କାମାକ୍ଷାନଗର,୨୩।୬(ସୁଧୀର ପରିଡ଼ା): ଢେଙ୍କାନାଳ ଏବଂ ଅନୁଗୋଳ ଜିଲାରେ ଆତଙ୍କର ବାତାବରଣ ସୃଷ୍ଟି କରି ଦାଦାବଟି ଆଦାୟ କରୁଥିବା ‘କିଙ୍ଗ୍ ଅଫ୍ ଫରେଷ୍ଟ’ ଗ୍ୟାଙ୍ଗର ମୁଖା ଖୋଲିଛି। ଯୁବ ବିଜେଡି ନେତା ତଥା ଠିକାଦାର କାହ୍ନୁ ଚରଣ ସାହୁଙ୍କୁ ହତ୍ୟା ଉଦ୍ୟମ ମାମଲାରେ ଦାଦାବଟି ଆଦାୟ କରୁଥିବା ଏହି ଗ୍ୟାଙ୍ଗ୍ର ଲିଙ୍କ୍ ଥିବା ସ୍ପଷ୍ଟ ହୋଇଛି। ଏଥିରେ ସମ୍ପୃକ୍ତ ଥିବା ଅଭିଯୋଗରେ ୪ଜଣ ବନ୍ଧା ହୋଇଛନ୍ତି। ସେମାନେ ହେଲେ ସୁବାସ ଖୁଣ୍ଟିଆ, ଅନିଲ ନାଏକ, ଶୁଭ୍ରାଂଶୁ ନାଏକ ଓରଫ ଟିଟନ୍, ଲିପନ ରାଉତ ଓରଫ ଗୁଡୁ। ଗ୍ୟାଙ୍ଗର ମାଷ୍ଟରମାଇଣ୍ଡ୍ ରାକେଶ ନାଥ ଫେରାର ଅଛନ୍ତି। କାମାକ୍ଷାନଗର ଥାନାରେ ଗୁରୁବାର ଅପରାହ୍ନରେ ଆୟୋଜିତ ଏକ ଖବରଦାତା ସମ୍ମିଳନୀରେ ଗ୍ୟାଙ୍ଗ୍ର ଆପରାଧିକ କାର୍ଯ୍ୟକଳାପ ସମ୍ପର୍କରେ ସବିଶେଷ ସୂଚନା ଦେଇଛନ୍ତି ଏସ୍ପି ଜ୍ଞାନରଞ୍ଜନ ମହାପାତ୍ର।
ଗଣମାଧ୍ୟମକୁ ସୂଚନା ଦେଇ ଏସ୍ପି ମହାପାତ୍ର କହିଛନ୍ତି, ଗତ ଜୁନ୍ ୧୪ ରାତିରେ କାହ୍ନୁ ନିଜ କାର୍ (ନଂ.ଓଡି ୦୨ ବିବି ୨୯୧୫)ରେ କାମାକ୍ଷାନଗର ମଢ଼ିସାହିସ୍ଥିତ ଘରକୁ ଫେରୁଥିଲେ। ପ୍ରାୟ ୧୦ଟା ୪୫ରେ ୩ଜଣ ଯୁବକ ଏକ ବାଇକ୍ରେ ଆସି ତାଙ୍କ ଉପରକୁ ଆଖିବୁଜା ଗୁଳିମାଡ଼ କରି ଫେରାର ହୋଇଯାଇଥିଲେ। କାହ୍ନୁଙ୍କ ଡାହାଣ ଗୋଡ଼ ଏବଂ ହାତରେ ଗୁଳି ବାଜିଥିଲା। ଗୁରୁତର ଅବସ୍ଥାରେ ତାଙ୍କୁ କଟକ ସ୍ଥାନାନ୍ତର କରାଯାଇଥିବାବେଳେ ସେ ଏବେ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ଏଥିପୂର୍ବରୁ ୨୦୨୨ ଅକ୍ଟୋବର ୧୮ ବିଳମ୍ବିତ ରାତିରେ ତାଙ୍କ ଘର ଓ ଗାଡ଼ି ଉପରକୁ ବୋମା ମାଡ଼ ହୋଇଥିଲା। ଏହାର ଦୁଇମାସ ପରେ ଅର୍ଥାତ୍ ଡିସେମ୍ବର ୨୮ରେ ଠିକାଦାରି ସମ୍ପର୍କିତ କୌଣସି କାର୍ଯ୍ୟରେ ଢେଙ୍କାନାଳ ପୂର୍ତ୍ତ ବିଭାଗ କାର୍ଯ୍ୟାଳୟକୁ ଆସିଥିବାବେଳେ ତାଙ୍କୁ ଅପହରଣ ଉଦ୍ୟମ କରାଯାଇଥିଲା। ହେଲେ ସେ ଦୁର୍ବୃତ୍ତଙ୍କ କବଳରୁ ଖସିଯାଇ ପୂର୍ତ୍ତ ବିଭାଗ କାର୍ଯ୍ୟାଳୟ ଭିତରକୁ ଦୌଡ଼ି ପଳାଇଥିଲେ। ଅଭିଯୁକ୍ତମାନେ ତାଙ୍କ ଉପରକୁ ଗୁଳି ଚଳାଇଥିଲେ ମଧ୍ୟ ସେ ବର୍ତ୍ତିଯାଇଥିଲେ। ଜଣେ ବ୍ୟକ୍ତିଙ୍କ ଉପରେ ବାରମ୍ବାର ଏଭଳି ମରଣାନ୍ତକ ଆକ୍ରମଣ କାହିଁକି ହେଉଛି, ତାହା ଜାଣିବା ପୋଲିସ ପାଇଁ ଚ୍ୟାଲେଞ୍ଜ ପାଲଟିଥିଲା। ଏହି ଘଟଣାର ରହସ୍ୟ ଉନ୍ମୋଚନ କରିବା ଲାଗି ସ୍ବତନ୍ତ୍ର ଟିମ୍ ଗଢ଼ାଯାଇଥିଲା। ବିଭିନ୍ନ ଦିଗକୁ ନେଇ ତନାଘନା କରିବା ପରେ ‘କିଙ୍ଗ୍ ଅଫ୍ ଫରେଷ୍ଟ’ ଗ୍ୟାଙ୍ଗର ମୁଖା ଖୋଲିଛି। ୪ ଅଭିଯୁକ୍ତ ଧରାପଡ଼ିଛନ୍ତି। ସେମାନଙ୍କଠାରୁ ୪ ମୋବାଇଲ ଜବତ କରାଯାଇଛି। ସେହିପରି ସୁବାସଙ୍କଠାରୁ ଗୋଟିଏ ପିସ୍ତଲ, ୪ ରାଉଣ୍ଡ ଗୁଳି ମିଳିଛି। କାହ୍ନୁଙ୍କୁ ଆକ୍ରମଣ ପଛରେ ଦାଦାବଟି ଆଦାୟ ମୁଖ୍ୟ କାରଣ ବୋଲି ଜଣାପଡ଼ିଛି। ଗ୍ୟାଙ୍ଗ୍ର ମାଷ୍ଟରମାଇଣ୍ଡ ଏବଂ ଅନ୍ୟ ସଦସ୍ୟ ଖୁବ୍ଶୀଘ୍ର ଧରାପଡ଼ିବେ ବୋଲି ଏସ୍ପି ସୂଚନା ଦେଇଛନ୍ତି। ଅନ୍ୟପଟେ କାହ୍ନୁ ସାହୁ ଗୁଳିକାଣ୍ଡ ଘଟଣାର ମୁଖ୍ୟ ଅଭିଯୁକ୍ତ ସୁବାସ ଖୁଣ୍ଟିଆଙ୍କୁ ନେଇ ପୋଲିସ ସିନ୍ ରିକ୍ରିଏଶନ କରିଛି। ଘଟଣା ଦିନ କାହ୍ନୁଙ୍କୁ ଅଭିଯୁକ୍ତମାନେ କିପରି ପିଛା କରିଥିଲେ, କେମିତି ଗୁଳି ଚଳାଇ ଫେରାର ହୋଇଯାଇଥିଲେ ତାହାର ସବିଶେଷ ନମୁନା ପ୍ରଦର୍ଶନ କରିଥିଲେ ସୁବାସ।
