ନୂଆଦିଲ୍ଲୀ,୧୪।୨: ରାଜ୍ୟ ସଭା ଏମପି ରାଘବ ଚଢା ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କ ସାମ୍ପ୍ରତିକ ବୟାନର କଡ଼ା ଜବାବ ଦେଇଛନ୍ତି। ସେ ଏକ ଭିଡିଓ ବାର୍ତ୍ତା ଜାରି କରି କହିଛନ୍ତି ଯେ ଅର୍ଥମନ୍ତ୍ରୀ ସାଧାରଣ ଲୋକଙ୍କୁ ବୈଷୟିକ ମାମଲାରେ ଫସାଇ ଭ୍ରମିତ କରିବାକୁ ଚେଷ୍ଟା କରୁଛନ୍ତି। ସେ ମଧ୍ୟବିତ୍ତ ବର୍ଗଙ୍କ ପାଇଁ ଟିକସ ବ୍ୟବସ୍ଥା ସମ୍ପର୍କରେ ସରକାରଙ୍କ ଉପରେ ପ୍ରଶ୍ନ ଉଠାଇଥିଲେ।
ଆମ ଆଦମୀ ପାର୍ଟିର ରାଜ୍ୟ ସଭା ଏମପି ରାଘବ ଚଢା କହିଛନ୍ତି, ଯଦି ଜଣେ ବ୍ୟକ୍ତିଙ୍କ ବାର୍ଷିକ ଆୟ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଥାଏ, ତେବେ ତାଙ୍କୁ ଟିକସ ଛାଡ଼ ମିଳିଥାଏ, କିନ୍ତୁ ଏହା ସମ୍ପୂର୍ଣ୍ଣ ଟିକସ ଛାଡ଼ ନୁହେଁ। ଏହାର ଅର୍ଥ ହେଉଛି ଯଦି କାହାର ଆୟ ୧୨ ଲକ୍ଷ ଟଙ୍କାରୁ ଅଧିକ ହୁଏ, ତେବେ କେବଳ ଅତିରିକ୍ତ ଆୟ ଉପରେ ନୁହେଁ ବରଂ ସମ୍ପୂର୍ଣ୍ଣ ଆୟ ଉପରେ ଟିକସ ଲାଗୁ ହେବ। ସେ ଏକ ଉଦାହରଣ ଦେଇ ବୁଝାଇଲେ ଯେ ଯଦି ଜଣେ ବ୍ୟକ୍ତିଙ୍କ ବାର୍ଷିକ ଆୟ ୧୨.୭୬ ଲକ୍ଷ ଟଙ୍କା ହୁଏ, ତେବେ କେବଳ ୭୬,୦୦୦ ଟଙ୍କା ଉପରେ ନୁହେଁ ବରଂ ସମଗ୍ର ୧୨.୭୬ ଲକ୍ଷ ଟଙ୍କା ଉପରେ ଟିକସ ଲାଗୁ ହେବ। ଏହାକୁ ଅନ୍ୟାୟ ବୋଲି କହି ସେ କହିଛନ୍ତି ଯେ ଏହି ସରକାର ସାଧାରଣ ଲୋକଙ୍କୁ ଭ୍ରମିତ କରୁଛି।
ଆମ ଆଦମୀ ପାର୍ଟି ନେତା ରାଘବ ଚଢା କହିଛନ୍ତି ଯେ ସରକାର ଏପରି କଥା କହି ସାଧାରଣ ଲୋକଙ୍କୁ ଭୁଲ ସୂଚନା ଦେଉଛନ୍ତି। ସେ ଅର୍ଥମନ୍ତ୍ରୀଙ୍କୁ ଅନୁରୋଧ କରି କହିଥିଲେ ପରବର୍ତ୍ତୀ ସମୟରେ ଏହି ବିଷୟରେ କଥା ହେବା ପୂର୍ବରୁ ତଥ୍ୟକୁ ସଠିକ ଭାବରେ ପ୍ରସ୍ତୁତ କରିବେ, ତା’ସହ ବ୍ୟକ୍ତିଗତ ଆକ୍ରୋଶରୁ ଦୂରେଇ ରହିବେ। ସୂଚନାଯୋଗ୍ୟ, ୨୦୨୪ ବଜେଟ ପରଠାରୁ ଟିକସ ବ୍ୟବସ୍ଥା ଉପରେ ନିରନ୍ତର ବିତର୍କ ଚାଲିଛି।
ନୂତନ ଟିକସ ବ୍ୟବସ୍ଥାରେ ସରକାର ୭ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ ଟିକସ ଛାଡ଼ ଦେଇଛନ୍ତି, କିନ୍ତୁ ବିଶେଷଜ୍ଞମାନେ କହିଛନ୍ତି ଯେ ମଧ୍ୟବିତ୍ତ ବର୍ଗ ଏଥିରୁ କୌଣସି ବିଶେଷ ଲାଭ ପାଉ ନାହାଁନ୍ତି। ବିରୋଧୀ ଦଳଗୁଡ଼ିକ ନିରନ୍ତର ଏହି ପ୍ରସଙ୍ଗ ଉଠାଇ ଆସୁଛନ୍ତି ଯେ ସରକାରଙ୍କ ନୀତି ସାଧାରଣ ଲୋକଙ୍କ ବିରୁଦ୍ଧରେ ଯାଉଛି।
