ଇ-ମେଲ୍‌ରେ ତୁଟିଗଲା ବିବାହ
8:38 pmApril 14, 2023April 14, 2023 / 09

ଓ୍ବାଶିଂଟନ୍‌: ଆମେରିକୀୟ ବ୍ୟବସାୟୀ ରୁପର୍ଟ ମୁର୍ଡୋଚ୍‌ ସ୍ତ୍ରୀ ଜେରୀ ହାଲଙ୍କ ସହ ବିବାହ ସମ୍ପର୍କ ଚ୍ଛିନ୍ନ କରିଛନ୍ତି। ରୁପର୍ଟ ଜେରୀଙ୍କୁ ୧୧ଟି ଶବ୍ଦରେ ଏକ ଇ-ମେଲ୍‌ ପଠାଇ ବିବାହ ବିଚ୍ଛେଦର ସୂଚନା ଦେଇଥିବାକୁ ନେଇ ଏବେ ଚାରିଆଡ଼େ ଚର୍ଚ୍ଚା। ୨୦୧୬ରେ ରୁପର୍ଟ ଜେରୀଙ୍କୁ ବିବାହ କରିଥିଲେ। ଫୋକ୍ସ ନ୍ୟୁଜ୍‌ କର୍ପୋରେଶନ୍‌ର ଅଧ୍ୟକ୍ଷ ୯୨ ବର୍ଷୀୟ ରୁପର୍ଟଙ୍କର ଏହାଥିଲା ଚତୁର୍ଥ ବିବାହ। ପ୍ରକାଶିତ ରିପୋର୍ଟ ଅନୁସାରେ ରୁପର୍ଟ ଜେରୀଙ୍କୁ ପଠାଇଥିବା ଇମେଲ୍‌ରେ ସେ ଲେଖିଥିଲେ ଯେ, ଜେରୀ, ମୁଁ ଆମ ବିବାହ ଶେଷ କରିବା ପାଇଁ ନିଷ୍ପତ୍ତି ନେଇଛି। ଏକାଠି ଆମେ ଖୁବ୍‌ ଭଲ ସମୟ ବିତାଇଛେ କିନ୍ତୁ ,ଏବେ ମୋତେ ବହୁତ କିଛି କରିବାକୁ ଅଛି। ରୁପର୍ଟଙ୍କ ଓକିଲ ଜେରୀଙ୍କୁ ତୁରନ୍ତ ଯୋଗାଯୋଗ କରିବ ବୋଲି ସେ କହିଥିଲେ। ରୁପର୍ଟ ଏବେ ଆନ୍‌ ଲେସ୍‌ଲି ସ୍ମିଥଙ୍କ ସହ ଛୁଟି କାଟୁଥିବାର ଦେଖାଯାଇଛି। ଗତ ମାର୍ଚ୍ଚ ୧୭ରେ ସେ ଆନ୍‌ଙ୍କୁ ପ୍ରୋପୋଜ୍‌ କରିଥିଲେ।