ଖବରଦାତା ସମ୍ମିଳନୀରେ ଅତିରିକ୍ତ ଏସ୍ପି ସୂର୍ଯ୍ୟମଣି ପ୍ରଧାନ, ଏସ୍ଡିପିଓ ରଞ୍ଜନ କୁମାର ଦେ, କାମାକ୍ଷାନଗର ଥାନାଧିକାରୀ ଶରତ ଚନ୍ଦ୍ର ମହାଳିକ, ଇନ୍ସପେକ୍ଟର ଅମିତ ବିଶ୍ବାଳ, ଏସ୍ଆଇ ସ୍ବର୍ଣ୍ଣପ୍ରଭା ସାହୁ, ପ୍ରତାପ ସାହୁ, ଏଏସ୍ଆଇ ଜିତେନ୍ଦ୍ର ସାହୁ, ତୁମୁସିଙ୍ଗା ଥାନାଧିକାରୀ ପ୍ରଦୀପ କୁମାର ପାତ୍ର, ଫାଣ୍ଡି ଅଧିକାରୀ ସମୀର ସାମଲ ପ୍ରମୁଖ ଉପସ୍ଥିତ ଥିଲେ।
ମାସକୁ ୨୦ ଲକ୍ଷ ବଟି
‘କିଙ୍ଗ୍ ଅଫ୍ ଫରେଷ୍ଟ’ର ରହସ୍ୟ ଉନ୍ମୋଚନ ପରେ ଗ୍ୟାଙ୍ଗ୍ର ଆପରାଧିକ କାର୍ଯ୍ୟକଳାପ ସମ୍ପର୍କରେ ଗୁରୁତ୍ୱପୂର୍ଣ୍ଣ ସୂଚନା ମିଳିଛି। ୨୦୧୮ରେ ଜିଲା ଯୁବ ବିଜେଡି ସଭାପତି ଯଶୋବନ୍ତ ପରିଡ଼ାଙ୍କୁ ସ୍ପଷ୍ଟ ଦିବାଲୋକରେ ଗୁଳି କରି ହତ୍ୟା କରାଯାଇଥିଲା। ଏହି ଘଟଣାର ମୁଖ୍ୟ ଅଭିଯୁକ୍ତ ଥିଲେ ରାକେଶ ନାଥ। ସେ ଜେଲରୁ ବେଲ୍ରେ ଫେରିବା ପରେ ଢେଙ୍କାନାଳ ଜିଲାରେ ଅସାମାଜିକ କାର୍ଯ୍ୟକଳାପରେ ଲିପ୍ତ ଥିବା ୨୦ରୁ ୨୫ଜଣ ଯୁବକଙ୍କୁ ନେଇ ଗ୍ୟାଙ୍ଗ୍ ଗଢ଼ିଥିଲେ। ରାଜନେତା, ବ୍ୟବସାୟୀ, ଠିକାଦାରଙ୍କୁ ହତ୍ୟା ଧମକ ଦେଇ ମୋଟା ରକମର ବଟି ଆଦାୟ କରୁଥିଲେ। ଏମାନଙ୍କ ଆପରାଧିକ କାର୍ଯ୍ୟକଳାପର ଚେର ସୀମାନ୍ତ ଅନୁଗୋଳ, କଟକ ପର୍ଯ୍ୟନ୍ତ ବ୍ୟାପୀଥିଲା। କେତେକ କ୍ଷେତ୍ରରେ ଗ୍ୟାଙ୍ଗ ସଦସ୍ୟମାନେ ନିଜେ ବଟି