କେନ୍ଦ୍ରାପଡ଼ା ଅଫିସ, ୧୭ା୪- ୫୮ ବର୍ଷୀୟ ଦୁର୍ଦ୍ଦାନ୍ତ ଗ୍ୟାଙ୍ଗଷ୍ଟର ଶେଖ ହାଇଦରଙ୍କ ସହ କେନ୍ଦ୍ରାପଡ଼ା ବଡ଼ ମୂଳବସନ୍ତର ଜଣେ ଯୁବତୀଙ୍କ ପ୍ରେମ ମହଙ୍ଗା ପଡ଼ିଛି। ଏସ୍ସିବିରୁ ଚମ୍ପଟ ମାରିବା ପରେ ହାଇଦର ତାଙ୍କର ଯେଉଁ ତିନି ପ୍ରେମିକାଙ୍କ ସହ ମୋବାଇଲ୍ରେ କଥା ହୋଇଥିଲେ, ସେମାନଙ୍କ ମଧ୍ୟରୁ ଏହି ଯୁବତୀଙ୍କ ସନ୍ଧାନ ପୋଲିସ ପାଇଥିଲା । ଯୁବତୀ ଓ ହାଇଦରଙ୍କ ବାର୍ତ୍ତାଳାପକୁ ପୋଲିସ ଟ୍ରାକ୍ କରି ତାଙ୍କୁ ଧରିବାରେ ସଫଳ ହୋଇଥିବା ସ୍ଥାନୀୟ ଅଞ୍ଚଳରେ ଆଲୋଚନା ଚାଲିଛି। କମିଶନରେଟ ପୋଲିସ ଅନ୍ୟ ୨ ପ୍ରେମିକାଙ୍କୁ ଗିରଫ କରିଥିବା ବେଳେ କେନ୍ଦ୍ରାପଡ଼ା ପୋଲିସ ସ୍ଥାନୀୟ ବଡ଼ ମୂଳବସନ୍ତର ଏହି ଯୁବତୀଙ୍କୁ ଧରି କମିଶନରେଟ ପୋଲିସକୁ ଶୁକ୍ରବାର ହସ୍ତାନ୍ତର କରିଛନ୍ତି। ଗିରଫ ଯୁବତୀଙ୍କ ବୟସ ୧୮ରୁ ୧୯ ବର୍ଷ। ତାଙ୍କ ୪୫ ବର୍ଷୀୟା ମାଆ କହିଛନ୍ତି, ହାଇଦର ତାଙ୍କ ଧରମ ପୁଅ । ତେବେ ହାଇଦର ଯେତେବେଳେ ବି କଟକ ମେଡ଼ିକାଲ ଆସିଛନ୍ତି, କ୍ୟାବିନରେ ଯୁବତୀ ଜଣକ ଅନେକ ରାତି ବିତାଇଥିବା ପ୍ରମାଣ ପୋଲିସ ହାତରେ ଲାଗିଥିବା ସୂଚନା ମିଳିଛିି । ସେହିପରି ହାଇଦରଙ୍କୁ ଫେରାର ହେବାରେ ସହଯୋଗ କରିଥିବା ତାଙ୍କ ୨ ପୁଅ ଅଜୁ ଓ ଚୁନ୍ନେଇ ଏବଂ ପୁତୁରା ରାଜୁ ଫେରାର ଥିବାବେଳେ କେନ୍ଦ୍ରାପଡ଼ା ଜିଲା ପୋଲିସ ଜୟିପୁରାର ଅନ୍ୟ ଜଣେ ସହଯୋଗୀ ପିଣ୍ଟୁକୁ ଧରି କମିଶନରେଟ ପୋଲିସକୁ ହସ୍ତାନ୍ତର କରଛି। ଅନ୍ୟପକ୍ଷେ ଏହି ଘଟଣା ପରେ ପୋଲିସ ଭୟରେ ହାଇଦରଙ୍କ ଝିଅ ଓ ଦୁଇ ଜ୍ୱାଇଁଙ୍କ ପରିବାର ଲୋକେ ଫେରାର ହୋଇଯାଇଛନ୍ତି।
