ଝୁମ୍ପୁରା, ୫।୭ (ଡି.ଏନ.ଏ.): କେନ୍ଦୁଝର ଜିଲା ଝୁମ୍ପୁରା ବ୍ଲକ ମଲଦା ପଞ୍ଚାୟତରେ ରହିଛି ଜଗଦଳା କ୍ଷୁଦ୍ର ଜଳସେଚନ ପ୍ରକଳ୍ପ। ଏହାର ଉନ୍ନତୀକରଣ କାମ ଅଧାରେ ଅଟକିଛି। ଉକ୍ତ ଡ୍ୟାମ୍ ଉପରେ ବହୁ ଗ୍ରାମର ଚାଷୀ ନିର୍ଭର କରୁଥିଲେ ମଧ୍ୟ କାର୍ଯ୍ୟ ଅଧାପନ୍ତରିଆ ହୋଇପଡ଼ିଥିବାରୁ ଲୋକେ ହଇରାଣ ହେଉଛନ୍ତି। ଏହି ଡ୍ୟାମ୍ର ରିଜର୍ଭର, ଟନେଲ, ସର୍ପ୍ଲସ ଟନେଲ, ମୁଖ୍ୟ କେନାଲ ତତ୍ସହିତ ଝୁମ୍ପୁରା ବ୍ଲକ ଓ ସଦର ବ୍ଲକର ଗୋଡୁଆ ଟୋପା, ରେଙ୍ଗାଳବେଡା, ଧନୁର୍ଜୟପୁର, କୁରଡିହି, ସିଲିସୁଆଁ, କାଳିସୁଇ, କଣ୍ଡାରାପଶି ଆଦି ଗ୍ରାମଗୁଡିକର ଚାଷଜମିରେ ଶାଖା କେନାଲ ଭାବେ ବିଛାଇ ହୋଇରହିଛି।
ସମୟକ୍ରମେ ରିଜର୍ଭର ପୋତିହେଲା, ଟନେଲରେ ଲିକ, ଧ୍ୱସ୍ତ ଅବସ୍ଥାରେ କେନାଲ ଯୋଗୁ ଚାଷଜମିକୁ ପାଣି ମାଡିଲା ନାହିଁ। ଚାଷୀଙ୍କ ବାରମ୍ବାର ଅଭିଯୋଗ ପରେ ୨୦୧୮ରେ ଜଗଦଳା ଡ୍ୟାମର ରିଜର୍ଭର ପଙ୍କୋଦ୍ଧାର, ଟନେଲ ମରାମତି, ମୁଖ୍ୟ କେନାଲ ମରାମତି ଆଦି ପାଇଁ ଜିଲା ଖଣିଜ ପାଣ୍ଠିରୁ (ଡିଏମ୍ଏଫ୍) ୩ କୋଟି ୩୩ ଲକ୍ଷ ଟଙ୍କାରୁ ଊର୍ଦ୍ଧ୍ୱ ବ୍ୟୟବରାଦ କରାଯାଇ କ୍ଷୁଦ୍ର ଜଳସେଚନ ବିଭାଗ ଜରିଆରେ ଟେଣ୍ଡର ଦିଆଗଲା। ସେହିପରି ବିଛାଇ ହୋଇପଡିଥିବା କେନାଲଗୁଡିକର ମରାମତି, କେନାଲ ସ୍ବାଇଫଲ ମରାମତି ପାଇଁ କ୍ଷୁଦ୍ର ଜଳସେଚନ ବିଭାଗ ଜରିଆରେ ଆଉ ଏକ ଟେଣ୍ଡର ଦିଆଗଲା। ଜିଲା ଖଣିଜ ପାଣ୍ଠିରୁ ଦ୍ୱିତୀୟ ଟେଣ୍ଡର ପାଇଁ ୩ କୋଟି ୩୩ ଲକ୍ଷରୁ ଊର୍ଦ୍ଧ୍ୱ ବ୍ୟୟବରାଦ ହୋଇଥିଲା। ଡ୍ୟାମ୍ର ଉନ୍ନତୀକରଣ ପାଇଁ ସମୁଦାୟ ୭ କୋଟି ପାଖାପାଖି ଟଙ୍କା ବ୍ୟୟବରାଦ ହୋଇଛି। ବର୍ତ୍ତମାନ ପର୍ଯ୍ୟନ୍ତ ପ୍ରଥମ ଟେଣ୍ଡର ଏଷ୍ଟିିମେଟ୍ ଅନୁସାରେ ଡ୍ୟାମ୍ ରିଜର୍ଭର ପଙ୍କୋଦ୍ଧାର ହୋଇନାହିଁ କି ଟନେଲ ମରାମତି ହୋଇନାହିଁ। କେବଳ ମୁଖ୍ୟ କେନାଲର କିଛି ଅଂଶ ଯେନତେନ ମରାମତି କରାଯାଇଛି। କ୍ଷୁଦ୍ର ଜଳସେଚନ ବିଭାଗ କେବଳ ମିଟିଂ ଡକାଇ କାମ ଚଳାଇ ନେଉଛି ବୋଲି ଚାଷୀ ସୁନାରାମ ମାଝୀ, ଜାପାନ ମାଝୀ, ଆଦେଶ ମୁଣ୍ଡା ପ୍ରମୁଖ ଅଭିଯୋଗ କରିଛନ୍ତି। ଅନ୍ୟ ପକ୍ଷରେ କେନାଲ ପାଇଁ ଥିବା ସୂଚନା ଫଳକ ଏବଂ ଡ୍ୟାମ୍ ପାଖରେ ଥିବା ସୂଚନା ଫଳକରେ କାର୍ଯ୍ୟ ଆରମ୍ଭ ତା.୫।୧।୨୦୧୮ ଲେଖାଥିବା ବେଳେ, କାର୍ଯ୍ୟଶେଷ ତା.୪।୧୨।୨୦୧୮ ଲେଖାଯାଇଛି। ଉଭୟ ସୂଚନାଫଳକରେ ସମାନ ଲେଖାଯାଇଛି। କିନ୍ତୁ ଏଯାଏ କାମ ଅଧାରେ ଅଟକିଥିବା ଚାଷୀ ଅଭିଯୋଗ କରିଛନ୍ତି।
ଏ ସମ୍ପର୍କରେ କ୍ଷୁଦ୍ର ଜଳସେଚନ ବିଭାଗର ସହକାରୀ ଯନ୍ତ୍ରୀ ଡି. ପ୍ରଧାନଙ୍କୁ ପଚାରିବାରୁ ସେ କାମ ହେବ କହିଛନ୍ତି। କେନ୍ଦୁଝରସ୍ଥିତ କ୍ଷୁଦ୍ର ଜଳସେଚନ ବିଭାଗର ନିର୍ବାହୀଯନ୍ତ୍ରୀ ମାନସ ରଞ୍ଜନ ଦାସ କହିଛନ୍ତି, ରିଜର୍ଭରରେ ପାଣି ପଶିଯିବାରୁ କାମ ହୋଇପାରିନାହିଁ, କାମ ହେବ। ତେବେ ସୂଚନାଫଳକ ସମ୍ବନ୍ଧରେ କିଛି କହିନାହାନ୍ତି।
