ଗଞ୍ଜାମ,୬।୧୨(ବିଦ୍ୟାଧର ସାହୁ): ସ୍ଥାନୀୟ ଅଞ୍ଚଳବାସୀଙ୍କ ବୃହତ ସ୍ବାର୍ଥ ଦୃଷ୍ଟିରୁ ତଥା ଶରୀର ସୁସ୍ଥ ଓ ଶବଳ ରଖିବା ଲାଗି ଭାରତୀ ବିଦ୍ୟାପୀଠ ମିନି ଷ୍ଟାଡିୟମଠାରେ ତତ୍କାଳୀନ ସରକାରଙ୍କ ପକ୍ଷରୁ ବିଭିନ୍ନ ବ୍ୟାୟାମ ସାମଗ୍ରୀର ବ୍ୟବସ୍ଥା କରାଯାଇଥିଲା। ବର୍ତ୍ତମାନ ଏହି ଷ୍ଟାଡିୟମଠାରେ ଥିବା ବ୍ୟୟାମ କେନ୍ଦ୍ର ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଥିବା ଦେଖିବାକୁ ମିଳିଛି l ସକାଳ ହେଲେ ଗଞ୍ଜେଇ ଖିଆଙ୍କ ବାସସ୍ଥଳୀ ଏବଂ ସନ୍ଧ୍ୟା ହେଲେ ମଦୁଆଙ୍କ ଭିଡ଼ ଜମୁଛି l ମାଳମାଳ ମଦ ବୋତଲ ଓ ପାଣି ବୋତଲ ମାଂସ ହାଡ଼ ଆଦି ପଡ଼ିଥିବା ଦେଖିବାକୁ ମିଳୁଛି l ଏନଏସି ପ୍ରଶାସନର ବେପରୁଆ ନୀତି ଏବଂ ଦୂରଦୃଷ୍ଟି ଅଭାବରୁ ତାହା ଠିକ ଭାବେ ରକ୍ଷଣବେକ୍ଷଣ କରାଯାଉନାହିଁ। ଯାହା ଫଳରେ ଲକ୍ଷାଧିକ ଟଙ୍କା ମୂଲ୍ୟର ଏହି ସବୁ ସାମଗ୍ରୀ ଭାଙ୍ଗିରୁଜି ଯାଇଥିବା ଦେଖିବାକୁ ମିଳିଛି l ବର୍ତମାନ ତାହା ଆଉ ବ୍ୟବହାର ଯୋଗ୍ୟ ନୁହେଁ ବୋଲି ସୂଚନା ମିଳିଛି l ସହରରେ ଏମିତି ଅନେକ ପ୍ରକଳ୍ପ ବ୍ୟବହାର ପୂର୍ବରୁ ଭାଙ୍ଗି ଯାଇଥିବା ଦେଖିବାକୁ ମିଳିଛି। ତାହା ମଧ୍ୟ ବ୍ୟବହାର ଯୋଗ୍ୟ ହୋଇ ରହିନାହିଁ l ଏହାକୁ ନେଇ ଘୋର ଅସନ୍ତୋଷ ବ୍ୟକ୍ତ କରିଛନ୍ତି ସହରବାସୀ l ପିସି କାରବାର ଜୋର ସୋରରେ ଚାଲିଥିବା ଯୋଗୁ ଠିକାଦାର ନିମ୍ନ କାମ କରି ଫାଇଦା ଉଠାଉଛନ୍ତି l ସମସ୍ୟା ଭୋଗ କରୁଛନ୍ତି ଅଞ୍ଚଳବାସୀ। ଏଥିସହ ବ୍ୟାୟାମ ସ୍ଥାନରେ କୁଢ଼ କୁଢ଼ ଅଳିଆ ଆବର୍ଜନା ମାସ ମାସ ଧରି ପଡିରହୁଛି l ପରିବେଶ ଦୂଷିତ ସହ ଦୁର୍ଘନ୍ଧରେ ନାକ ଫାଟି ପଡୁଛି l ଏଥିପାଇଁ ଲୋକେ ବ୍ୟାୟାମ କରିବାକୁ ନ ଆସି ମୁହଁ ଫେରାଉଛନ୍ତି l ରାତିରେ ପୋଲିସ ପେଟ୍ରୋଲିଂ କଡାକଡି କରିବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି l
