ଦୁବାଇ, ୧୮ା୫ (ପି.ଟି.)- ଭାରତର ଇଂଲଣ୍ଡ (୨୦୧୬) ଓ ଅଷ୍ଟ୍ରେଲିଆ (୨୦୧୭) ବିପକ୍ଷ ଟେଷ୍ଟ ମ୍ୟାଚରେ ଫିକ୍ସିଂ ହୋଇଥିବା ନ୍ୟୁଜ୍ ଚ୍ୟାନେଲ ଅଲ୍ ଜଜିରାରେ ଯେଉଁ ରିପୋର୍ଟ ପ୍ରକାଶ ପାଇଥିଲା, ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ସୋମବାର ତାହାର ଖଣ୍ଡନ କରିଛି। ଏହା ଏକ କପୋଳକଳ୍ପିତ ରିପୋର୍ଟ ବୋଲି ଦର୍ଶାଇଛି। ୨୦୧୮ରେ ଅଲ୍ ଜଜିରାରେ ‘କ୍ରିକେଟ୍ସ ମ୍ୟାଚ୍ ଫିକ୍ସର୍ସ’ ଶୀର୍ଷକ ଏକ ଡକ୍ୟୁମେଣ୍ଟାରି ରିଲିଜ କରାଯାଇଥିଲା। ଏଥିରେ ୨୦୧୬ରେ ଚେନ୍ନାଇରେ ଭାରତର ଇଂଲଣ୍ଡ ବିପକ୍ଷ ଗେମ୍ ଏବଂ ୨୦୧୭ରେ ରାଞ୍ଚତ୍ରେ ଅଷ୍ଟ୍ରେଲିଆ ବିପକ୍ଷରେ ଏକ ଗେମ୍ରେ ଫିକ୍ସିଂ ହୋଇଥିବା ବିଷୟ ଚିତ୍ରଣ କରାଯାଇଥିଲା। ଆଇସିସି ଆହୁରି ମଧ୍ୟ ଚ୍ୟାନେଲରେ ପ୍ରସାରଣ କରାଯାଇଥିବା ଡକ୍ୟୁମେଣ୍ଟାରିରେ ଅଂଶଗ୍ରହଣ କରିଥିବା ୫ଜଣ ବ୍ୟକ୍ତିଙ୍କୁ ଦୋଷମୁକ୍ତ କରିଛି। ସେମାନଙ୍କ ଆଚରଣକୁ ନେଇ ପ୍ରଶ୍ନ ଉଠାଯାଇପାରେ ହେଲେ ଦୋଷାରୋପ କଲାଭଳି କୌଣସି ପ୍ରାମାଣିକ ତଥ୍ୟ ଉପଲବ୍ଧ ନ ଥିଲା। ପ୍ରସାରିତ ପ୍ରୋଗ୍ରାମ୍ରେ ତଥାକଥିତ ଅନିଲ ମୁନାଓ୍ବାର ନାମକ ଜଣେ ବୁକି ଏହି ଦୁଇଟି ମ୍ୟାଚରେ ଫିକ୍ସିଂ କାର୍ଯ୍ୟକଳାପରେ ଲିପ୍ତ ଥିବା ଦାବି କରିଥିଲେ। ଏଥିରେ ୪ଜଣ ଇଣ୍ଡିପେଣ୍ଡେଣ୍ଟ ବେଟିଂ ଓ କ୍ରିକେଟିଂ ସ୍ପେଶାଲିଷ୍ଟ ଏହାର ବିଶ୍ଳେଷଣ କରିଥିଲେ। ମୁନାଓ୍ବାରଙ୍କ ଦାବି ଉପରେ ଆଇସିସି ପକ୍ଷରୁ ଏକ ତଦନ୍ତ କରାଯାଇଥିଲା। ଆଇସିସି ପକ୍ଷରୁ ଦୋଷମୁକ୍ତ ବ୍ୟକ୍ତିମାନଙ୍କ ନାମ ପ୍ରକାଶ କରାଯାଇନାହିଁ। ହେଲେ ଖବର ଅନୁସାରେ ସେମାନଙ୍କ ମଧ୍ୟରେ ପାକିସ୍ତାନ କ୍ରିକେଟର ହସନ ରାଜା, ଶ୍ରୀଲଙ୍କାର ଥରଙ୍ଗା ଇଣ୍ଡିକା ଓ ଥରିନ୍ଦୁ ମେଣ୍ଡିସ ରହିଛନ୍ତି। ଓ୍ବାଲର୍ଡ ଗଭର୍ନିଂବଡି ଏମାନଙ୍କୁ ତଦନ୍ତ ପରିସରଭୁକ୍ତ କରିଥିଲା। ଡକ୍ୟୁମେଣ୍ଟାରିରେ ମୁମ୍ବାଇର ପ୍ରଥମ ଶ୍ରେଣୀ କ୍ରିକେଟର ରବିନ ମୋରିସଙ୍କୁ କିଛି ସମୟ ଦେଖିବାକୁ ମିଳିିଥିଲା, ହେଲେ ତାଙ୍କୁ ତଦନ୍ତରେ ସାମିଲ କରାଯାଇ ନ ଥିଲା। ଏହି ୫ ଜଣ ଆଇସିସିର ଦୁର୍ନୀତି ନିବାରଣ ଆଚରଣ ସଂହିତା ଉଲ୍ଲଂଘନ କରିବା ଭଳି କୌଣସି କାର୍ଯ୍ୟ କରି ନ ଥିବା ଆଇସିସି କହିଛି। ଆଇସିସି ପକ୍ଷରୁ ୩ଟି ଦିଗରୁ ତଦନ୍ତ କରାଯାଇଥିଲା ବୋଲି ଇଣ୍ଟିଗ୍ରିଟି ୟୁନିଟ୍ର ଜେନେରାଲ ମ୍ୟାନେଜର ଆଲେକ୍ସ ମାର୍ଶାଲ ପ୍ରକାଶ କରିଛନ୍ତି। ପ୍ରଥମତଃ ପ୍ରୋଗ୍ରାମ ଦ୍ୱାରା ଦାବି କରାଯାଇଥିବା ବିଷୟବସ୍ତୁ, ଦ୍ୱିତୀୟତଃ ଯେଉଁମାନେ ଫିକ୍ସିଂରେ ସମ୍ପୃକ୍ତ ଥିବା ସନ୍ଦେହ କରାଯାଉଛି ଏବଂ ତୃତୀୟତଃ ଡକ୍ୟୁମେଣ୍ଟାରିପ୍ରସ୍ତୁତ କରିବା ଲାଗି ସେମାନେ କେଉଁଠାରୁ ପ୍ରାମାଣିକ ତଥ୍ୟ ପାଇଲେ।
