ଭୁବନେଶ୍ୱର,୭।୮(ବ୍ୟୁରୋ): ଓଡ଼ିଶାର ହସ୍ତତନ୍ତ ଆଜି ବିଶ୍ୱବିଦିତ। ଭାରତ ସମେତ ବିଭିନ୍ନ ଦେଶରେ ଏହାର ଭଲ ଚାହିଦା ରହିଛି। ସମ୍ବଲପୁରୀ ଶାଢ଼ୀ, ଖୋର୍ଦ୍ଧା ଗାମୁଛା, ବରମପୁରୀ ପାଟ, ବମକେଇ ପାଟ, ବାନ୍ଧ, ସୋନପୁରୀ, ହାବସ୍ପୁରୀ ପ୍ରମୁଖ ବିଶ୍ୱ ବଜାରରେ ଓଡ଼ିଶାର ସ୍ବତନ୍ତ୍ର ପରିଚୟ ସୃଷ୍ଟି କରିଛି। ଦିନଥିଲା ଓଡ଼ିଶା ନିଜର ଏହି ସ୍ବତନ୍ତ୍ର ବସ୍ତ୍ର ରପ୍ତାନୀ କରି ଅର୍ଥନୀତି ବଜାୟ ରଖିଥିଲା। ବୁଣାକାରଙ୍କ ଆର୍ଥିକ ସ୍ଥିତି ମଧ୍ୟ ବେଶ୍ ଭଲ ରହୁଥିଲା। ଅଳ୍ପ କେତେକ ଅଞ୍ଚଳରେ ସୀମିତ ଥିବା ହସ୍ତତନ୍ତ, ହସ୍ତକଳା, ବୟନ ଶିଳ୍ପର ପରିସର ଧୀରେ ଧୀରେ ବ୍ୟାପକ ହେଉଥିବାବେଳେ ରାଜ୍ୟରେ ବୁଣାକାରଙ୍କ ସଂଖ୍ୟା କମିବାରେ ଲାଗିଛି। ପ୍ରୋତ୍ସାହନ ଅଭାବରୁ ଅନେକ କୌଳିକ ବୃତ୍ତିରୁ ଦୂରେଇ ଯାଉଛନ୍ତି। ଏପରିସ୍ଥିତିରେ ହସ୍ତତନ୍ତରେ ଆଧୁନିକ ଅଧ୍ୟାୟ ନୂଆ ସମ୍ଭାବନା ସୃଷ୍ଟି କରିଛି। ପାରମ୍ପାରିକ ପୋଷାକରେ ଆଧୁନିକତାର ଛାପ ଦେଖିବାକୁ ମିଳୁଛି। ହାତକାମର ନିଖୁଣ କାରିଗରୀ ଓ ନୂଆ ଡିଜାଇନ୍ ନିଆରା ଆକର୍ଷଣ ପାଲଟିଛି। ଏବେ ରାମ୍ପ୍ ଓ ଫ୍ୟାଶନ ଶୋ’ ହେଉ କି ପ୍ରଦର୍ଶନୀ, ସବୁଠି ଏଭଳି ଡିଜାଇନ୍ର ଚାହିଦା ବୃଦ୍ଧି ପାଉଥିବା ଦେଖିବାକୁ ମିଳୁଛି। ସରକାର ଏହାକୁ ନେଇ ଯୋଜନା, ପ୍ରୟାସ ଓ ପ୍ରୋତ୍ସାହନ ଯୋଗାଇଦେଲେ ବୁଣାକାରଙ୍କ ମଧ୍ୟରେ ପୂର୍ବ ଉତ୍ସାହ, ଆଗ୍ରହ ବଢ଼ିବା ସହ ନିଜ ସାମଗ୍ରୀର ମାନ, ଗୁଣ ବୃଦ୍ଧି ହୋଇପାରିବ। ଏଥିସହ ଆବଶ୍ୟକ ପ୍ରଚାର ପ୍ରସାର, ବଜାର ବୃଦ୍ଧି କରାଗଲେ ସେମାନଙ୍କ ଆର୍ଥିକ ଉନ୍ନତିରେ ବେଶ୍ ସହାୟକ ହେବ। ଆଜି ଜାତୀୟ ହସ୍ତତନ୍ତ ଦିବସ ପରିପ୍ରେକ୍ଷୀରେ ‘ଧରିତ୍ରୀ’ର ସ୍ବତନ୍ତ୍ର ଉପସ୍ଥାପନା।
