପ୍ରଭାତଙ୍କ ପରିବାର ଲୋକେ ଲକ୍ଷ୍ମୀପ୍ରିୟାଙ୍କୁ ଯୌତୁକ ମାଗିବା ସହ ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିଲେ। ବୁଧବାର ରାତି ୧୧ଟା ୩୦ରେ ପ୍ରଭାତ ତାଙ୍କ ଶାଳକ ତଥା ମୃତା ଲକ୍ଷ୍ମୀଙ୍କ ଭାଇଙ୍କୁ ଫୋନ କରି ଭଉଣୀଙ୍କ ଦେହ ଅସୁସ୍ଥ ଥିବା ଜଣାଇ କ୍ୟାପିଟାଲ ହସ୍ପିଟାଲ ନେଉଥିବା କଥା ଜଣାଇଥିଲେ। ହେଲେ ହସ୍ପିଟାଲରେ ଡାକ୍ତର ରିସିଭ୍ ଡେଥ୍ ଘୋଷଣା କରିବା ସହ ଫେରାଇ ଦେଇଥିଲେ। ଏହାପରେ ଶାଶୁଘର ଲୋକେ ମୃତଦେହକୁ ଜରିପାଟଣାସ୍ଥିତ ଘରକୁ ନେଇ ଆସିଥିଲେ। ସେଠାରେ ଲକ୍ଷ୍ମୀପ୍ରିୟାଙ୍କ ପରିବାର ଲୋକେ ପହଞ୍ଚତ୍ବା ପରେ ମୃତଦେହ ଦୁଆର ବନ୍ଧ ଆଗରେ ପଡିଥିବା ଦେଖିବାକୁ ପାଇଥିଲେ। ଗୁରୁବାର ସକାଳେ ଏନେଇ ମଞ୍ଚେଶ୍ୱର ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପୋଲିସ ସାଇଣ୍ଟିଫିକ ଟିମ୍ ସହାୟତରେ ଘଟଣାସ୍ଥଳରେ ପହଞ୍ଚତ୍ ଛାନଭିନ କରିବା ସହ ମୃତଦେହ ଜବତ କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଥିଲା।
