ନିରାକାରପୁର,୧ା୧୨(ମାନସ ଚନ୍ଦ୍ର ପଟ୍ଟନାୟକ): ସୋମବାର ଗୋଟେ ବଡ଼ ଅଘଟଣରୁ ବର୍ତ୍ତିଯାଇଛି ଓଡ଼ିଶା ସରକାରଙ୍କ ଲକ୍ଷ୍ମୀ ବସ୍।
ପ୍ରକାଶ ଯେ, ଆଜି ଅପରାହ୍ନରେ ଖୋର୍ଦ୍ଧା ଜିଲା କାମାଗୁରୁ ପଞ୍ଚାୟତରେ ଥିବା ଏକ କଲେଜ ପାଖରେ ଟାଙ୍କୋଳରୁ କାମାଗୁରୁ ଅଭିମୁଖେ ମହିଳା ପାସେଞ୍ଜରଙ୍କୁ ନେଇ ଆସୁଥିବା ଲକ୍ଷ୍ମୀବସ୍ ଭାରସାମ୍ୟ ହରାଇ ବିଭିନ୍ନ ଗଛରେ ମାଡ଼ ହୋଇ କିଛି ବାଟ ଜଙ୍ଗଲ ଭିତରକୁ ପଶିଯାଇଥିଲା। ଫଳରେ ବସ୍ରେ ଥିବା ମହିଳା ଯାତ୍ରୀମାନେ ସାମାନ୍ୟ ଆହତ ହୋଇଛନ୍ତି। ଖବର ପାଇ ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ସମସ୍ତଙ୍କୁ ଉଦ୍ଧାର କରିଥିଲେ। ଆହତ ଯାତ୍ରୀମାନେ ପାଖ ଅଞ୍ଚଳର ହୋଇଥିବାରୁ ସେମାନଙ୍କ ସମ୍ପର୍କୀୟ ଘଟଣାସ୍ଥଳରେ ପହଞ୍ଚି ସେମାନଙ୍କୁ ସେଠାରୁ ନେଇଯାଇଥିବା ଜଣାପଡ଼ିଛି। ରାସ୍ତାକଡ଼ରେ ପାନୀୟ ଜଳ ପାଇପ୍ ବିଛାଯାଇଛି। ତା’ ଉପରେ ମାଟି ବିଛାଯାଇଛି। ବସ୍ଟି ପାଇପ୍ ଉପରେ ବିଛାଯାଇଥିବା ମାଟି ଉପରେ ଚଢ଼ିଯିବାରୁ ଭାରସାମ୍ୟ ହରାଇ କିଛି ବାଟ ଜଙ୍ଗଲ ମଧ୍ୟକୁ ପଶିଯାଇଥିଲା। ଖବର ପାଇ ଜଙ୍କିଆ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
