ଖଇରା,୮ା୪(ଉତ୍କଳବନ୍ଧୁ ପଣ୍ଡା): ବାଲେଶ୍ୱର ଜିଲା ଖଇରା ତହସିଲ ଅଧୀନ ଶାରିଶୁଆ ପାହାଡ଼ରେ ଖଣି ବ୍ୟବହାରର ଅବଧି ମାର୍ଚ୍ଚ ୩୧ତାରିଖରୁ ଶେଷ ହେଲାଣି। ତେବେ ଜିଲା ଖଣି ବିଭାଗର ଅଙ୍କୁଶ ନ ଥିବା କାରଣରୁ ଏବେ ୬୦ରୁ ଅଧିକ ଖଣି ଚୋରାରେ ଚାଲିଛି। ପ୍ରଥମେ କ୍ରସର ମାଲିକମାନଙ୍କ ଜରିଆରେ କୌଶଳପୂର୍ଣ୍ଣ ଭାବେ ପଥର ଖଣ୍ଡକୁ କ୍ରସରକୁ ଟ୍ରିପ୍ ଟ୍ରିପ୍ ସଂଖ୍ୟାରେ ଆଣି ମହଜୁଦ କରି ରଖିବା ପରେ ଚିପ୍ସକୁ ବାହାରକୁ ଚାଲାଣ କରାଯାଉଛି। ଅଧିକାରୀମାନେ ଏହାକୁ ୩୧ତାରିଖ ପୂର୍ବର ପୁରୁଣା ଗଛିତ ଚିପ୍ସ ଆଖ୍ୟାଦେଇ ଖଣି ବ୍ୟବସାୟୀଙ୍କୁ ଲୁଟ ପାଇଁ ପୂର୍ଣ୍ଣ ସହଯୋଗ କରୁଥିବା ଅଭିଯୋଗ ହୋଇଛି। ସେପଟେ ପ୍ରବଳ ଗରମରେ ଅତ୍ୟଧିକ ଭାରୀଯାନ ଚଳାଚଳ ସାଧାରଣ ଲୋକଙ୍କୁ ଅତିଷ୍ଠ କରୁଛି। ନିଲାମ ନେଇଥିବା ଖଣିଗୁଡ଼ିକର ଅବଧି ମାର୍ଚ୍ଚ ୩୧ତାରିଖରେ ଶେଷ ହୋଇ ଯାଇଛି। ପୁନଃ ନବୀକରଣ ପର୍ଯ୍ୟନ୍ତ ସମସ୍ତ ଖଣି ବନ୍ଦ ରହିବା କଥା ଏବଂ ଚୋରିକୁ ଅଟକାଇବା ପାଇଁ ଖଣି ଓ ରାଜସ୍ବ ବିଭାଗ ସ୍ବତନ୍ତ୍ର ଭାବେ ନଜରରେ ରଖିବା କଥା। ହେଲେ ଉପରୋକ୍ତ ୨ବିଭାଗ ଏବେ ସ୍ଥାଣୁ ପାଲଟିବା ଖଣି ଚୋରିକୁ ଅଧିକ ପ୍ରୋତ୍ସାହନ ଦେଉଛି। ୨୦୨୩ ରେ ଉକ୍ତ ପାହାଡ଼ର ୧୫ଟି ଖଣି ଚଲାଇବା ପାଇଁ ଲିଜ୍ ପ୍ରଦାନ କରାଯାଇଥିଲା। ହେଲେ ଏହି ୧୫ଟି ଖଣି ନୀତିନିୟମରେ ଚାଲୁଥିବା ବେଳେ ଏହାକୁ ଢାଲ କରି ୬୦ରୁ ଊଦ୍ଧ୍ୱର୍ର୍ ଖଣି ଚୋରାରେ ୬ ମାସ ଧରି ଚାଲିଥିଲେ ହେଁ ଖଣି ବିଭାଗ କାଁ ଭାଁ
ଚଢ଼ାଉ କରି ଛାଡିଦେଇଥିଲେ। ଏବେ ମାର୍ଚ୍ଚରୁ ନିଲାମ ଅବଧି ଶେଷ ହୋଇଥିଲେ ହେଁ ପୂର୍ବଭଳି ଖଣିକୁ ଶହଶହ ସଂଖ୍ୟାର ଗାଡ଼ି ଯାତାୟାତ କରଛନ୍ତି। ଯେଉଁଥିପାଇଁ ପ୍ରଚଣ୍ଡ ଗ୍ରୀଷ୍ମପ୍ରବାହ ସମୟରେ ଅସ୍ବାସ୍ଥ୍ୟକର ପରିବେଶ ପାଇଁ ଗୁଆପାଳ, ବଗେଇପୁର, କଦଳିଗଡିଆ, ଗାଭର ଗ୍ରାମବାସୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। କେବଳ ଏତିକି ନୁହେଁ ସ୍କୁଲ ଓ କଲେଜ ପିଲାମାନେ ଉକ୍ତ ରାସ୍ତା ଦେଇ ଭୟାତୁର ଅବସ୍ଥାରେ ଯିବାଆସିବା କରୁଛନ୍ତି। ନିୟମ ଉଲ୍ଲଘଂନ କରୁଥିବା କ୍ରସରଗୁଡ଼ିକର ଷ୍ଟକ ଯାଞ୍ଚ କରାଯିବା ସହ ନବୀକରଣ ଗାଇଡ୍ଲାଇନକୁ କଡ଼ାକଡ଼ି କରିବାକୁ ସ୍ଥାନୀୟ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ଜିଲା ଅତିରିକ୍ତ ଖଣି ନିର୍ଦ୍ଦେଶକ ସନ୍ତୋଷ ଦଳେଇଙ୍କୁ ପଚାରିବାରୁ ବେଆଇନ ପଥରଗାଡ଼ି ଅଟକାଇ ଖବର ଦେଲେ ସେ ଆସି କାର୍ଯ୍ୟାନୁଷ୍ଠାନ ଗ୍ରହଣ କରିବେ। କାରଣ ବହୁ ସମୟରେ ସେ ଖଣିରେ ଚଢ଼ାଉ ପାଇଁ ପହଞ୍ଚତ୍ବା ପୂର୍ବରୁ ଖଣି ଚୋରମାନେ ଖସି ପଳାଇଯିବାକୁ ସମର୍ଥ ହେଉଥିବା କହିଛନ୍ତି।
