ଭୁବନେଶ୍ୱର, ୨୩।୯(ବ୍ୟୁରୋ):କୋଭିଡ୍-୧୯ ମହାମାରୀକୁ ଦୃଷ୍ଟିରେ ରଖି ଏଥର ସଂସଦୀୟ ଢାଞ୍ଚାରେ ବିଧାନସଭା ମୌସୁମୀ ଅଧିବେଶନ ଚାଲିବ। ଏ ନେଇ ମଙ୍ଗଳବାର ବାଚସ୍ପତି ସୂର୍ଯ୍ୟନାରାୟଣ ପାତ୍ର ସୂଚନା ଦେଇଛନ୍ତି।
କେବଳ ପ୍ରଶ୍ନୋତ୍ତର କାର୍ଯ୍ୟକ୍ରମକୁ ଛାଡି ବିଧାନସଭା କାର୍ଯ୍ୟାବଳୀ ଅନୁଯାୟୀ ସମସ୍ତ କାର୍ଯ୍ୟ ସମ୍ପାଦନ ହେବ। ଯେପରି କି ଶୂନ୍ୟକାଳ, ମୁଲତବୀ, ମୋଶନ, ଧ୍ୟାନ ଆକର୍ଷଣକାରୀ ପ୍ରସ୍ତାବ ଆଦି ଚାଲିବ। ବିଧାୟକମାନେ ପରସ୍ପର ମଧ୍ୟରେ ୪ ଫୁଟ୍ ବ୍ୟବଧାନରେ ବସିବେ ପାର୍ଲାମେଣ୍ଟରେ ଏମ୍ପିଙ୍କ ସିଟ୍ ସମ୍ମୁଖରେ ଯେପରି ସିଲ୍ଡ କାଚ ଲଗାଯାଇଛ ବିଧାନସଭାରେ ସଦସ୍ୟମାନଙ୍କ ସିଟ୍ ସମ୍ମୁଖରେ ମଧ୍ୟ କାଚ ଲଗାଯିବ। ଦର୍ଶକ ଗ୍ୟାଲେରିରେ ବିଧାୟକମାନଙ୍କର ବସିବା ସୁବିଧା କରାଯିବ। ଯେଉଁ ବରିଷ୍ଠ ବିଧାୟକମାନେ ଗୃହ କାର୍ଯ୍ୟରେ ଯୋଗ ଦେଇ ପାରିବେ ନାହିଁ ସେମାନେ ଆଗୁଆ ସୂଚନା ଦେବେ। ନିଜ ଘର ଜିଲା ମୁଖ୍ୟାଳୟ କିମ୍ବା ଓକାକ୍ରେ ଭିଡିଓ କନ୍ଫରେନ୍ସରେ ଗୃହ କାର୍ଯ୍ୟରେ ଭାଗ ନେଇ ପାରିବେ। ସମସ୍ତ ଗଣମାଧ୍ୟମର ଗୋଟିଏ ଲେଖାଏ ଟିମ୍କୁ ଅନୁମତି ପ୍ରଦାନ କରାଯିବ।
ପ୍ରାକ୍ ପ୍ରସ୍ତୁତିକୁ ନେଇ ମଙ୍ଗଳବାର ବାଚସ୍ପତି ବିଧାନସଭା ପରିଦର୍ଶନ କରିଥିଲେ। ସେପ୍ଟେମ୍ବର ୨୯ରୁ ବିଧାନସଭାର ମୌସୁମୀ ଅଧିବେଶନ ଆରମ୍ଭ ହେବ। ଅକ୍ଟୋବାର ୭ ଯାଏ ଚାଲିବ। ଏଥିରେ ୮ଟି କାର୍ଯ୍ୟ ଦିବସ ରହିଛି। ଆସନ୍ତା ୨୭ ଓ ୨୮ ତାରିଖରେ ବିଧାୟକ, ସେମାନଙ୍କର ସୁରକ୍ଷା କର୍ମୀ, ଡ୍ରାଇଭର, ବିଧାନସଭା କର୍ମଚାରୀଙ୍କର କୋଭିଡ୍-୧୯ ପରୀକ୍ଷା କରାଯିବ। ତେବେ ଗୃହ ପରିଚାଳନା ନେଇ ଆସନ୍ତା ୨୫ ତାରିଖରେ ଏକ ସର୍ବଦଳୀୟ ବୈଠକ ଡକାଯାଇଛି। ବୈଠକରେ କୋଭିଡ୍କୁ ନେଇ କିପରି ଗୃହ ପରିଚାଳନା ହେବ ସେ ନେଇ ବିଭିନ୍ନ ଦଳର ନେତମାନଙ୍କ ସହ ବାଚସ୍ପତି ଆଲୋଚନା କରିବେ।
