ଦିଗପହଣ୍ଡି,୨୫।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଭ୍ରମରପୁର ପଞ୍ଚାୟତ ନାରାୟଣପୁର ଗ୍ରାମର ଜଣେ ୧୭ ବର୍ଷୀୟା ନାବାଳିକଙ୍କୁ ବିବାହ କରିବା ପାଇଁ ନିମନ୍ତ୍ରଣପତ୍ର ବଣ୍ଟା ସରିଥିଲା। ବାହାଘର ପାଇଁ ପରିବାର ପକ୍ଷରୁ ସମସ୍ତ ପ୍ରସ୍ତୁତି ଚାଲିଥିଲା। ଘରେ ପହଞ୍ଚିଥିଲେ ସମସ୍ତ ବନ୍ଧୁ ବାନ୍ଧବ। ବୁଧବାର ହୋଇଥାଆନ୍ତା ବାହାଘର। ଖବରପାଇ ପୋଲିସ ପ୍ରଶାସନ ପହଞ୍ଚିବା ସହ ବାଲ୍ୟ ବିବାହକୁ ରୋକିଥିବା ଜଣାପଡିଛି। ଦିଗପହଣ୍ଡି ସିଡିପିଓ ପୁଷ୍ପାଞ୍ଜଳି ବେହେରା ଏନେଇ ସୂଚନା ପାଇବା ପରେ କେ.ନୂଆଗାଁ ଥାନା ନୂଆପଡ଼ା ଫାଣ୍ଡି ଅଧିକାରୀ ସୁବାସ ଚନ୍ଦ୍ର ବାୟକଙ୍କ ସହ ନାବାଳିକାଙ୍କ ଘରେ ପହଞ୍ଚି ତାଙ୍କ ସ୍କୁଲ ସାର୍ଟିଫିକେଟ ଏବଂ ଆଧାରକାର୍ଡ ଯାଞ୍ଚ କରିବାରୁ ତାଙ୍କୁ ୧୭ ବର୍ଷ ୩ ମାସ ହୋଇଥିବା ଜଣାପଡିଥିଲା। ସିଡିପିଓ ଉପସ୍ଥିତ ମାତା ପିତା ଓ ସମ୍ପର୍କୀୟଙ୍କୁ ବାଲ୍ୟ ବିବାହ ପରିଣତି ଏବଂ ପ୍ରଚଳିତ ଆଇନ ବ୍ୟବସ୍ଥା ସମ୍ପର୍କରେ ବୁଝାସୁଝା କରିବା ପରେ ସେମାନେ ବିବାହ କାର୍ଯ୍ୟ ବନ୍ଦ ରଖିବାକୁ ସହମତି ପ୍ରକାଶ କରିଥିଲେ। ନାବାଳିକାଙ୍କ ପରିବାର ଲୋକେ ନିଜ ଭୁଲ ବୁଝିବା ସହିତ ୧୮ ବର୍ଷ ପୂରିବା ପରେ ହିଁ ଝିଅ ବାହାଘର କରିବେ ବୋଲି ଲିଖିତ ପତ୍ର ସିଡିପିଓଙ୍କୁ ପ୍ରଦାନ କରିଥିବା ଜଣାପଡିଛି।