ଆଦାୟ କରୁଥିବାବେଳେ ଧରାପଡ଼ିବା ଭୟରେ ଅନେକ ସମୟରେ ମଧ୍ୟସ୍ଥଙ୍କୁ ମଧ୍ୟ ନିୟୋଜିତ କରୁଥିଲେ। ବିଭିନ୍ନ ସୂତ୍ରରୁ ମାସକୁ ପ୍ରାୟ ୨୦ ଲକ୍ଷ ଟଙ୍କା ଯାଏ ବଟି ଆଦାୟ କରୁଥିବା ପୋଲିସ ଜାଣିବାକୁ ପାଇଛି। ଆଦାୟ କରୁଥିବା ଟଙ୍କାକୁ ସେମାନେ କେଉଁ ବାଟରେ ଖର୍ଚ୍ଚ କରୁଥିଲେ, ଏମାନଙ୍କ ଲିଙ୍କ୍ ବାହାର ରାଜ୍ୟର ଅପରାଧୀ ଗୋଷ୍ଠୀ କିମ୍ବା ମାରଣାସ୍ତ୍ର ଚାଲାଣ ସହିତ ଅଛି କି ନାହିଁ, ତାହା ଜାଣିବା ପୋଲିସ ପାଇଁ ଚ୍ୟାଲେଞ୍ଜ ହୋଇଛି। ଗିରଫ ଅଭିଯୁକ୍ତଙ୍କଠାରୁ ମିଳିଥିବା ତଥ୍ୟ ଆଧାରରେ ପୋଲିସ ତଦନ୍ତ ପରିସର ବଢ଼ାଇଛି।
ରାଜନେତା, ଠିକାଦାର ଛାନିଆ
‘କିଙ୍ଗ୍ ଅଫ୍ ଫରେଷ୍ଟ’ ଗ୍ୟାଙ୍ଗ୍ର ୪ ସଦସ୍ୟ ଗିରଫ ହେବା ପରେ ରାଜନେତା, ବ୍ୟବସାୟୀ, ଠିକାଦାର ଛାନିଆ ହୋଇପଡ଼ିଛନ୍ତି। ବଟି ଦେଉଥିବା ବ୍ୟକ୍ତିଙ୍କ ତାଲିକା ପୋଲିସର ହସ୍ତଗତ ହୋଇଛି। ସେମାନେ କାହିଁକି ଏତେ ପରିମାଣର ଟଙ୍କା ଦେଉଥିଲେ, ଥାନାରେ କାହିଁକି ଅଭିଯୋଗ କରି ନ ଥିଲେ ଏସବୁ ପ୍ରଶ୍ନର ଉତ୍ତର ଜାଣିବାକୁ ପୋଲିସ ଉଦ୍ୟମ ଆରମ୍ଭ କରିଛି। ଏପରି କି ସମ୍ପୃକ୍ତ ବ୍ୟବସାୟୀ, ରାଜନେତାଙ୍କୁ ବିଧିବଦ୍ଧ ଭାବେ ଥାନାରେ ଅଭିଯୋଗ କରିବା ଲାଗି ନିର୍ଦ୍ଦେଶ ଦିଆଯାଇଛି। ତଥାପି ସେମାନେ ଏତଲା ନ ଦେଲେ ପୋଲିସ ନିଜ ଆଡୁ ମାମଲା ରୁଜୁ କରିବ ବୋଲି ଏସ୍ପି ସୂଚନା ଦେଇଛନ୍ତି। ଠିକାଦାରି ଓ ଲଘୁ ଖଣିଜ ପଦାର୍ଥ ଚାଲାଣ ଭଳି ଲାଭଦାୟକ ବ୍ୟବସାୟରେ ରାଜନେତାଙ୍କ ହାତ ରହୁଥିବାବେଳେ ସେମାନେ ବିଭିନ୍ନ ଉପାୟରେ ସରକାରୀ ଅର୍ଥ ହଡ଼ପ କରୁଛନ୍ତି। ସମ୍ଭବତଃ ସେମାନେ ନିଜର ଅପରାଧ ଲୁଚାଇବାକୁ ଏହି ଗ୍ୟାଙ୍ଗକୁ ବଟି ଦେବା ସହ ବିଭିନ୍ନ ଆପରାଧିକ କାର୍ଯ୍ୟରେ ବ୍ୟବହାର କରୁଥିବା ଚର୍ଚ୍ଚା ହେଉଛି।
