ନୂଆପଡ଼ା,୨୯।୧୨ (ମକାରୁ ବେମାଲ): ନୂଆପଡ଼ା ଜିଲା ସଦର ଥାନାରେ କାର୍ଯ୍ୟରତ ପୋଲିସ ସବ୍ଇନ୍ସିପେକ୍ଟର (ଏସ୍ଆଇ) ହରିଶ କୁମାର ବାରିକ(୩୩)ଙ୍କ ସଡ଼କ ଦୁର୍ଘଟଣାରେ ମୃତ୍ୟୁ ଘଟିଛି। ତାଙ୍କ ଘର ଖଡ଼ିଆଳ ଫୋକଟପଡାରେ।
ଶନିବାର ରାତି ୧୦ଟା ପରେ ସେ ପାଟ୍ରୋଲିଂ ସାରି ବାଇକ୍ରେ ଥାନାକୁ ଫେରୁଥିବା ସମୟରେ ୩୫୩ ନମ୍ବର ଜାତୀୟ ରାଜପଥ ଉପରେ ପାଢୀ ପେଟ୍ରୋଲ ପମ୍ପଠାରେ ଛିଡା ହୋଇଥିବା ଏକ ଟ୍ରକ୍ ଉପରେ ଭାରସାମ୍ୟ ହରାଇ ପିଟି ହୋଇଥିଲେ। ଫଳରେ ସେ ଗୁରୁତର ହୋଇଥିଲେ। ସ୍ଥାନୀୟ ଲୋକେ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରି ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଜବତ କରିଥିଲା। ରବିବାର ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏନେଇ ସଦର ଥାନାରେ ଏକ ମାମଲା ରୁଜୁ କରାଯାଇ ତଦନ୍ତ ଚାଲିଛି ବୋଲି ପୋଲିସ କହିଛି। ପ୍ରକାଶ ଯେ, ହରିଶ କଟକରେ ତାଲିମ ନେଇ ବରଗଡ଼ ଜିଲା ସୋହେଲା ଥାନାରେ ପ୍ରଥମେ କାର୍ଯ୍ୟରେ ଯୋଗଦେଇ ଦୁଇ ମାସ ହେବ ନୂଆପଡ଼ା ସଦର ଥାନାରେ କାର୍ଯ୍ୟରତ ଥିଲେ।
