କୁଜଙ୍ଗ,୪ା୪(ଡି.ଏନ୍.ଏ.): ଏରସମା ବ୍ଲକ ଅନ୍ତର୍ଗତ ଗଡ଼କୁଜଙ୍ଗରେ ପ୍ରସିଦ୍ଧ କୁଞ୍ଜବିହାରୀ ମନ୍ଦିରକୁ ପର୍ଯ୍ୟଟନ କ୍ଷେତ୍ରର ମାନ୍ୟତା ମିଳିଛି। ଏହାସତ୍ତ୍ୱେ ରକ୍ଷଣାବେକ୍ଷଣ ଅଭାବରୁ ବିଭିନ୍ନ ସମସ୍ୟା ଦେଇ ଗତି କରୁଛି। ଏଠାକୁ ଦୈନିକ ବହୁ ସଂଖ୍ୟାରେ ଭକ୍ତ ଆସି ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ଏନେଇ ବିଭାଗୀୟ ଅଧିକାରୀ ଓ ଜନପ୍ରତିନିଧିଙ୍କ ନିକଟରେ ବାରମ୍ବାର ଅବଗତ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ପରିସରରେ ଏକ ସୋଲାର ନଳକୂପ ବସାଯାଇଛି। ଯେଉଁ ଶ୍ରଦ୍ଧାଳୁମାନେ କୁଞ୍ଜବିହାରୀଙ୍କୁ ଦର୍ଶନ ପାଇଁ ଆସନ୍ତି ସେମାନେ ଏଠାରେ ଧୋଇ ହୁଅନ୍ତି ଏବଂ ପ୍ରସାଦ ସେବନ ପରେ ହାତ ସଫା କରିଥାନ୍ତି। ମାତ୍ର ସୋଲାର ଉପକରଣ ଖରାପ ହୋଇଯାଇଥିବାରୁ ଦୀର୍ଘଦିନ ହେବ ଏଠାରେ ଜଳ ଯୋଗାଣ ବନ୍ଦ ରହିଛି। ମନ୍ଦିର ପରିଚାଳନା କମିଟି ପକ୍ଷରୁ ଏହାର ମରାମତି ପାଇଁ ବିଭାଗୀୟ ଅଧିକାରୀଙ୍କୁ ଅବଗତ କରାଯାଇଥିଲା। ମାତ୍ର କୌଣସି ପଦକ୍ଷେପ ନିଆନଯିବାରୁ ଉକ୍ତ ସ୍ଥାନରେ ଅନ୍ୟ ଏକ ନଳକୂପ ବସାଗଲା। ମାତ୍ର ଅଳ୍ପଦିନ ବ୍ୟବଧାନରେ ନଳକୂପର ପ୍ଲାଟଫର୍ମ ଭୁଶୁଡି ଯିବାରୁ ତାହା ଅଚଳ ହୋଇଯାଇଛି। ଫଳରେ ମନ୍ଦିର ପରିସରରେ ଜଳଯୋଗାଣ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି। ପ୍ରତିବର୍ଷ ଏଠାରେ ଜଗନ୍ନାଥଙ୍କ ପାରମ୍ପରିକ ରଥଯାତ୍ରା ଅନୁଷ୍ଠିତ ହୋଇଥାଏ। ଏଥିନିମନ୍ତେ ବଡ଼ଦାଣ୍ଡର ଉଭୟ ପାର୍ଶ୍ୱ ଖୋଲା ରହିବାର ଆବଶ୍ୟକ ରହିଛି। ମାତ୍ର କିଛି ଲୋକ ବେଆଇନଭାବେ ବଡ଼ଦାଣ୍ଡକୁ ଲାଗି ଘର ତିଆରି କରି ରାସ୍ତା ଜବରଦଖଲ କରି ରଖିଛନ୍ତି। ଫଳରେ ବଡ଼ଦାଣ୍ଡ କ୍ରମଶଃ ସଙ୍କୁଚିତ ହେବାରେ ଲାଗିଛି। ଏ ସମ୍ପର୍କରେ ଏରସମା ତହସିଲଦାରଙ୍କୁ ଜଣାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ। ଦୀର୍ଘ ୧୦ ବର୍ଷ ତଳେ ରାଜ୍ୟ ପର୍ଯ୍ୟଟନ ଉନ୍ନୟନ ନିଗମ ପକ୍ଷରୁ ୧୪ ଲକ୍ଷ ଟଙ୍କା ବ୍ୟୟ ଅଟକଳରେ ମନ୍ଦିର ପରିସରରେ ଏକ ଯାତ୍ରୀ ନିବାସ ନିର୍ମାଣ କରାଯାଇଛି। ଏଥିରେ ୨ଟି ଶୌଚାଳୟ ମଧ୍ୟ ରହିଛି। ମାତ୍ର ଛାତ ପଡ଼ିବାପରେ ଯାତ୍ରୀ ନିବାସର ପ୍ଲାଷ୍ଟର, ମେଜିଆ, ଝରକା, କବାଟ ଲଗାଯାଇ ନାହିଁ। ଠିକାଦାର ଅଧାରୁ କାମ ଛାଡି ଚାଲିଯାଇଥିବାରୁ ଦୀର୍ଘ ୧୦ ବର୍ଷହେଲା ଏହା ପରିତ୍ୟକ୍ତ ଅବସ୍ଥାରେ ପଡ଼ି ରହିଛି। ଗତ ଡିସେମ୍ବର ୧୧ରେ ରାଜ୍ୟ ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ, ଏରସମା ବାଲିକୁଦା ବିଧାୟକ ତଥା ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ, ପାରାଦୀପ ବିଧାୟକ ସମ୍ବିତ ରାଉତରାୟ ଗଡକୁଜଙ୍ଗ ଗସ୍ତରେ ଆସିଥିଲେ। ଏହି ସମୟରେ ସ୍ଥାନୀୟ ଜନସାଧାରଣଙ୍କ ପକ୍ଷରୁ ଏ ସମ୍ପର୍କରେ ଅଭିଯୋଗ କରାଯାଇଥିଲା। ମାତ୍ର ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇନାହିଁ। ତୁରନ୍ତ ଏସବୁ ସମସ୍ୟାର ସମାଧାନପାଇଁ ମନ୍ଦିର ପରିଚାଳନା କମିଟି ସମ୍ପାଦକ ପୀତାମ୍ବର ରାଉତ, ସଦସ୍ୟ ଭୋଳାନାଥ ସ୍ବାଇଁ, ଧୀରେନ୍ଦ୍ର ମହାନ୍ତି, ଦେବେନ୍ଦ୍ର ମହାପାତ୍ର, ବିଜୟଚାନ୍ଦ ନାୟକ ପ୍ରମୁଖ ଦାବି କରିଛନ୍ତି।
ଏ ସମ୍ପର୍କରେ ଏରସମା ତହସିଲଦାର ଚୌଧୁରୀ ପ୍ରଜ୍ଞାନନ୍ଦ ଦାସ କହିଛନ୍ତି, ବଡ଼ଦାଣ୍ଡ ଅଭିଯୋଗ ଉପରେ ସେ ଅଭିଯୋଗ ପାଇଛନ୍ତି। ଖୁବ୍ଶୀଘ୍ର କ୍ଷେତ୍ର ପରିଦର୍ଶନ କରି ଆଗାମୀ ପଦକ୍ଷେପ ନିଆଯିବ। ଏ ସମ୍ପର୍କରେ ମନ୍ତ୍ରୀ ତଥା ସ୍ଥାନୀୟ ବିଧାୟକ ଦାସଙ୍କ ସହ ମୋବାଇଲ୍ ଯୋଗେ ଯୋଗାଯୋଗ କରାଯାଇଥିଲ। ମାତ୍ର ସୁଇଚ୍ ଅଫ୍ ଥିବାରୁ ଅଧିକ ସୂଚନା ମିଳିପାରି ନାହିିଁ।