ଅପରାଧର ଲମ୍ବା ତାଲିକା
କାହ୍ନୁ ସାହୁ ହତ୍ୟା ଉଦ୍ୟମ ମାମଲାରେ ଜଡ଼ିତ ଅଭିଯୁକ୍ତମାନେ ପେସାଦାର ଅପରାଧୀ। ସେମାନଙ୍କ ନାମରେ କାମାକ୍ଷାନଗର ଏବଂ ତୁମୁସିଙ୍ଗା ଥାନାରେ ଡକାୟତି, ବୋମାମାଡ଼, ମାରଣାସ୍ତ୍ର ଦେଖାଇ ଭୟଭୀତ କରିବା ଭଳି ବହୁ ସଙ୍ଗିନ ମାମଲା ରହିଛି। ଖଟଖୁରା ଅଞ୍ଚଳର ଜଣେ କଣ୍ଟ୍ରାକ୍ଟରଙ୍କଠାରୁ ହୋଇଥିବା ଡକାୟତି ଘଟଣାରେ ଏମାନେ ସାମିଲ ଥିଲେ। ସେହିପରି ଯଶୋବନ୍ତ ପରିଡ଼ା ହାତ୍ୟାକାଣ୍ଡ ମାମଲାର ଅନ୍ୟତମ ଅଭିଯୁକ୍ତ ସୁବାସ ଖୁଣ୍ଟିଆଙ୍କ ନାମରେ କାମାକ୍ଷାନଗର ଥାନାରେ ଏକ ଡିଜେଲ ଚୋରି ମାମଲା ରହିଥିବା ପୋଲିସ ସୂଚନା ଦେଇଛି।
ସର୍ବସାଧାରଣରୁ ହଟିଲା ପୋଷ୍ଟର
କାମାକ୍ଷାନଗର ଏନ୍ଏସିରେ ଛାଇଯାଇଥିଲା ‘ଦି କିଙ୍ଗ୍ ଅଫ୍ ଫରେଷ୍ଟ’ ଲେଖାଥିବା ପୋଷ୍ଟର। ୨୦୨୩ ନବବର୍ଷର ଶୁଭେଚ୍ଛା ଜଣାଇ ହତ୍ୟା ଅଭିଯୁକ୍ତ ରାକେଶ ନାଥ ଏଗୁଡ଼ିକୁ ବିଭିନ୍ନ ସ୍ଥାନରେ ଲଗାଇଥିଲେ। ତେବେ ଉକ୍ତ ପୋଷ୍ଟର ପଛର ସତ୍ୟତା ପଦାକୁ ଆସିବା ପରେ ପୋଲିସ ସେଗୁଡ଼ିକୁ ହଟାଇବା ଆରମ୍ଭ କରିଛି। ଅଭିଯୁକ୍ତ ସୁବାସ ଖୁଣ୍ଟିଆଙ୍କୁ ନେଇ ସିନ୍ ରିକ୍ରିଏଶନ ସମୟରେ କାମାକ୍ଷାନଗର ବିଦ୍ୟୁତ୍ ବିଭାଗ ନିକଟ ରାଧାକୃଷ୍ଣ ପଡ଼ିଆ ସଂଲଗ୍ନ ପାଚେରିରେ ଲାଗିଥିବା ଏଭଳି ପୋଷ୍ଟରକୁ ବାହାର କରାଯାଇଥିଲା।
